Leita í fréttum mbl.is

Bloggfærslur mánaðarins, október 2015

Að standa vörð um evrópska arfleifð !

Ég hef í allmörgum pistlum á þessari síðu varað við þeirri innflytjendastefnu sem hefur verið fylgt undanfarna áratugi í Evrópu – álfunni og öllu því sem hún hefur staðið fyrir til ófarnaðar. Ástæðan fyrir þeim varnaðarorðum er ósköp einföld, mér þykir vænt um svo ótalmargt í evrópskri menningu og sögu, enda af miklu góðu að taka þar, þó margt hafi að sjálfsögðu gerst og átt sér stað innan þeirra vébanda sem engum er sómi að.

En ef við ætlum að vernda evrópska arfleifð okkar verðum við að skapa henni lífsskilyrði til framtíðar. Það gerum við ekki með þeirri innflytjendastefnu sem fylgt hefur verið og stöndum reyndar þveröfugt að verki með henni.

Ég er samt sannfærður um það að yfirgnæfandi meirihluti manna, meðal allra þjóða Evrópu, vill halda fullri tryggð við menningu sína og þjóðleg gildi. Stjórnarstefnan víðast hvar er hinsvegar látin vinna gegn þessari tryggð, þessari hollustu við það sem okkar er. Það segir sig sjálft að þau markmið að varðveita arfleifð okkar munu eyðast út ef lönd Evrópu fyllast af fólki af öðru þjóðerni, annarri menningu og annarri trú. Við getum ekki ætlast til þess að það fólk hafi sömu sjónarmið og við gagnvart því sem okkar er.

Þetta aðkomufólk kemur til að njóta betri lífskjara meðal okkar en það vill hlynna að sínum gildum – jafnvel þó það sé komið til að búa í okkar löndum. Frá mannlegu sjónarmiði er það ekkert undarlegt. En þar verður seint til staðar sú tryggð og sú hollusta sem ég nefndi hér að framan. Staðreynd málsins er bara sú að það á ekki allt fólk samleið. Sumt er þess eðlis að það verður ekki sameinað !

Tökum til dæmis Sameinuðu þjóðirnar ! Af hverju er sú mikla stofnun - sem vakti svo miklar væntingar í upphafi - og átti að verða voldugt tæki í þágu heimsfriðar, sokkin niður í það að vera lítið annað en risavaxið skrifstofubákn og alheims-kjaftaklúbbur ? Það er ekki síst af því að hver vill fara sína leið !

Það er ógjörningur að sameina alla á einhverjum tilteknum forsendum. Einhver þarf að gefa þær forsendur og hver hefur vald til þess ? Jafnvel á svo göfugum forsendum sem þeim að tryggja frið í þessum heimi, er ekki hægt að skapa samstöðu allra því það hefur enginn þá sýn á friðarleið sem allir munu sætta sig við ? Það tókst ekki að byggja Babelsturninn á sínum tíma og það hefur ekki tekist að byggja Sameinuðu þjóðirnar upp á okkar tímum sem sameinaðar þjóðir. Til þess ber allt of mikið á milli í skoðunum manna og afstöðu til mála.

Mannkynið er ekki ein þjóð og getur aldrei orðið einhver alhliða samsteypa fjölmenningar ! Það er tálsýn sem ber að gjalda varhug við. Mannkynið samanstendur af þjóðum með mismunandi menningu og arfleifð og þar þarf að hlynna að öllu því sem gott er en standa í gegn því sem illt er. Upplýsing mannúðar þarf fyrst og fremst að sigrast á öllu því forkastanlega arðránsflóði sem enn í dag ræður og stjórnar mestu í þessari veröld okkar.

Eina leiðin til mannkynseiningar er að mati sumra að slétta allt út og byrja á nýjum grunni, afmá alla menningarsögu einstakra þjóða, öll þjóðernisleg viðmið og öll trúarbrögð. En sú leið myndi hinsvegar verða svo frek á fórnir að aldrei yrði nokkur samstaða um að fara hana, enda mun hún aldrei verða farin nema þá um skamma hríð og þá undir svikamerki Antikrists !

Þeir flóttamannastraumar sem nú flæða um Evrópu færa með sér mikla hættu fyrir þjóðir Evrópu. Það er ekki hægt að taka við slíkum straumum án þess að það sem fyrir er riðlist. Straumurinn er þegar orðinn of þungur!

Það verður því að nota herafla vestrænna þjóða til að stöðva stríðið í Sýrlandi sem fyrst og friða landið svo íbúar þess geti aftur snúið heim. Sömuleiðis þarf að leysa samskonar verkefni í Lýbíu þar sem fyrri aðgerðir hafa aðeins gert ástandið þar verra. Það þarf að gera fólki fært að dvelja í friði í sínum heimalöndum. Það er eina lausnin á flóttamannavandanum sem skapar ekki ný og verri vandamál þegar til lengdar er litið!

 

 

 


Hin glórulausa gauksungastefna !

Náttúran sýnir okkur mörg dæmi um sérgæsku, því dýrin eru ekki síður en maðurinn undir sérgæsku seld. Til dæmis eru öll rándýr meira og minna þar í flokki !

Gaukurinn er sérgæskufugl. Hann kemur úr eggi sem verpt hefur verið í annarra hreiður ! Kvenfuglinn tekur yfirleitt eitt eða tvö egg burt og setur sitt í staðinn. Það er trúlega ákveðið fyrirfram að smærri fuglar eigi í hlut, einhverjir sem hafa ekki vit á að verjast slíku framferði !

Eftir tólf sólarhringa er gauksunginn kominn á ról, hann er ekki kominn með sjón en eðlið segir honum hvað hann á að gera. Hann sparkar hinum eggjunum, eða ungum ef komnir eru, burt úr hreiðrinu. Hinir réttbornu ungar fá að fjúka því aðkomu-unginn þarf stöðugt meira lífsrými og hann þarf mat og ekki lítið af honum !

Fósturforeldrarnir verða síðan að keppast við að bera í heimtufrekan aðskota-ungann fæðu og fríðindi svo þeir eru stundum að niðurlotum komnir. Þeir ala önn fyrir röngum aðila á kostnað eigin afkvæma !

Hvað segir þetta okkur ? Hvað á þetta dæmi sammerkt með innflytjendastefnu Evrópu og Norðurlanda síðustu áratugina ? Hvað á að ala önn fyrir mörgum gauksungum á kostnað eigin barna, gauksungum sem verða aldrei annað en gauksungar, með það eðli að verpa í annarra hreiður og hirða annarra framfærslu til sín ?

Getum við ekki lært eitthvað af þessu ? Ætlum við að láta fara svona með okkur uns ekkert er eftir af því sem við höfum skapað til framfærslu okkar eigin afkvæma, uns allt er komið í hítina sem étur út allt sem hreiður okkar búa yfir ?

Tortímingarstefna hins öfugsnúna umburðarlyndis er þegar komin inn á dauðastrikið. Ef ekki verður farið að vinda ofan af vitleysunni endar það með því að öll áunnin velferð í löndum okkar verður að engu gerð. Til hvers eigum við að strita og starfa lífið út í gegn ef forustumenn þjóðar okkar ætla að vera í því að sturta sérhverjum þjóðfélagslegum ávinningi af því striti niður í innflytjendur og útlendinga ? Á það virkilega að vera hvatning fyrir okkur að sjá ávinninginn af erfiði okkar hverfa með þeim hætti ?

Af hverju lokar fólk augunum fyrir því sem er að gerast ? Skilur það ekki að það er verið að grafa undan því undirstöðu lífs þess og framtíðar og leggja hana öðrum í hendur ? Tökum eitt dæmi sem sýnir hvernig hlutirnir gerast.

Árið 1973 yfirgaf maður nokkur þorpið sitt í Pakistan og gerðist ólöglegur innflytjandi í Noregi. Yfirvöldin kusu að horfa framhjá því og leyfðu manninum að vera áfram í landinu. Eftir 5 ára starf í Noregi sótti maðurinn síðan konu sína og börn til Pakistan samkvæmt reglum sem settar höfðu verið um sameiningu nánustu fjölskyldumeðlima innflytjenda !

Maðurinn átti 10 börn í þorpinu sem hann kom frá. Hann kom með 10 börn til Noregs, en vegna þess að tveir synir hans voru eldri en 18 ára og höfðu því ekki rétt til að koma, töldust fulltíða, ættleiddi maðurinn tvo syni bróður síns og kom því með fulla tölu. Brátt kom svo að því að börn mannsins komust á hjónabandsaldur og þá var farið í að flytja inn maka frá Pakistan eins og jafnan er gert í svona tilfellum. Ekki norska maka, takk fyrir !

Ótrúlegt ferli þessa máls er rakið í bókinni Dýrmætast er frelsið eftir norsku blaðakonuna Hege Storhaug. Sumarið 2006 var umræddur innflytjandi sem kom ólöglega til Noregs 1973, en fékk þó að vera þar áfram fyrir sofandahátt stjórnvalda, búinn að umbreytast í 81 manns pakistanska stórfjölskyldu búsetta í Noregi. Og þetta dæmi er bara eitt af mörgum !

Ég hvet alla til að lesa og kynna sér bókina Dýrmætast er frelsið (Innflytjendastefna og afleiðingar hennar) og mynda sér eigin skoðanir á málunum út frá henni og öðrum rannsóknargögnum aðila sem reyna að fjalla um þessi mál út frá þeim staðreyndum sem fyrir liggja. Þetta eru mál sem snerta okkur öll, líf okkar og framtíðarheim barna okkar !

Gauksungarnir streyma inn í hreiðrin og yfirfylla þau. Stjórnvöld standa á haus við að mæta þörfum þeirra með efnahagslegri hjálp sem tekin er frá okkur sem teljumst eiga þessi hreiður. Og það sem gerir hreiðrin notaleg – framlag okkar í vinnu til velferðar – fer í stöðugt meiri mæli í hina heimtufreku nýju íbúa sem vilja taka sér forréttindastöðu á annarra þjóðarheimilum !

Og þess ber að geta, að manngerðir gauksungar hafa heldur enga hollustu til að bera gagnvart þeim sem fæða þá. Þeir gera bara meiri kröfur og ganga á lagið. Hættulegustu gauksungarnir í þessu ferli eru að mínu mati múslimar. Þeir munu seint aðhyllast okkar gildi og hatast reyndar við þau margir hverjir eins og dæmin sanna !

Múslimar hafa flutt með sér svokölluð heiðursmorð og kynfæralimlestingar og margháttaðan viðbjóð inn í samfélög okkar. Aðlögun þeirra að norrænum samfélögum - eftir áratuga undanlátssemi - er lítil sem engin og ætti að sýna hverjum heilvita manni, að gauksungastefnan er glórulaus vitleysa og ekkert nema tilræði við velferð norrænna þjóða !

Það er löngu kominn tími til að gera raunsæja og ærlega úttekt á þessum málum á öllum Norðurlöndunum og leggja niðurstöðurnar fram sem opinber gögn. Það er glæpsamleg afstaða af stjórnvöldum að reyna að fela hinar slæmu birtingarmyndir af því sem í gangi er. Heill viðkomandi þjóða er í húfi, framtíð okkar og velferð í okkar eigin löndum !

Burt með gauksungastefnuna !

 

 

 


Svik við Evrópu frá vinstri - og hægri !

Nýlega las ég fróðlegt efni á bloggi Halldórs Jónssonar, sem er kynnt sem þýðing á bréfi frá múslimakonu, en efnið var upphaflega sett fram á síðu Valdimars Jóhannessonar sem þýddi það. Það er reyndar skrítið að segja, að bréf þetta sé frá múslimakonu því það kemur skýrt fram að konan tilheyrir söfnuði kopta í Egyptalandi, sem hefur orðið fyrir alls konar ofsóknum og ágangi múslima þar í landi, eins og yfirleitt allt kristið fólk sem býr í löndum múslima hefur fengið að reyna.

