Leita í fréttum mbl.is

Bloggfærslur mánaðarins, janúar 2013

Bilderberg - klúbburinn !

Hvað er Bilderberg klúbburinn ? Fyrir hvað hefur hann staðið síðan hann var settur á laggirnar upp úr síðari heimsstyrjöldinni ?

Er hann góðgerðastofnun stórkapítalista sem hafa fundið til samviskubits yfir verkum sínum og eru að reyna að gera eitthvað gott á sínum efri árum - eða er hann samtryggingarkerfi áhrifamanna á Vesturlöndum fyrir óbreyttum aðstæðum valda og viðgangs ?

Kannski ættu menn sem vilja hugsa, að velta því dálítið fyrir sér hvað Bilderberg klúbburinn er og til hvers hann er starfræktur ?

Meginforsendur starfsemi Bilderberg klúbbsins eru nátengdar auðvaldsstefnu og arðráni og stuðningi við það hervald sem viðheldur slíkum hlutum, það er að segja Nató. Aðalmenn þessa klúbbs hafa löngum verið hægri sinnaðir pólitíkusar frá Natólöndum, en stundum hafa líka komið þar við sögu menn sem hafa þóst vera vinstrisinnaðir og hefur þá einkum verið um einhverja sleikjuþynnta sósíaldemókrata að ræða.

Það eru alltaf til einhverjir menn sem hafa slitið sig alveg frá sínum upphaflegu rótum og smám saman orðið þekktir af því einu að snúast eins og vindhanar eftir aðstæðum. Slíkir menn eru öllum óþarfir og enginn ber raunverulega virðingu fyrir þeim þó þeir hreyki sér upp og þykist vera eitthvað mikið.

Meðal sósíaldemókrata hefur aldrei verið skortur á mönnum af þessari manngerð eins og flestir ættu að geta skilið, enda gert út á sérhönnuð hentistefnu-frávik frá sósíalisma. Hugsanlega geta verið til einhverjir kratar einhversstaðar sem hægt er að bera einhverja virðingu fyrir, en þá er samt áreiðanlega ekki að finna á Íslandi nú á dögum !

Í gamla daga áttu samt að hafa verið til einhverjir kratar hérlendis sem talist gátu sæmilegir mannskapsmenn, en hafi svo verið, eru þeir löngu útdauðir eins og geirfuglinn.

Og þeir sem tóku við af þeim tóku aldrei flugið frekar en geirfuglarnir. Sálarlegt vænghaf þeirra var svo lítið að það leyfði ekki nema kjúklingahopp í bakgarði  pólitískrar spillingar þar sem bitlingunum hafði verið stráð í skítinn.

Slíkir menn þóttu þó og hafa ætíð þótt velkomnir og gjaldgengir í Bilderberg klúbbinn. Þau öfugsnúnu manngildissjónarmið sem þar ráða hljóða að margra dómi einmitt upp á þessa manngerð og þar sækja líkir líka heim.

Það segir sitt um innræti sósíaldemókrata þegar þeir eru komnir í sálufélag við stórkapitalista í mannætuklúbbi eins og Bilderberg !

Það hefur löngum verið dæmigerður ferill hentistefnumannsins, að hann þykist róttækur um tvítugt, er búinn að þvo allt slíkt af sér um fertugt og er kominn kyrfilega til hægri um sextugt.

Um tvítugt veit hann af spillingunni og ranglætinu og tekur sér stöðu með öðru ungu fólki sem vill breyta málum til batnaðar, um fertugt er hann búinn að koma sér vel fyrir, farinn að auðgast og nokkuð sáttur við heiminn eins og hann er, þar sem ranglætið er farið að þjóna hagsmunum hans og ekki beðið um annað, um sextugt er hann runninn algerlega saman við spillinguna og ranglætið og vill engu breyta !

Bilderberg klúbburinn er ekki og verður aldrei neitt fyrirbæri sem starfar í þágu göfugra markmiða. Þarna er um lokaðan sérhagsmunaklúbb peningaafla austan hafs og vestan að ræða, sem starfar í þeim eina tilgangi að viðhalda auðdrottnun þeirra aðila sem standa að honum. Þar er aðeins hugsað um veltu til vítis !

Heimurinn okkar væri því í alla staði betri án Bilderberg klúbbsins og þeirrar moldvörpustarfsemi sem unnin er á hans vegum !

