Leita í fréttum mbl.is

,,Að viðhalda þrælahaldi !”

 

Mikið lifandis ósköp eru ráðandi öfl í umræðu dagsins orðin merkt af kapitalisma og peningahyggju, Mammonsanda og græðgisvæðingu !

 

Fréttamiðlarnir bera því ljóst vitni hvernig komið er. Vegna yfirstandandi vinnudeilu þar sem verkafólk, sem níðst hefur verið á árum saman, er að reyna að fá kjör sín bætt, snúast fréttirnar um skaða starfsgreina af verkföllum og skaða hagkerfisins af þeim, skort á þjónustu sem veldur skaða á orðstír okkar erlendis, skaða Samtaka atvinnulífsins vegna verkfalla o.s.frv.o.s.frv. Varla orð um réttindi þeirra sem eru að berjast ?

 

Fréttaflutningurinn virðist allur vera þannig, að hann segir hvarvetna á milli línanna, að verkafólk sé að skaða Ísland, íslenska hagsmuni, íslenskt samfélag og áfram er síbylgjan í þeim fjandsamlega og falska dúr !

 

Eiga Samtök atvinnulífsins kannski alla þessa fréttamiðla, er það þessvegna sem fréttamenn eru svo miklir talsmenn þessara mjög svo rekstrarhagfræðilegu sjónarmiða, eða hvað veldur ?

 

Ég segi bara, ef ferðaþjónustan sem hefur skilað gífurlegum hagnaði undanfarin ár, ekki síst í ákveðna vasa, getur ekki þrifist, nema að sumir verði að starfa þar á þrælahaldskjörum, þá á hún ekki rétt á sér !

 

Ef ekki er hægt að byggja upp lífvænleg fyrirtæki í þessu samfélagi okkar nema með því að níðast á öðrum og ef ekki er hægt að bjóða fólki upp á mannsæmandi laun innan þeirra fyrir vinnu sína, eiga slík fyrirtæki ekki rétt á sér !

 

Sérhver starfsstöð sem vill byggja afkomu sína á þeirri mannfjandsamlegu hugmyndafræði græðginnar sem stendur fyrir dulbúnu þrælahaldi hérlendis sem og erlendis, á engan rétt á sér !

 

Aðeins í hugum þeirra sem löngu eru hættir að þekkja muninn á réttu og röngu, getur slík afstaða til mála viðhaldist og þar er meginorsökin peningagræðgi og auðsöfnunarhyggja þeirra sem sjá ekkert að því að níðast á öðrum. Það er reyndar þeirra eðli og art !

 

Slíkir hrægammar eru ekki á nokkurn hátt að byggja upp samfélög, þeir eru þvert á móti að rífa þau niður. Almenn velferð skiptir slíka aðila engu !

 

Sérgæðingarnir þrífast alltaf á því illa eins og púkinn á fjósbitanum og þeir þrífast á þrælahaldi bæði hérlendis og í öðrum löndum. Enginn vill vera þræll en margir sjá ekkert að því að vera þrælahaldarar. Það hugarfar sver sig í ættina niður í það neðsta !

 

En þrælahaldarar deyja líka og fara ekki með sitt illa fengna fé með sér þegar þeir fara í þá glötun sem bíður þeirra. En þeir taka hinsvegar með sér breytni sína sem mun þá innsigla eilífan dóm þeirra !

 

Það er í samræmi við öll eðlileg mannréttindi að fólk fái að heyja baráttu fyrir mannsæmandi lífskjörum og það er fólkið í Eflingu, VR og öðrum vakandi félögum innan verkalýðshreyfingarinnar að gera. Að taka fjandsamlega afstöðu gagnvart svo sjálfsögðum mannréttindum er aðeins lýsandi dæmi um ómanneskjulegt eðli þeirra sem þannig taka á málum !

 

Í slíkum tilfellum þarf yfirleitt ekki langt að fara til að skilja samhengið. Það er þá oftast einhver óhreinn hagsmunaþráður til staðar sem slævir heilbrigða dómgreind, rangsnýr öllum réttlætis sjónarmiðum og gerir það að verkum að manngildisvottorð viðkomandi aðila kemur út á núlli !

 

Dapurlegt er að upplifa slík sérgæsku viðhorf og afturförin sést oft best á því að afar og ömmur viðkomandi hafa verið virðingarvert verkafólk sem aldrei brást í baráttu liðinna ára !

 

Atvinnurekendur reyna nú að gera mikið úr því að forustufólk í félögum þeim sem nú eru að hefja verkfallsaðgerðir, hafi sýnt gleði yfir verkfallinu, en það sýnir einmitt algjöran skort þeirra á skilningi gagnvart því sem er í gangi og ósæmilegum vilja þeirra til að sverta andstæðinginn !

 

Það er fullkomlega eðlilegt að gleðjast yfir samstöðu í baráttu, gleðjast yfir því að loks sé komið að því að fólk sætti sig ekki lengur við arðránið og níðingsháttinn og rísi upp. Hliðstæða Búsáhaldabyltingar í kjaramálum er löngu tímabær fyrir þá sem alltaf hafa verið settir hjá !

 

Talsmenn atvinnurekenda reyna stöðugt að gera heilbrigð baráttuviðbrögð verkafólks tortryggileg og skiptir engu hvort þar talar karl eða kona. Græðgi er sannarlega ekki einskorðuð við karla í rekstri !

En þegar fólk rís upp, þýðir það einfaldlega að nóg er komið, og þá fer ótti um þá sem lengi hafa fitnað af því að kúga aðra !

 

Ef íslenskt samfélag getur ekki þrifist með heilbrigðum hætti, ef eina leiðin til að fólk geti lifað hér er að þrælka aðra, á íslenskt samfélag, eins og það er rekið, einfaldlega ekki rétt á sér. Þá er ekki hægt að verja tilverurétt þess með ærlegum rökum og þá er ekki hægt að segja “ Guð blessi Ísland “ því Guð blessar ekki samfélag sem þrífst á blóðsuguaðferðum og níðingshætti, Mammonshyggju og botnlausri peningagræðgi !

 

Það verður að bæta kjör þeirra sem búa við svo lakan kost að það er þjóðfélaginu til skammar. Þegar sumum er haldið frá öllum ávinningi erfiðis síns vegna sérgæsku annarra, skapar það ófrið og bölvun sem grefur undan öllu því sem gott er. Snúum af braut græðgi og hroka áður en kemur að syndagjöldunum. Það er of seint að iðrast eftir dauðann !


« Síðasta færsla | Næsta færsla »

Höfundur

Rúnar Kristjánsson
Höfundur er húsasmiður og býr á Skagaströnd.

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (29.3.): 7
  • Sl. sólarhring: 178
  • Sl. viku: 1037
  • Frá upphafi: 309929

Annað

  • Innlit í dag: 7
  • Innlit sl. viku: 910
  • Gestir í dag: 7
  • IP-tölur í dag: 7

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband