Pýramídi á hvolfi !

Þjóðfélagsgerðin virðist stefna stöðugt í þá átt að storka lögmálum eðlisfræðinnar. Í stað þess að vera pýramídalagaður skapnaður á traustum grundvelli, sem efst státar af gildisbærum hyrningarsteini, er hún alltaf að verða meira og meira líkari pýramída á hvolfi. Undirstaðan veikist en yfirbyggingin þenst út, þeim fækkar sem vinna í framleiðslugreinunum en þeim fjölgar stöðugt sem hreiðra um sig ofar í pýramídanum öfuga í krafti menntunar og tröpputignar og ætla sér að lifa á arðinum af þeim verðmætum sem aðrir skapa. En það er ljóst að pýramídi á hvolfi heldur ekki jafnvægi til lengdar. Á einhverjum tímapunkti fellur hann vegna þess að þá er yfirþyngdin orðin undirstöðunni um megn !

Og hvað gerist þegar slíkur samfélagspýramídi í öfugri stöðu hrynur ? Það verða efnahagslegar þrengingar sem munu kippa allri velmegun áratugi til baka. Það skapast ástand sem tekur svo til eingöngu mið af hæfni einstaklingsins til að komast af. Það verður til veruleiki sem kallar á  „survival of the fittest !"

Þá bjarga engum gráður og titlar, þeir sem alltaf hafa verið skeindir af öðrum verða við slíkar aðstæður aumastir allra aumra, ófærir um alla lífsbaráttu !

Það verður grátur og gnístran tanna, vol og væl. Menn munu engjast sundur og saman af óbærilegri kvöl vegna glataðra hlunninda, grenja yfir horfinni dýrð og óttast þá framtíð sem tryggir þeim engin forréttindi nema síður sé !

Fall pýramída á hvolfi er refsing fyrir glórulaust ábyrgðarleysi, því ráðamenn geta ekki alltaf sagt um samfélag sem þeir hafa svikið „ það lafir meðan ég lifi, " ! Að því kemur að mælir syndanna er fylltur og og ekki er lengur hægt að ávísa vitleysu samtímans á vonlausa framtíð, framtíð sem þegar er búið að eyðileggja fyrir þeim sem hana koma til með að erfa og eiga. Er það þannig sem við ætlum að búa um mál og leggja þau í hendur barna okkar - næstu kynslóðar, þeirra sem eiga samkvæmt Guðs og manna lögum að erfa landið ?

Allir menn þurfa að vera sjálfum sér sem samkvæmastir og ráðamenn ekki síst. Að tala fjálglega um matarskatt í stjórnarandstöðu sem óafsakanlegan gjörning gegn þeim sem minnst hafa milli handanna, en ætla svo að leggja hann á í stjórnarstöðu er ekki að vera sjálfum sér samkvæmur. Sömuleiðis er það skynvillumál að byggja mál áfram á þeim grundvallar-misskilningi að samfélagsbyggingin geti verið pýramídi á hvolfi, fyrirbæri sem þenst út á æ minni undirstöðu !

Er kannski stefnt að því að leggja framleiðslugreinar þjóðfélagsins af sem slíkar, afnema allt atvinnulíf sem stendur undir nafni, og láta hvern og einn lifa á því að velta pappír milli handa sinna með þá hugsun eina í kolli að enginn vinni jafn mikilvægt starf ?

Sagt hefur verið, að til forna hafi pýramídar verið reistir eingöngu til að vera grafhýsi. Það er kannski ósannað mál hvort svo hafi verið í raun, en það er öruggt mál að pýramídi á hvolfi endar með því einu að vera ein allsherjar samfélagsgröf !