Sumir Bilderberg menn hafa opinberlega látið í ljós þá skoðun, að þeir séu hlynntir því að stefnt sé að einni alheimsstjórn, því það muni tryggja friðinn í heiminum best. En þeim hinum sömu yfirsést sú staðreynd að slík valdsstjórn yrði aldrei vinsæl af öllum eða í þágu allra. Það myndi því víða vera barist gegn henni og vandséð hversu friðsamlegt yrði í heiminum við þær aðstæður ?

Svo er það líka spurningin mikla hver valdhafinn eigi þá að verða ?

Er það kannski Antikristur ?

 


Manneskjan á bak við sígarettuna ?

Fólk reykir ! Fólk reykir enn í dag, á þessum tímum upplýsingar og fullrar vitneskju um hættuna sem því fylgir ! Það ætti að segja okkur mikið um það hvernig fólk er, hvað það heldur fast í það sem því þykir gott, þó það viti að það sé alls ekki gott þegar á heildina er litið, heldur hreint og beint lífshættulegt 

Það er nautnin sem ræður, fíknin í það að taka áhættuna og reykja í þeirri trú að það verði bara aðrir sem fái krabba, það verði aðrir sem gangi með súrefniskúta á efri árum eða jafnvel fyrr, það verði aðrir sem greiði gjaldið !

Og fólk reykir og neitar að hlýða rödd skynseminnar, rödd eigin dómgreindar.

Það reykir og spillir heilsu sinni og líkamlegum farnaði, en stundar þó um leið heilsuræktarstöðvar af kappi. Það vill líta vel út - en um leið hellir það eiturefnum yfir líffæri sín og virðist ekkert hugsa um það hvernig það líti út - að innan !

Það reykir í kringum ástvini sína þó það viti hvílík hætta getur fylgt óbeinum reykingum, það spillir lífslofti annarra og helst þeirra sem því ætti að þykja vænst um og þykir vænst um ! En sjálfselskan virðist slík, í nautnahyggju reykingamanneskjunnar, að allt annað verður að víkja.

Það ætti að vera nóg sem getur farið með heilsu fólks, þó það sleppti því nú að eiga við tóbakið, eins djöfullegt og það nú er, en það virðist sem margir skelli skollaeyrunum við ógninni hversu áleitin og fórnfrek sem hún verður.

Sumir karlar eru alætur á tóbak, þeir reykja pípu, vindla og sígarettur og þeir taka í nefið og vörina.  Tóbakið er svo stórt atriði í lífi þeirra að ef þeir eru ekki að handleika það á einn eða annan hátt virðist þeim líða illa og þeir verða taugaóstyrkir.

Tóbaksauðhringirnir gerðu nánast allar kvikmyndastjörnur gullna tímabilsins í Hollywood að " þjónustubundnum öndum " sínum og greiddu þeim óspart fyrir að auglýsa reykingarnar. Það var með ólíkindum hvað spilað var fast á þá strengi og raunar þyrfti að rannsaka þá sögu og afhjúpa viðbjóðinn í kringum þá hluti !

Leikur Humphrey Bogarts á hvíta tjaldinu, svo þekkt dæmi sé tekið, snerist mikið um sígarettuna. Hann reykti sig í gegnum hverja myndina af annarri uns hann lést rétt rúmlega 57 ára gamall af krabbameini í hálsi. Þá var hann ekki orðinn nema 36 kg að þyngd og aðeins skugginn af sjálfum sér !

Sú var tíðin að konur reyktu nánast ekkert, en að því kom að þær tóku upp þennan ósið eftir körlunum og fóru jafnvel fram úr þeim í fíkninni !

Margar konur reykja á meðan á meðgöngu stendur. Þær sleppa sígarettunni ekki heldur þá ! Barnið þeirra fær nikótínið í sig strax í móðurkviði með þeim afleiðingum sem því getur fylgt. Og sumar konur reykja meðan þær gefa brjóstamjólkina ! Svo það er ekki skrítið þó margur spyrji : Hverskonar manneskja er á bak við sígarettuna ?

Fyrir skömmu heyrði ég mann furða sig á því í samtali, að ungir strákar væru farnir að taka í nefið og vörina eins og þekktist mest með gamla sveitakarla í eina tíð. Viðmælandi hans sagði að það væri nú ekki það versta, " en það er ekki langt síðan ég sá bráðfallega unga stúlku taka í vörina, ég var búinn að taka eftir því hvað stúlkan var lagleg, en þegar ég sá hana taka svona í vörina, þá fannst mér bókstaflega allt kvenlegt við hana þurrkast í burtu ! "

Margt núlifandi fólk byrjaði að reykja á tímum sem bjuggu ekki yfir þeirri þekkingu á skaðsemi reykinga sem liggur fyrir í dag, og það á sjálfsagt margt af því erfitt með að hætta nú þó það vildi. Þar er mörg þjáningasagan í gangi !

