Það hefur alltaf verið vitlaust gefið !

 

 

Nokkuð kaldhæðnislegt er að horfa upp á Vestur-Evrópuríkin halda hvern fundinn af öðrum og birta stórar yfirlýsingar gegn Rússum án þess að hafa nokkra raunhæfa getu til að framfylgja þeim eða sanna móðursýkislegar ásakanir sínar. Án Banda-ríkjanna eru þau eins og olnbogabörn á flækingi, á hjara öryggisleysis og óvissu, í villuráfandi vandræðagangi. Þau skilja heldur ekki af hverju Bandaríkin geta ekki lengur haldið þeim uppi hernaðarlega og gert þeim áfram kleyft að keppa við þau efnahagslega um markaðsvöld í skjóli þeirra. Þannig verður útkoma ofeldis alla jafna, að þeir sem búa við það verða að sívælandi aumingjum !

 

Bandarísk stjórnvöld virðast hinsvegar vera farin að skilja það, að Vestur-Evrópa hefur allt of lengi fengið að skáka í skjóli þeirra og yfirleitt kostað þar litlu sem engu til. Margir bandarískir þunga-vigtarmenn í stjórnmálum og viðskiptum vilja því breyta þeirri stöðu og neita framvegis að borga reikninga gömlu nýlendu-níðingaríkjanna í varnarmálum og öðru. Margt er að breytast í veröldinni og öll valdahlutföll gera sig upp á nýtt þegar stórveldi eins og Bandaríkin, sem hefur ruðst áfram í áratugi og yfirgengið alla aðra, fer að missa tökin. Þessvegna hljóta flestir að finna fyrir því að heimurinn er ekki lengur eins og hann var. Hann er ekki lengur einpóla bandarískur heimur sem betur fer. Nýr heimur er að taka á sig form og vonandi verður hann mannkynsvænni en hinn !

 

Það gleymist oft í fögnuði þeirra sem eru oftast hugsunarlega nátengdir fasisma, að Sovétríkin voru ekki lögð niður með þeim hætti að þau yrðu að engu. Hernaðarleg geta þeirra er kjarninn í þeim styrk sem Rússland hefur í dag sem öflugasta kjarn-orkuveldi heims og kjarnorkuvopnabúr þeirra er nógu öflugt til að tryggja varnir ríkisins gegn hvaða óvini sem er. Auk þess er stuðningur við Rússa miklu útbreiddari utan Evrópu en almennt er viðurkennt í hinum gjörspilltu fjölmiðlum gömlu spillingarálfunnar !

 

Hin geðveikislegu neyðaróp Vestur-Evrópu-ríkjanna og ESB um að það verði að stöðva Rússa í Úkraínu, eru fyrst og fremst ætluð eyrum Bandaríkjamanna, en nú eiga þeir bara nóg með að greiða úr eigin vanda, enda er bandaríska ríkið báglega rekið og má sannarlega muna sinn fífil fegri. Bandarísku auðhringarnir hafa arðrænt sitt eigið ríki af fyllstu græðgi, og ekki síst vegna þess er það orðið stórskuldugt og óhófsævi þess að verða liðin tíð !

 

Varðandi stríðið í Úkraínu, verð ég að segja að mér finnst Páll ofurbloggari einfalda hlutina nokkuð mikið með því að gera lítið úr Rússum fyrir það hvað úkraínska fasistastjórnin standi í þeim. Sú stjórn væri trúlega löngu fallin ef hún væri ein um hituna í Garðaríki. Gífurlegur fjárausturinn frá Vesturveldunum til Kiev og stöðugar vopnasendingarnar, hafa haldið lífinu í fasistastjórninni þar hingað til og ekkert annað. Rússar eru þar með þegar komnir í stríð við Vesturveldin og þeir vita það vel og búa sig sem best undir það sem koma skal og hafa sagt að þeir séu til í allt !

 

Stórauðugt ríki eins og Noregur dælir milljörðum dollara linnulaust til Úkraínu, svo að jafnvel hástéttarleg lífskjörin í kratalandinu alræmda geta jafnvel farið að rýrna hvað úr hverju. Þetta fyrrum virta friðarríki virðist nú orðið eitt blóð-þyrstasta ríki Evrópu, undir forustu heilaþveginna Natóhauka, enda virðist vegur lands og þjóðar stórlega hafa breyst til hins verra fyrir tilverknað slíkra manna og er illt til þess að vita !

 

Enginn þarf að efast um, að ríki eins og Kína og Indland fylgjast vel með því hvernig málum vindur fram í Úkraínu. Brics ríkja-samsteypan gerir það vafalaust ekki síður á heildina litið. Forræði Vestur-landa í heimsmálunum er reyndar nánast úr sögunni sem slíkt og því ber að fagna. Það er löngu kominn tími til að aðrar hendur taki þar um tauma og fái sitt tækifæri til að koma lagi á heiminn. Engin von er til þess að Vesturveldin geri það héðan af !

 

Gömlu níðingaríkin Bretland og Frakkland eru sem sjá má tæpast lengur nein stórveldi, enda hafa þau síðustu áratugina haldið sig alfarið í skjóli Bandaríkjanna. Forustumenn þeirra hafa stöðugt orðið minni og ómerkilegri bógar, eins og Macron og Starmer sanna best með sinni framgöngu. Og Þýskaland er í litlu skárri málum þó það sé nokkru fjölmennara ríki, en þar koma heldur engir frambærilegir leiðtogar lengur á sviðið. Og ESB er ekkert nema deyjandi arðráns-skrímsli, þó valdamenn á Íslandi – sumir hverjir - haldi annað í blindri ofstækishyggju veraldar sem var !

 

Bandaríkin eru á leiðinni niður af hátindi valdsins, Kínverjar eru líklega að klífa á þann tind. Vestur-Evrópa er sennilega á leiðinni að verða einhverskonar kot-rassgat, uppi á jökuldal evrópskar afdala-mennsku, langt frá miðpunkti valdsins sem færast mun talsvert austar og jafnframt frá öllum helstu kjötkötlum framtíðar-málanna. Það er að segja, ef boðið verður upp á einhverja framtíð fyrir mannfólkið á þessari jarðarkringlu, sem mikið vafamál er sennilega að það eigi skilið úr því sem komið er !

 

Ranglætis-ráðsmennska Vesturveldanna í málefnum heimsins er að líða að lokum og því ber að fagna sem fyrr segir. Hin nýja gjöf í málefnum heimsins verði til að styrkja öll milliríkjaviðskipti á jafn-ræðisgrundvelli í friðarþágu mannkyns-heildarinnar. Sérhver ærleg manneskja ætti því að óska þess innilega, að sá samvirki, fjölpólaheimur sem virðist að stefnt, reynist vel. Vonandi kemur hann til með að bjóða þjóðum heims betri lífskjör og það í sannari veruleika en Vesturlönd gerðu, meðan þau höfðu völdin til hinnar ráðandi stöðu, sem þau misnotuðu hinsvegar alla tíð með herfilegum og skammarlegum hætti !