Lítil áramótahugleiðing

 

Íslenska þjóðin er enn að vinna úr einu versta áfalli sem yfir hana hefur dunið.

Vandséð er hvað verður og hvernig við komumst frá þeim ódáðaverkum sem glapvísir menn frömdu og leiddu hrikalegar afleiðingarnar síðan yfir þjóðina.

Það er með ólíkindum hvað ábyrgðarleysi ráðamanna var mikið á árunum fyrir hrunið og hvernig fjöreggi lands og þjóðar var kastað sitt á hvað í hráskinnaleik stjórnmálanna meðan þau voru í heljarklóm frjálshyggjunnar sem réði lögum og lofum í Sjálfstæðisflokknum, sem ég hef leyft mér að kalla Þjóðarógæfuflokkinn stóra. Þessi hugarfarsspilling frjálshyggjunnar náði líka miklum áhrifum í Framsóknarflokknum sem var þá undir forustu Halldórs Ásgrímssonar, sem var í rauninni alveg samdauna sjálfstæðismönnum. Það fólk sem í forustu Framsóknarflokksins lét hafa sig til ógæfuverka á valdatíma Halldórs ætti auðvitað allt að hafa spilað sitt hlutverk í stjórnmálum. Það er að mínu mati ekki hæft til frekari þjónustu fyrir almannahag. Verkin sýna merkin !

Samfylkingin dróst líka furðu langt með íhaldinu í frjálshyggjuæðinu. Þar eru enn menn sem vilja gera sig breiða og gildandi, en ættu eins og Ingibjörg Sólrún að halda sig til hlés hér eftir.

Sjálfstæðisflokksforustan hefur að undanförnu talað mikið um að varðveita hagsmuni þjóðarinnar, en af hverju eru þeir hagsmunir í þeirri klípu sem við blasir. Vegna þess að Sjálfstæðisflokkurinn brást algerlega þjóðarhagsmunum á sínum langa valdatíma.

En það vantaði ekki að menn gerðu miklar kröfur um rosahá laun vegna ábyrgðarþungans sem hvíldi á þeim ! En hvernig kom sú ábyrgð út í raun....?

Öllu, bókstaflega öllu hefur verið velt á almenning af því óþverra landeyðuhyski sem deildi og drottnaði hér til margra ára.

Og Steingrímur og Jóhanna hafa þegar misst geislabauginn að þrem fjórðu hlutum síðan þau tóku við. Það eina sem virðist forða þeim frá algerri falleinkunn í huga þjóðarinnar er að enginn valkostur er betri því sjálfstæðisþingliðið er gjörsamlega óhæft til alls.

Flestir gera sér nefnilega grein fyrir því að um 80% prósent ábyrgðarinnar á hinu raunverulega þjóðargjaldþroti Íslands skrifast alfarið á reikning Sjálfstæðisflokksins !

Eftir 18 ára óslitinn valdaferil hans var skilið við þjóðfélagið í rúst. Svo er forusta þessa flokks að gera sig breiða, menn sem ættu aldrei að geta orðið trúverðugir aftur í augum svikinnar þjóðar.

Munu menn með heilbrigðan og þjóðhollan hugsunargang virkilega treysta Bjarna Ben, Guðlaugi Þór eða Þorgerði Katrínu aftur til góðra verka, eða halda menn að Pétur Blöndal, fulltrúi og málpípa fjármagnseigenda, geti trúverðuglega talað fyrir heildarhagsmunum ?

Í mínum huga hefur þetta fólk alltaf verið talsmenn sérhagsmuna, talsmenn 7 hægri-stefnunnar !

Nú eru jóladagarnir stóru að baki. Ég vona það innilega að allt almennt fólk á Íslandi hafi getað búið við sæmilegan lífsaðbúnað á fæðingarhátíð Frelsarans  - þrátt fyrir allt - og styrkt fjölskyldu og vinabönd yfir hátíðarnar. Ekki er vanþörf á því.

Ég óska öllum góðum Íslendingum allra heilla nú um áramótin og vona að komandi ár verði fólk ekki eins þungt í skauti og þetta ár hefur verið sem nú er að líða.

Ég á hinsvegar engar góðir óskir til handa því gráðuga hyski sem setti hér allt á hvolf. Það hefur ekki sýnt neina iðrun og hefur enn í sér sama blóðsugueðlið og áður. Ég tel það ekki til þjóðarinnar því þeir sem svíkja eigin þjóð, sína eigin þjóðarsál, eru fyrirlitlegastir allra manna !

Gleymum því aldrei sem þeir gerðu og leiðum aldrei þeirra líka aftur til valda á Íslandi.

LÆRUM AF REYNSLUNNI !

 

 

 

 

 

Hringið þið bjöllur...........

Hringið þið bjöllur um himinslóð,

hljómið þið nú á hverjum stað.

Hringið að nýju inn gildin góð,

gerið þeim fært að komast að !

 

Hringið út árið og hringið inn nýtt,

hamingjan opni því kjarna sinn.

Kallið á hugarfar hjartablítt,

hringið út lygina og sannleikann inn !

 

Hringið út sorgina og söknuð þann

er situr í huga við vina lát.

Hringið út allt það sem hrella kann,

hringið inn það sem stillir grát !

 

Hringið út bölsýni úr bæ og sveit,

blessun þar sameini hjartaslög.

Hringið inn framtíðar fyrirheit,

fegurri siði og betri lög !

 

Hringið út kala og beiskju blóð,

banvænan skort í gæfuþröng.

Hringið út svartnættis harmaljóð,

hringið inn dýrmætan gleðisöng !

 

Hringið út falsið sem flekkar brá,

fordóma er plága þjóðarbú.

Hringið inn sannleikans sóknarþrá,

sigur hins góða í von og trú !

 

Hringið út viðhorf sem næra níð,

nái þau hvergi að flæða um svið.

Hringið út allt það sem heimtar stríð,

hringið inn þúsund ára frið !

 

Hringið inn mennskuna í trú og tryggð,

tállausan anda í lífsins sal.

Hringið út myrkrið úr heimsins byggð,

hringið inn LJÓSIÐ sem vera skal !

                                                       

                                                   Rúnar Kristjánsson

( Frumhugmynd ljóðsins er byggð á kafla í                        

                             hinum mikla ljóðabálki Tennysons  In Memoriam. )         

 

Um verðbréfavíti og svívirta þjóð

Þegar verðbréfaviðskipti fóru í algleyming peningagræðginnar um og eftir einkavæðingu bankanna, raskaðist hreinlega grundvöllur heilbrigðrar hugsunar í landinu eða að minnsta kosti á Reykjavíkursvæðinu.

Menn lögðu líf sitt og hamingju í verðbréf, reiknuðu gróðann dag frá degi og sáu ekkert annað en síhækkandi arðgreiðslur.

En þetta átti sér svo sem ekki stað nema fyrir sívirkan hvata að þessu. Bankarnir og verðbréfafyrirtækin hvolfdu sér yfir fólk dags daglega með yfirgengilegum fullyrðingum um öruggan og skjótfenginn gróða. " Kauptu, kauptu, kauptu, annars ertu að tapa ", sögðu sérfræðingar íslenska fjármálakerfisins æ ofan í æ, uns fólk vissi ekki sitt rjúkandi ráð. Og fjölmiðlarnir gengu í lið með hinum seðlaþyrsta samkór fjármálafyrirtækjanna og arðrændu þannig almenning líka með fölskum yfirlýsingum um allskonar ávinning sem lægi bókstaflega fyrir hunda og manna fótum. Það er því kaldhæðnislegt að heyra fjölmiðlana tala um að þeir gæti hagsmuna almennings því græðgistíminn sýndi ljóslega að þeir voru beinlínis andstæðir almannahagsmunum í fjölmörgum veigamiklum málum.

Öll yfirvöld brugðust trausti almennings fyrir hrunið, í hruninu og eftir hrunið.

Það er því ekkert traust eftir í þessu þjóðfélagi fyrir tækifærissinnaðan forseta,vinstristjórn sem hegðar sér eins og hægristjórn, ónýtt alþingi og tímavilltan hæstarétt - eða endurreist bankaskrímsli !Og að reyna að keyra upp tiltrú á pappíraverðleysu við þessar aðstæður er það sama og að veifa tilbúinni snöru framan í marghengdan almenning þessa lands.

Skömmu eftir hrunið orti Enginn Allrason þessa vísu :

Þjóðin fær að greiða gjöld,

glötun margra bíður.

Því að íslensk yfirvöld

eru gl....ópa.....lýður !

Íslendingar munu líklega aldrei hafa yfir sér aftur jafn ömurlega óhæf yfirvöld eins og þau sem sátu hér fyrir hrunið og framyfir það. Íslenskir ráðamenn á þeim tíma voru slegnir svo mikilli blindu og kæruleysi fyrir þjóðarhag að slíkt verður varla nokkurntíma toppað. Nöfn þeirra verða í meðförum sögunnar mestu ógæfunöfn í Íslandssögunni ásamt nöfnum þeirra útrásarbanditta og bankasvindlara sem sviku þjóðina í skjóli stjórnvalda.

Eðlileg mamnnlífsgildi voru þverbrotin og verðbréf vitleysunnar sett í staðinn á stall. Fjármálavaldið traðkaði allt niður í svaðið sem gott hafði verið talið og gilt. Veislur viðurstyggðarinnar voru hvarvetna í fullum gangi í kerfinu.

Siðfræðistofnanir, skólar og menningarsetur þögðu þunnu hljóði á meðan og létu sem ekkert væri. Eftir syndafallið hafa hinsvegar komið úr þeim áttum mikil hneykslunarhróp og flestir þykjast nú hafa varað við - eins og Dabbi !

En það gleymdist hinsvegar með öllu að hin einu sönnu og gjaldgengu verðbréf þjóðfélagsins eru þegnarnir sjálfir, lifandi fólk með heilbrigða hugsun.

Það gleymdist líka að andinn bak við öll verðbréfaviðskipti er andi óhamingju og arðránshugsunar. Hinn mikli skyndigróði sem stundum fæst út úr slíku lotteríi er alltaf tekinn frá einhverjum og þeir sem taka hann eru yfirleitt hinir reyndu refir sem fjalla um málin. Hinir óreyndu sem leggja fé sitt í púkkið standa oftast uppi fjárvana eftir spilið.

Og enn í dag stöndum við Íslendingar hreint ekki vel að vígi, enda yrkir Enginn Allrason um núverandi stöðu mála með eftirfarandi hætti :

Margt er bruggað bak við tjöld,

bókuð leið til rána.

Því að íslensk yfirvöld

eru síst að skána !

Enginn Allrason telur líka að það ætti að vera auðvelt fyrir hvern og einn að sjá fyrir hverja þessi svokölluðu yfirvöld starfa í raun og veru :

Auðjöfrum hjálpa yfirvöld,

afskrifa þar á fullu.

Hella svo yfir fólksins fjöld

fjármálakerfisdrullu !

 

 

 

 

 

 

Hvítþvottarbækur

     

Íslenskt þjóðfélag er nú að kynnast nýjum bókmennta-iðnaði, sem hefur sprottið upp eftir efnahagshrunið af ástæðum sem liggja í augum uppi.

Ég á þar auðvitað við hvítþvottar-bækurnar sem þegar eru orðnar nokkrar talsins. Ýmsir sjá sig knúða til að bæta laskaða ímynd sína og vilja koma með sínar skýringar á atburðarás sem hefur sýnt þá í frekar óskemmtilegu ljósi eftir hrunið og fram til þessa. Þessvegna eru að koma út bækur eftir útrásarafglapa og bankadelinkventa, - og svo skrifa þjóðglataðir pólitíkusar auðvitað líka sínar útskýringabækur  -  allskyns mórar og skottur kerfisins !

Ég get vel ímyndað mér að þær bækur sem kunna að koma fram með fyrrgreindum hætti verði áður en lýkur orðnar býsna margar. Sumar kannski lipurlega skrifaðar en metnar í ljósi sannleikans munu þær áreiðanlega ekki fá háa einkunn eins og flestir ættu nú að geta skilið.

En eins og ég segi, þessi bókalisti gæti orðið langur og ef til vill eigum við eftir að sjá topp tíu í þessum flokki með eftirfarandi hætti :

 

1. Ég varaði við - sko ! - eftir Dabba O.

2. Orðstír aldregi deyr - eftir Geir.

3. Ég stóð í svo mörgu - eftir Ingibjörgu.

4. Ég segi satt - eftir Árna Matt.         

5. Ekki benda á mig - eftir Björgvin Sig.

6. Á röngum bás - eftir Halldór Ás.

7. Heimskreppuandinn algerði - eftir Valgerði.                                     

8. Greiningin var ljós - eftir Eddu Rós.

9. Reynslan sára - eftir Hannes Smára.

10. Hrunið kom sem elding - eftir Lárus Welding.

 o.s.frv.o.s.frv.o.s.frv.o.s.frv.o.s.frv.o.s.frv................................ 

 

Það virðast reyndar komnar út tvær bækur af þessum lista en undir öðrum nöfnum.

Þetta geta vafalaust allt orðið afar SPENNANDI BÆKUR svo Arnaldur má

fara að vara sig - því þetta eru sko ekta SAKAMÁLASÖGUR !!!