En það er mikill munur á vanþekkingu og forherðingu !

Það að ungt fólk í dag sé að venja sig á reykingar er óafsakanlegt dómgreindarleysi, jafnt með tilliti til eigin hags og heildarhags og það sama á við um alla notkun tóbaks nú á tímum.

Slíkt kæruleysi gagnvart lífinu - eigin heilbrigði sem annarra - hlýtur að hefna sín !

 

 

 

 

 


Fórnarlömb kapitalismans !

Fyrir allnokkru skrifaði Jakob F. Ásgeirsson rithöfundur, einn athafnamesti sérfræðingur Íslands í glæpasögu kommúnista, grein í Morgunblaðið og tíundaði í henni fórnarlömb kommúnismans vítt og breitt um heiminn !

Hann taldi eftir heimildum sínum fórnarlömb kommúnismans vera á bilinu 85-100 milljónir, en gat þess um leið að sennilega væri það þó varlega áætlað.

Mér finnst svona talnaleikur heldur óskemmtilegur, enda er þarna bilið á milli lægri tölu og hærri tölu heilar 15 milljónir manna !

Hvernig stendur á því að Jakob F. Ásgeirsson, með sína sérfræðiþekkingu á þessu viðfangsefni, getur ekki gefið upp nákvæmari tölu eða jafnvel eina ákveðna tölu ? Hann hefur þó áreiðanlega fullan aðgang að öllum bandarískum heimildum um málið og hver leyfir sér að efast um að þær séu réttar ?

Kannski hefur hann ekki spurt meistara sinn í faginu, fyrrverandi Harvard-prófessor Richard Pipes, nógu vel út í málið ?

Richard Pipes hlýtur að vera með þessa tölu mikið til á hreinu, maður sem hefur skráð um langa ævi allar syndir og glæpi kommúnista !

Jakob og Pipes virðast hafa farið með svo mikinn tíma í þetta rannsóknarefni, að það hefur aldrei verið tími afgangs hjá þeim blessuðum til að fara eitthvað yfir tölur um fórnarlömb einræðisherra til hægri, fasistaleiðtoga og fjárdrottna kapitalismans !

En það er líklega mun erfiðara reikningsdæmi þar sem það nær yfir töluvert lengri tíma og fáum er sennilega boðið að vera á góðu kaupi við að rekja þá syndasögu.

Það er því ekkert verið að rekja syndaskrár manna eins og Chiang Kai Sheks, Adolfs Hitler, Benito Mussolinis, Josefs Pilsudskis, Horthys, Ions Antonescus, Ante Pavelics, Francisco Francos, Antonio Salazar, Alfredo Stroessner, Anastasio Somoza, Augusto Pinochets, Rafaels Trujillo, Papa Doc Duvaliers, Batista, Suhartos og hvað sem þeir nú allir saman heita, þessir ótölulegu glæpakapitalistar heimsins ! "

Þetta eru okkar óþokkar " gætu þeir Jakob og Pipes víst sagt samhljóða eins og breski blaðamaðurinn sem afsakaði það, að Pinochet var ekki framseldur á sínum tíma, með því einu að segja : " Þetta er nú okkar óþokki ! "

En glæpir eru glæpir, hver sem drýgir þá, og réttvísin á að gilda jafnt til hægri sem vinstri. Það hlýtur að vekja upp spurningar um andlegt heilsufar, þegar fólk liggur endalaust yfir misgjörðum pólitískra andstæðinga, af þeirri einu ástæðu að í hlut eiga pólitískir andstæðingar, og vill aðeins nota framda glæpi sem vopn til að herja á þá. Hvar er samúðin með fórnarlömbunum og eiga ekki öll fórnarlömb ranglætis, kúgunar og ófrelsis sama rétt ?

Það þótti tíðindum sæta á sínum tíma þegar Elín Pálmadóttir blaðamaður lýsti því yfir í Morgunblaðinu, að kommúnistar í Kambódíu hefðu drepið tugmilljónir landsmanna. Á þeim tíma var öll kambódíska þjóðin um 7 milljónir manna !

Hvernig gat fróðri manneskju eins og Elínu dottið í hug að tala um tugmilljónir manna í þessu sambandi ? Var Morgunblaðstaugin svo sterk í henni að hún margfaldaði tölu landsmanna með þessum hætti í þágu baráttunnar gegn heimskommúnismanum ? Kannski hefur það verið svo en það er engum málstað til vinnings að fara með staðleysur !