Margt í umræddu bréfi er allrar athygli vert og sérstakt þótti mér að lesa í því um viðbrögð múslima í Egyptalandi við fréttunum af hryðjuverkaárásinni á tvíburaturnana 2001. Þá kom nefnilega nokkuð í ljós sem sýnir mynd sem oftast er reynt að loka á. Það varð almennur fagnaðardagur í landinu, ókeypis almenningssamgöngur, ókeypis matur á matsölustöðum, kvikmyndahús og skemmtigarðar með ókeypis aðgang, útvarpsrásir sendu stöðugt út sigursöngva o.s.frv. Þannig tóku 80 milljónir „hófsamra múslima“ í Egyptalandi fréttunum af hryðjuverki sem olli dauða 3000 almennra borgara í Bandaríkjunum !

Já, efni þessa bréfs býður vissulega upp á ákveðna heildarmynd af því sem er að gerast í þeim átökum sem yfir standa milli þeirra menningarheima sem mótast hafa á umliðnum öldum, annarsvegar af kristindómi og hinsvegar af Múhameðstrú. En það vill því miður býsna oft brenna við, að þegar fjallað er um stór mál í víðu samhengi, fer oft svo að sitthvað er látið fara með sem ekki er allskostar rétt, og tekur oft meira mið af persónulegum skoðunum en raunverulegri atburðarás. Ég vil af þeim sökum gera nokkrar athugasemdir við meðferð efnis í umræddu bréfi !

Fyrst er að nefna það, að ég mun seint neita því að vinstrisinnaðar hreyfingar hafi átt mikinn þátt í fjölmenningarstefnunni og því að sú arfavitlausa innflytjendastefna var tekin upp sem nú er að verða óleysanlegt vandamál í löndum Evrópu. Það er talað um í þessu bréfi sem hér er til umræðu að vinstri menn eigi þá nafngift með réttu í sambandi við þessi mál að vera nytsamir fávitar. Þeir eru kallaðir undansláttarmenn og staðhæft að þeir verði meðal fyrstu fórnarlamba islam. Síðan er sagt, „að sættast við illskuna er gunguskapur !“

Þarna er líklega verið að leika sér með hugtakið „fellow traveller“ sem oft hefur verið þýtt sem nytsamur sakleysingi, en í þessu tilfelli er talað um fávita, trúlega vegna þess að þýðandi hefur getað þjónað lund sinni með því að tengja þá umsögn til vinstri. En því miður fyrir lífshagsmuni evrópskra þjóða og menningu okkar sem álfuna byggjum er fávitahátt í þessum efnum miklu víðar að finna en til vinstri.

Staðreyndin er nefnilega sú, að staðan í þessum innflytjendamálum út um alla Evrópu væri að öllum líkindum töluvert betri ef hægri menn hefðu ekki gugnað og gert þar sinn sáttmála við illskuna af algjörum gunguskap. Samkvæmt sínum yfirlýstu forskriftum hefðu þeir átt að standa í gegn framgangi þessara mála, vera sjálfum sér samkvæmir og trúir sinni íhaldsstefnu. En það var nú eitthvað annað, þeir drógust með og voru að því leyti verri en vinstri menn að þeir gerðu það jafnvel gegn betri vitund !

