Er kjarnorkuvetur framundan ?

 

 

Nú fer að líða að hausti og síðan vetri. Sá vetur verður trúlega kaldur víða í Vestur-Evrópu, en þau Nató dáleiddu stjórnvöld sem þar eru, mega sjálfum sér um kenna. Þau trúðu lygum vestrænna fréttastofa um að Rússar væru veikir fyrir, ættu engin vopn og herinn væri í afleitu standi, efnahagurinn bágborinn o.s.frv. !

 

Sannleikurinn er hinsvegar sá að Rússland hefur verið að eflast með hverjum degi, vopnaframleiðsla í ótal verksmiðjum sem stóðu áður auðar, er orðin eins og á stórstyrjaldartímum. Rússa skortir ekki vopn og þeir hafa allt sem þarf til að framleiða þau. Efnahagsþvinganir Vestur-landa gegn Rússum hafa snúist í algera andstæðu sína og fyrst og fremst skaðað þau sjálf !

 

Heimurinn virðist að mestu með Rússum, fyrir utan Bandaríkin og Vestur-evrópsku fylgiríkin. Athyglisvert er að öll gömlu nýlendu-kúgararíkin þjappa sér saman undir forustu Bandaríkjanna. Líkur sækir líkan heim. Nánast öll ríki Afríku virðast vera hlynnt Rússum og líklega stór hluti af Suður-Ameríku. En allt mun þetta skýrast betur á komandi mánuðum þrátt fyrir allt lygafárið sem í gangi er. Sannleikurinn mun koma í ljós !

 

Iðnaðarparadísin Þýskaland virðist nú vera að nálgast mikla efnahagslægð. Það skaðar sjálft sig stórlega á efnahags-stefnunni gagnvart Rússlandi, sem er neydd upp á það af Bandaríkjunum og Nató. Norðurlöndin öll eru undir pólitísku stjórnvaldi sem leitt er meira og minna af heilaþvegnu krata-liði, eins og nánast öll Vestur-Evrópa, sem hefur sökkt sjálfri sér í stjórnleysi fjölmenningarmála og hreinnar vitleysu !

 

Hin kratísku stjórnvöld á Norðurlöndunum eru sem fyrr svínbundin á Natóklafann og geta ekki hugsað frjálsa hugsun og vita varla lengur hvað það er. Þau þegja bara og hlýða. Ísland hefði líklega betur notað þessar 4500 milljónir sem það hefur látið í Úkraínu-seiðketil Nató í að byggja upp ónýta innviði hér, en forgangurinn er annar. Ísland er afgangsstærð hjá liðónýtum stjórnvöldum þessa lands okkar. Velferð lands og lýðs er á förum vegna gagnsleysis þeirra og himinhrópandi vesalmennsku sem sýnir sig í nánast öllu !

 

En við erum líklega að horfa upp á byrjunina að efnahagshruni bandaríska heimsveldisins. Heimsvaldastefna þeirra er að syngja sitt síðasta og nýtt fyrir-komulag heimsmála er í uppsiglingu. Heimurinn hefur fengið sig fullsaddan á yfirgangi Kanans, enda löngu mál til komið. Ekkert ríki á og má fá að hegða sér eins og Bandaríkin hafa gert !

 

Bræðravígin í Úkraínu hafa verið keyrð upp með linnulausri ýtni og áreiti af hálfu Vesturveldanna og allar fréttastöðvar reyna enn að básúna lygasönginn um slæma stöðu Rússa. En Rússar verða ekki með orðum vegnir frekar en í Seinni heims-styrjöldinni !

 

Vesturveldin höfðu fullvissað Kiev-stjórnina um að þau myndu vopna her Úkraínu og tryggja honum sigur. Komið var í veg fyrir gerða samninga við Rússa og Úkrar stóðu ekki við undirskriftir sínar vegna þrýstings frá Nató. En vopna-birgðirnar miklu að vestan hafa ekki dugað og hátæknigræjurnar skilað sér illa. Töfravopnin frá Könum, Bretum og Þjóðverjum hafa hreint ekki staðið undir væntingum og vonbrigði ráðamanna á Vesturlöndum og í Úkraínu eru gríðarleg. Sumir fara því kannski að flýja í villurnar sínar vestur í heimi ?

 

Sumarsóknin mikla og margauglýsta hjá her Úkraínu hefur fjarað út. Hún náði reyndar aldrei að gera sig. Líklega hafa 350 þúsund Úkraínumenn fallið og í kringum 40 þúsund Rússar. Annars veit enginn nákvæmar tölur í þeim efnum því sláturhúsin gefa þær ekki upp þó menn fylli út áróðurs-dálkana þeim mun betur !

 

En eitthvað gengur nú verr með lygaáróðurinn, þó fréttastofur á Vestur-löndum reyni að vera kokhraustar. Eitthvað verður jafnan að virðast styðja lygar, en fátt gerir það í Úkraínumálunum. Jafnvel Pólverjum líst ekki lengur á blikuna, en þeir hafa barist með her Úkraínu í átökunum og þegar misst nokkur þúsund hermenn. Leynistríð Nató eru sem löngum fyrr með ýmsu móti háð !

 

Staðreyndir mála eru samt að mestu ljósar. Rússland verður ekki sigrað með stríði. Kjarnorkuvopn landsins munu sjá til þess og hátæknivopn Rússa, sem í sumum tilfellum eru betri en þau sem Bandaríkin hafa yfir að ráða. Úkraínskir hermenn eru ekki lengur fyrir hendi sem Selensky-valið fallbyssufóður, ætlað til fórnar á stríðsaltari Nató. Þeir eru annaðhvort dauðir, særðir eða flúnir !

 

Blóðfórnirnar hafa verið ofboðslegar. Rússar sögðu strax í fullri alvöru í byrjun ógæfuferlisins, að ef það yrði þrengt að þeim, yrðu þeir til í allt. Síðan hefur stöðugt verið reynt að þrengja að þeim og þeir brugðist hart við. Aðvörun þeirra var ekki sinnt og ekki staðið við gerða samninga. Draumur vesturveldanna um einhverskonar hrun Rússlands hefur breyst í martröð, rétt eina ferðina enn !

 

Nytsamir sakleysingjar á Vesturlöndum sitja þó enn fyrir framan sjónvarpstækin sín og bölva Pútín í gríð og erg. Allt væri að þeirra mati í himnalagi í heiminum ef það væri ekki þessi ómögulegi, hábölvaði Rússi,Vladimir Pútín. Það er öllu minna talað um Mr. Biden í Washington sem orsakavald, enda er hann þegar hálfur út úr heiminum og elliær í meira lagi !

 

Á Vesturlöndum er Pútín sagður verri en Hitler, en hverjir vöktu Hitler upp til að hann gengi frá Rússum og hverjir voru það sem fyrst og fremst gengu frá Hitler ? Pútín er sjálfsagt engu betri en aðrir valdamenn í austri og vestri, en að halda að hann ráði öllu í Rússlandi og víðar er að gera manninn miklu stærri en hann er.

 

Það er hinsvegar mikil valdabarátta í gangi milli Bandaríkjanna og Rússlands, uppvakin af Nató, og framvinda mála fer þar að stjórna sér sjálf og kann því að leiða til þess að öllu ljúki í þessum heimi senn hvað líður !

 

Staðan er einfaldlega sú að meiriháttar kjarnorkustyrjöld getur skollið á fyrir-varalítið og þessi heimur okkur fer þá sem fyrr segir líklega endanlega til helvítis. Menn og djöflar hafa sosum lengi verið að reyna að koma honum þangað með ýmsu móti !

 

Skyldi sú niðurstaða annars vera svo mikill skaði í ljósi þess hvernig menn hegða sér og hafa alltaf hegðað sér á þessari syndum spilltu jörð, þar sem mikið til saklausu blóði er stöðugt úthellt, öllum jarðarbúum til ólýsanlegrar og eilífrar skammar ?