En vissulega var framferði Pol Pots og hans manna alveg með ólíkindum grimmdarlegt og ekki hægt að ímynda sér annað en þar hafi geðsjúkir menn stjórnað málum. Það þarf náttúrulega að rannsaka slík mál niður í kjölinn og upplýsa þau, í samræmi við réttlætið - en ekki einhvern pólitískan ávinning.

En geðsjúklingar eru víðar en til vinstri og mannkynssagan getur sagt okkur frá fjölda einvalda sem allir voru náttúrulega kapitalistar og hægri menn, sem voru snarruglaðir og létu drepa fjölda manns !

En Jakob og Pipes meistari hans virðast ekki hafa neinn áhuga fyrir slíkum manndrápum. Þeir hafa sjáanlega bara áhuga fyrir manndrápum sem þeir geta heimfært upp á kommúnista !

Það virðist ekki vera til snefill af samúð hjá þessum kapitalísku talnameisturum í garð fórnarlambanna, heldur aðeins skefjalaus ánægja yfir því að geta komið höggi á bölvaða kommúnistana !

Margt leggja menn nú fyrir sig í þessum heimi og sennilega ekki síst þegar nógir eru til að borga þeim vel fyrir " fræðimennskuna " !!!

 


Lítil hugvekja í byrjun árs

Nú vita það flestir að margir eiga bágt í þessum heimi. En sem betur fer eru líka margir sem vilja hjálpa og líkna og gera náunga sínum til góða, beint og milliliðalaust. Þannig hefur líka hinn sanni kærleikur sýnt sig best á öllum tímum. Það er með mannelskunni í sinni einföldustu mynd !

Kirkjudeildir hafa hinsvegar löngum verið því marki brenndar, að þær hafa  verið milliliðir í góðverkunum. Af þeirra hálfu er sí og æ sótt til almennings um fjárframlög til líknarmála, en þessar stofnanir muna þó oftast vel eftir því að taka þakkirnar til sín fyrir það sem vel er gert. Hjálparstofnun kirkjunnar ætti kannski heldur að heita Hjálparstofnun almennings, því frá fólkinu kemur féð til starfseminnar.

Biskup Íslands talaði í áramótaræðu sinni um ástandið í heilbrigðismálakerfinu, þar sem tæki séu orðin léleg og úrelt, en kirkjan er líka stofnun og hefur viljað fá sína peninga. Og úrræði biskups er landssöfnun þar sem enn einu sinni á að herja á langþreyttan almenning þessa lands til framlaga.

Engum hefur blætt í þessu landi í gegnum hrunið eins og hinu almenna fólki, ríkishítin að meðtalinni kirkjunni fær sitt, en hvar sem um er að ræða þjónustu við almenning er skorið niður og kauphækkanir eru hvergi nefndar.

En biskup landsins er eins og páfinn þegar hann flytur ávörp sín af svölunum frægu, hvetur aðra til þess að hjálpa en situr fast á sínu !

Þó margar kirkjudeildir séu hreint ekki á flæðiskeri staddar, peningalega séð, liggja þeirra peningar yfirleitt ekki á lausu. Kaþólska kirkjan sem er svo auðug, að hún þyrfti ekki annað en að selja eitt málverk úr safni sínu til að bjarga málum varðandi yfirvofandi hungursneyð í einhverju landi, lætur aldrei neitt slíkt af hendi og heldur fast um sitt sem í mörgu er talið illa fengið.

Þó hún teljist eiga fjölda listaverka og allskyns verðmæti sem eru talin nánast ómetanleg, situr hún á sínu gulli eins og hún hefur alltaf gert og réttir blæðandi heimi aldrei heilshugar hjálparhönd. Páfaríkið hefur alltaf verið margfalt í roðinu og hefur vasast í alls konar fjárfestingum í tímans rás og staðið í  veraldlegu braski sem enginn hefði getað ímyndað sér að væri í þess verkahring.

Það hefur haft óheyrileg völd í margar aldir og margt í sögu þess er að mínu mati með því ljótasta sem til er. Það er ekki furða þó fullyrt sé að Hitler hafi oft farið lofsamlegum orðum um þetta stórauðuga prelátaríki við ýmis tækifæri. Fjöldi fólks hrífst þó enn í dag af viðhafnarmiklum skrúðgöngum og ytri umgerð þessarar valdamiklu kirkjudeildar og gerist jafnvel kaþólskt á þeim upplýsingartímum sem við lifum á þó sagan ætti að hrópa gegn slíku.