Árið 1968 flutti breski íhaldsþingmaðurinn Enoch Powell „Rivers of Blood“ ræðu sína um innflytjendastefnu stjórnvalda í Bretlandi og gagnrýndi hana harkalega. Hvernig brást flokkur hans við ? Powell var vikið úr skuggaráðuneyti Edward Heaths og var sniðgenginn af valdaklíku flokksins eftir það. Samt var talið að um 74% íbúa Bretlands á þeim tíma hefðu verið Powell hjartanlega sammála og hver veit hvort Edward Heath hefði orðið forsætisráðherra Bretlands 1970 ef þessi ræða hefði ekki verið flutt. En Heath var gunga og þorði ekki að taka á innflytjendamálunum og því fór sem fór. Svipaða sögu er að segja um aðra leiðtoga hægri manna út um alla Evrópu. Þeir þorðu ekki að taka á þessum málum og hafa ekki þorað því fram á þennan dag. Ég sem er vinstri maður, harma það mjög að þeir skyldu ekki hafa þá manndáð í sér að vera í raun þeir varðmenn um gömul þjóðgildi sem þeir hafa þó alltaf talið sig vera. En þarna fannst mér sannast að það eina sem ég hef talið virðandi við þá var svikið þegar á reyndi !

Ekki er Angela Merkel vinstri maður og sem formaður CDU ætti hún líklega að standa fyrir annarri stefnu í innflytjendamálum en hæfði vinstri fávita. Boðskapur hennar um flóttamannakvóta og viðtöku múslima út um alla Evrópu er ljóslega til marks um það að ekki er við vinstri valdamenn eina að sakast varðandi varnarskortinn og sofandaháttinn á heimavígstöðvunum í álfunni. Og það er segin saga, að þegar vinstri menn og hægri menn fallast í faðma með eitthvað eru meiri líkur en minni á því að þá sé ekki gott í efni !

David Cameron formaður Íhaldsflokksins breska hefur margoft tekið það fram að hann sé hliðhollur inngöngu Tyrkja í Evrópusambandið. En strax árið 2002 lýsti hægrimaðurinn Valery Giscard d´Éstaigne, fyrrverandi forseti Frakklands, því yfir að ef Tyrkir fengju inngöngu í sambandið myndi það þýða endalok þess. Það er stórt bil á milli þessara manna í yfirlýsingum þó báðir teljist til hægri í stjórnmálum !

Sést af þessum dæmum að ýmsir valdamenn á hægri kanti evrópskra stjórnmála hafa ekki síður en vinstri menn brugðist mjög víða varðandi varnarhagsmuni Evrópu og þrætt sömu villugöturnar þar í innflytjendamálum af þrælslund gungunnar ! Og eins og ég sagði hér að framan, hafa þeir raunverulega svikið meira og verr en vinstri menn, því hefðu þeir fylgt stefnumiðum sínum frá fyrri tíð af hollustu, hefðu þeir verið viðspyrnumenn í þessum málum en ekki taglhnýtingar !

Að svo mæltu ætla ég ekki að fjalla frekar um þetta bréf eða auka óvinafagnað með því að hlúa að einhverjum ágreiningi varðandi efni þess. Hin raunverulegu málsefni eru nógu skýr og þörf á að sem flestir geri sér fulla grein fyrir því að evrópsk menning og saga er á örlagasnúningi í dag !

Spurning dagsins er því ósköp einföld: Ætlum við að gefa áfram allt eftir í hendur annarra aðila og það fjandsamlegra aðila, varðandi framtíð okkar og barna okkar, í heimsálfu þeirri sem er réttmætur arfshluti okkar ?

 

 

 

 

 


Um titilbúninga hégómans !

Íslenska samfélagið er alltaf að þróast og þroskast og taka framförum með einum eða öðrum hætti. Svo er að minnsta kosti sagt, bæði í fjölmiðlum og opinberum skýrslum og þá hlýtur það að vera rétt samkvæmt því sem flestir halda !

Við erum til dæmis nánast komin upp af hinu almenna starfsmanns-stigi. Nú eru eiginlega engir almennir starfsmenn til. Það eru allir sviðstjórar eða fulltrúar nú til dags ! Ef þú kemur til dæmis í fyrirtæki og þarft einhverja þjónustu er þér líklega bent á þjónustufulltrúann og ef hann gerir eitthvað fyrir þig bendir hann þér líklega á viðkomandi sviðsstjóra sem á að leysa þinn vanda !

En þá er kannski staðan sú að hann er í útréttingum í útlöndum og varamaður hans að sinna öðrum útréttingum hér heima. Menn verða að athuga það að annir hafa margfaldast í þessum fyrirtækjum og stofnunum sem eru fullar út í dyr af fulltrúum og sviðsstjórum sem erfitt er að ná í !

Af einhverjum undarlegum ástæðum getur því komið yfir þig í allri framþróuninni, – ekki síst við þær aðstæður sem lýst er hér að framan - einhver þrá til þess tíma þegar hægt var að tala við skilningsríkan almennan starfsmann og upplifa að hann gat leyst úr málum fyrir þig fljótt og vel !

Það var ekkert stjórastand eða fulltrúaflökt á starfsmönnum hér áður fyrr, enda voru þeir nokkuð langt frá því ego-standi sem nú virðist stuðla að því að býsna margir halda víst að þeir séu nafli alheimsins og langt fyrir ofan aðra að virðingu !

Hvernig skyldi annars standa á því að allir virðast núorðið þurfa að hafa einhvern sérbókaðan starfstitil sér til gildisauka ? Er manngildið einskisvirði annars ?

Ég veit náttúrulega um þá þrælmögnuðu titla-áráttu sem tíðkast meðal svokallaðra menntamanna, en það er líka fullt af fólki til í dag, sem ekki hefur farið í mikið meira en skylduskóla, en er komið í fulltrúastöður út um allt og sýnilega hreint ekki svo lítið hreykið af því !

Það er margt talið til framfara í dag og ekki síst sitthvað sem ýtir undir eigingirni og hroka, gælir við sjálf mannsins og hégómagirnd, spilar með fólk út í últra-ego ! En það eru ekki „orður og titlar“ eða „skraddarans pund“ sem skapar manngildið, það er hin sálarlega innrétting einstaklingsins sem gerir það og hún segir okkur líka sína sögu um eðli hans og art !

Þegar einhver goggunarraðar-geggjun kemst svona í fullan fulltrúagang, hleypur hégóminn upp í hæðir vitleysunnar, og að kalla slíkt framþróun er auðvitað ekkert annað en hlægileg fjarstæða. Mannsandinn er í slíkum tilvikum að fara aftur á bak en ekki áfram. Hann er í slíkri upphafningu sjálfsins að glata sínum eigin kjarna ! Þá eru menn komnir býsna langt frá gömlu vísdómsreglunni sem segir :   „Þekktu sjálfan þig og vertu trúr því góða sem í þér býr og ávaxtaðu það sem best í lífinu !“

Við þurfum að byggja líf okkar á öruggri undirstöðu. Hégómi er ekki undirstaða og kjarnalausir kerfistitlar bæta þar engu við. Það er manngildið sem þarf að rækta og hafa þarf í heiðri hin fornhelgu sannindi um samleið heilbrigðrar sálar og hrausts líkama. Ef umgerð hins daglega lífs er óheilbrigð og fölsk, leiðir það alla menn sem við slíkt kjósa að búa um endalausar villubrautir og gerir þá alls ófæra til að leiða aðrar manneskjur til góðra hluta !

Þegar fólk er komið á fullorðinsaldur ætti það að vera eðlileg, mannleg þroskakrafa til allra – í nafni samfélagsheilla - að ætlast til þess að menn leggi niður barnaskapinn og fari upp úr sandkassa hégómans og verði að liðtækum almennum starfsmönnum utan hans !

 


Hin kostulegu kaflaskil !

 

Fólk sem upplifir aldamót telur sig oftast standa á miklum tímamótum. Ungt fólk sem telur sig eiga lífið að mestu eftir í faðmi nýrrar aldar er yfirleitt fullt af væntingum um betri tíma. Þeir sem eldri eru hafa oft nokkurs að sakna frá fyrri tíð og hafa líklega hófstilltari sýn á framtíðina og vita sem er - að löngum hefur verið sagt „heimur versnandi fer !“

Þeir sem horfa til frama í pólitík vilja oft nýta sér tímatalsskil á þann hátt að tala fjálglega um nýja tíma, ný tækifæri o.s.frv. Það á sérstaklega við um fulltrúa nýtilkominna stjórnmálaafla sem oft eru þá í yngri kantinum og telja sig smellpassa í það hlutverk að vera fulltrúar hins ókomna, sem auðvitað á allt að vera betra en það sem er í dag.

Svo er þetta gamalkunna stef sem oft er líka tengt við tímatalsmörk, að ný hugsun sé komin fram í krafti stóraukinnar menntunar og hið upplýsta fólk samtímans muni ekki leggja sig niður við barbaríska hegðun í samskiptum manna og þjóða. Þessvegna hljóti allt í framtíðinni að verða á miklu háleitara og göfugra samskiptaplani en áður !

Það er til dæmis auðvelt að greina áherslur af slíku tagi hjá pírötum sem fjölyrða um tuttugustu og fyrstu öldina sem sé bara alveg nýr tími, tími sem bjóði upp á ótal tækifæri til að bæta allt og laga. Skilaboðin virðast vera : „Felið okkur völdin og við munum fara með ykkur í hnattreisu í hamingjuvagni tuttugustu og fyrstu aldarinnar !“

En hvað hefur breyst í raun og veru ? Eru menn til dæmis hættir að stunda hryðjuverk ? Sýndi 21. öldin um leið og hún rann upp einhverja breytingu til batnaðar í þeim efnum ? Hvað gerðist á fyrsta ári aldarinnar 11. september 2001 ? Sýndi atburðarásin þá einhver sérstök kaflaskil í hegðunarmynstri manna á þessari jörð ? Var ekki bara gengin áfram gömul skítaslóð og hvernig hefur það verið síðan ?

Af hverju eru menn að skilgreina tímatalsmark sem eingöngu er reikningslegt viðmið og gildislaust að öðru leyti, sem einhver stórmerkileg skil varðandi aðra hluti ? Það mætti jafnvel ímynda sér að það væri gert í sumum tilfellum í annarlegum tilgangi, til þess að ýta undir blekkingar og fá stuðning út á vaktar væntingar um þetta og hitt ?

Píratar og aðrir sem vilja lofsyngja 21. öldina í dag sem hinn nýja tíma, eru allir með rætur sínar í sögulegri mold tuttugustu aldarinnar og mótaðir að mestu leyti af viðhorfum hennar. Þó að þeir vilji vera postular og spámenn nýrrar aldar eru þeir ekki að innviðum til hæfir til þess hlutverks. Enda er sem fyrr segir ekki um neitt raunhæft að ræða í þeim efnum. Engar stefnubreytingar í meginefnum fylgdu aldaskiptunum, sömu gömlu feigðargöturnar eru gengnar enn í dag !

Einhvernveginn er það líka svo að erfitt er að bera traust til þeirra sem koma fram með þeim hætti að þeir þykjast sápuþvegnir af öllu sem býr í því liðna og boða hreina framtíð ! Blekkingar eru aldrei hlutur sem gengur til lengdar og þessi rúmi áratugur sem liðinn er af 21. öldinni ætti að geta sýnt flestum að veröldin er enn sami, gamli spillti heimurinn og Obama og Putin og aðrir núverandi valdhafar eru skilgetin afkvæmi þess ástands sem byggir allt sitt á sömu spilltu vinnubrögðunum og voru í gildi fyrir síðustu aldamót.

In fact,nothing have changed !

 

 


Höfundur

Rúnar Kristjánsson
Höfundur er húsasmiður og býr á Skagaströnd.

Eldri færslur

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (28.3.): 156
  • Sl. sólarhring: 342
  • Sl. viku: 1177
  • Frá upphafi: 309871

Annað

  • Innlit í dag: 143
  • Innlit sl. viku: 1009
  • Gestir í dag: 143
  • IP-tölur í dag: 142

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband