Ósakhæfir menn !

Nú liggur það fyrir eftir uppkvaðningu dóms yfir Geir Haarde, að ráðherrar og aðrir pólitíkusar þessa lands eru í raun ósakhæfir menn. Það er alveg sama hvað þeir gera af sér, hvernig þeir leika land og þjóð, þeir eiga að fá að sleppa með allt  - nema skömmina. Almenningur er ennþá fær um að sjá til þess að skömmin loði við þá sem til hennar hafa unnið !

En Geir var þó ekki sýknaður með öllu, hann var sakfelldur fyrir vanrækslu-atriði sem þykja myndu stór víðast hvar nema hér, en hinsvegar var hann ekki dæmdur til neinnar refsingar, ekki einu sinni skilorðsbundinnar.

Það er skrítið að sakfella mann en ákvarða honum enga refsingu ? Geir sjálfur benti réttilega á það misræmi sem í því fælist og víst er að slík réttarfarsfríðindi eru ekki viðhöfð þegar um venjulegt fólk er að ræða.

Það var líka séð til þess að maðurinn slyppi að mestu við kostnað af málinu, því ríkið á víst að taka þann kostnað til sín -  af mannúðarfullri hugulsemi.

Þó Sjálfstæðismenn hafi unnið að því manna mest að rýra gjafsóknarrétt venjulegs fólks, höfðu þeir margir hverjir miklar áhyggjur af því hvernig þetta mál myndi fara með fjárhag Geirs, en hann er náttúrulega ekki fjáður maður frekar en aðrir innstu koppar í búri Valhallar. En nú anda þeir hinir sömu líklega léttar þar sem Geir sleppur að mestu við útlát.

Samkvæmt því sem Geir heldur fram, hafa allir forsætisráðherrar Íslands brotið af sér í starfi á sama hátt og hann, allt frá 1918. Ég fæ ekki betur séð en að í þessum orðum hans felist stór ásökun í garð margra látinna manna !

Enginn þeirra hélt þó á málum með þeim hætti, að bankakerfið í landinu hryndi á vaktinni þeirra og setti í raun land og þjóð á hausinn ?

Sigurður Líndal benti réttilega á að hrunið væri ekki sambærilegt við nein áföll í þjóðfélagslegum skilningi í liðinni tíð og því væri ekki hægt að vera með slíkan samanburð. Og við megum heldur ekki gleyma því að þetta nýfrjálshyggju-bankakerfi sem hrundi svo fljótt, var beinlínis búið til af Geir Haarde og félögum hans nokkrum árum fyrir hrunið og afhent þeim aðilum sem fóru með það lóðbeint til andskotans. En að áliti hans og Davíðsklíkunnar, átti tilkoma þessara nýju banka að vera alveg sérstök blessun fyrir þjóðina, eins og þetta lið segir fjálglega um allt sem rænt er frá ríkinu og einkavætt !

Svo var sofið á öryggisvaktinni fram á síðustu stund og sagt að ekkert væri að óttast. En í framburði lykilvitna hefur þó komið fram að endalokin hefðu verið fyrirsjáanleg jafnvel árið 2005, og þá strax hefði þurft að byggja upp varnir !

Og samt sér maðurinn ekki að hann hafi neitt af sér brotið og talar bara um ofsóknir gegn sér og flokknum !

Svo þegar búið er að taka á honum með silkihönskum í dómskerfinu - af því að hann er náttúrulega ósakhæfur pólitíkus, þá verður hann fokreiður yfir að vera ekki sýknaður með öllu og þeytir frá sér illskeyttum umsögnum í fjölmiðlum  um menn og málefni, umsögnum sem gera ekkert nema skaða hann sjálfan.

Svona gerist bara þegar menn eru í banastuði í bananalýðveldi ?