Ég held að hjá slíkum einstaklingum sé flest annað meira ráðandi en trúarleg afstaða ein og sér. Aldrei gæti ég séð fyrir mér að ég gerðist kaþólskur, því í mínum augum er það svona svipað því og að vera flokksbundinn í rangnefndum sjálfstæðisflokki. Og þar er bara um menn að ræða sem hafa kosið að vera innmúraðir og innvígðir andstæðingar sinnar eigin réttlætiskenndar !

En fleirum en kaþólsku kirkjunni þykir gullið gott !

Margir bandarískir prédikarar hafa lifað og lifa í vellystingum praktuglega, ekki síst þeir sem hafa lagt fyrir sig svokallað sjónvarpstrúboð.

Peningahyggja og auðsækni margra í þeim hópi virðist vera með ólíkindum. Ég lít svo á að í þessum hópi séu t.d. Benny Hinn, Kenneth Copeland, Creflo Dollar, Joyce Meyer, Jim Bakker, Paul Crouch  - og reyndar margfalt fleiri - afskaplega þurftarmiklir einstaklingar !

Þetta fólk á flottar íbúðir hér og þar, yfirleitt með dýrasta húsbúnaði, það ekur um á glæsibílum og á oftast nokkra slíka, það ferðast um í einkaþotum og tekur sér laun sem eru upp á milljónir dollara.

Það virðist ekkert sérstaklega horfa til himins eftir launum þjónustu sinnar, því það er á fullu í því að taka laun sín hérna megin - í milljónum dala ár hvert !

Hefur þetta fólk enga hugmynd um að það er til blæðandi heimur allt í kring ?

Sér einhver Jesú Krist og fordæmi hans í þessum gírugu lífsháttum ?

Það er sagt að þetta fólk prédiki " The health and wealth gospel ", sem gengur út á það - að fólk eigi hikstalaust að búa við góða heilsu og nóg af peningum.

Ef það sé ekki raunin, þá hafi fólk bara gert eitthvað af sér og þessvegna sé flæði gæðanna frá Guði ekki fyrir hendi !

Það er eins og þetta fólk þekki ekki neitt til sögunnar og hafi ekki hugmynd um að kristindómurinn vann sinn sigur í gegnum píslarvætti ótaldra þúsunda manna og kvenna sem höfðu ekki gert neitt af sér ; fólks sem varð saklaust fyrir ofsóknum vegna þess að það hafði gengið Kristi á hönd í heiðnum heimi.

Það fólk sóttist ekki eftir efnislegum gæðum, það sóttist eftir því óforgengilega lífi sem Orðið býður þeim sem hafa fullnað skeiðið í trú og sönnum Guðsótta.

David heitinn Wilkerson lýsti sjónvarpstrúboði í bók sinni Set the Trumpet to Thy Mouth sem einu mesta afleiðingarferli í trúarleiðsögn sem hann þekkti.

Hann sagði að sjónvarpið væri eitt mesta skurðgoð sem tekið hefði verið inn á heimili manna, eins og það væri notað almennt í dag. Það neikvæða sem væri haft fyrir fólki í gegnum sjónvarpið væri svo risavaxið að áhrifum að ekkert kæmist þar í samjöfnuð. Og þeir sem héldu að þeir gætu notað þetta idol til kristins trúboðs væru á algjörum villugötum.

Nú er David Wilkerson látinn en orð hans lifa og ég trúi því að hann hafi verið það gegnheill Guðsmaður að hann hafi ekki varað við slíkum hlutum af ástæðulausu. Munum að við þurfum að þekkja allt af ávöxtunum sem það gefur. Látum ekki blekkjast af sýndarmennsku, lygum og lýðskrumi, það er alltaf nóg framboð af slíku. Gætum okkar á þeim sem eru í raun glefsandi vargar !

Gerum okkur grein fyrir því að í upphafi hvers árs er okkur ekki síst nauðsyn á því að sameinast í þeirri bæn - að nýhafið ár megi verða landi og þjóð til heilla !

 


Höfundur

Rúnar Kristjánsson
Höfundur er húsasmiður og býr á Skagaströnd.

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (28.3.): 195
  • Sl. sólarhring: 290
  • Sl. viku: 1216
  • Frá upphafi: 309910

Annað

  • Innlit í dag: 182
  • Innlit sl. viku: 1048
  • Gestir í dag: 182
  • IP-tölur í dag: 180

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband