Viðnámsvísur til Eflingar verkalýðnum !

 

 

Hart er líf í heimi þessum,

hrannast bölsins þrumuský.

Hrokast upp frá Mammons messum

meingerðanna helstu þý !

 

Enn sem fyrr er yfirgangur

auðmanna gegn fólki til.

Misrétti sem eykur angur

og hin verstu reikningsskil !

 

Samtök mörg í Satans klíku

sýna hvernig hugsað er.

Auðvaldsbölvun Ameríku

allt of mörgu ræður hér !

 

Eigum við að una kjörum

eins og þrælar hverja stund,

hlýða, þegja, hanga í snörum,

hungraðir við lokuð sund ?

 

Lifa undir oki og klafa

ánauðug í skuldakví.

Nei, við skulum heldur hafa

hug til þess að verjast því !

 

Rísum upp gegn öllu slíku,

ævinlega á lífsins ferð.

Auðvaldsbölvun Ameríku

útlæg verði héðan gerð !

 

Brjótum alla bölsins hlekki,

byggjum líf á rétti enn.

Látum samtök Satans ekki

svínbeygja hér frjálsa menn !

                               (RK)

 

 

Kúgunaraðferðir SA !

 

 

 

Það kom nokkuð fljótt í ljós hvaða aðferð atvinnurekendur höfðu markað sér í haust í aðdraganda samninga. Að einbeita sér að því að vinna þá verkalýðsleiðtoga sem taldir voru talhlýðnir og tækifæris-sinnaðir í eðli sínu, til fylgis við framsett atriði og ná þannig með hjálp þeirra að setja þá sem fastari voru fyrir í þá stöðu að neyðast til að vera með !

 

Þessi fyrirfram gerða áætlun virðist hafa gengið upp gagnvart öllum leiðandi öflum í verkalýðshreyfingunni nema Eflingu !

 

Margir urðu þó vonbetri um samningsgerð þegar aftur var farið að talast við rétt undir Þorralokin og menn töldu að Halldór Benjamín hefði verið sendur heim undir því fororði að hann væri veikur. Var þá kveðið af mikilli bjartsýni :

 

Margt vill næra kulda keim

kringum fundarsetur,

en fyrst þeir sendu Halldór heim

hlýtur að ganga betur !

 

En því miður löguðust viðhorf lítið hjá SA og virtist staðan bara verða eins og segir í gömlum húnvetnskum brag ,,þá kom annar asni í bæinn !“ Svo allar vonir um að aðilar næðu saman voru fljótlega gerðar að engu. Harðlínustefnu SA varð ekki haggað !

 

Það er líka stórundarleg framkoma í samningaviðræðum að  annar höfuðaðili málanna skuli, eins og segir hér að framan, setja fram einhvern ramma sem verkalýðsfélögin verða að máta sig innan í, annars verði ekkert af samningum. Þar er talað niður til viðsemjenda og menn ættu auðvitað að hafa vit á því að snúast gegn slíkum hroka af alefli !

 

Þetta vinnulag hjá SA er ekkert nema kúgunarferli og sannarlega væru almenn mannréttindi á Íslandi ekki komin langt ef verkalýðshreyfingin hefði látið bjóða sér slíkt á árum áður !

 

Má glögglega sjá hver afturförin er á framgöngu hreyfingarinnar gagnvart þessum mjög svo ögrandi vinnu-brögðum atvinnurekenda í dag. Það hafa sumir greinilega lítið sem ekkert lært á síðustu hundrað árunum !

 

Þeir sem fólkið kjósa að kúga

kynna sig með gömlum hætti.

Blóð úr æðum ætla að sjúga

uns þeir stjórna hjartaslætti !

 

Svo bætist við samningsmála-deilurnar hin óskemmtilega glíma við ýmiskonar svikræði sem hafa sprottið fram. Löngum vilja einhverjar aukapersónur trana sér fram á sviðið í slíkum deilumálum til að reyna að gera sér mat úr aðstæðum og koma sjálfum sér á framfæri !

 

Oftast eru þá einhverjir aðrir á bak við það pot sem forðast að vera sýnilegir. Öll slík vinnubrögð eru auðvitað merkt óheilindum í bak og fyrir og gera ekkert nema illt verra !

 

Slík tækifærisómennska er í alla staði fyrirlitleg og algerlega andstæð þeim anda einingar sem þarf að vera til staðar þegar á hólminn er komið !

 

Verkalýðshreyfingin hefur oft þurft að glíma við slíka uppvakninga óheilla og sundrungar sem hafa jafnan verið taldir, að meira eða minna leyti, til sendinga frá hinum andstæðu öflum. Sumir eru hinsvegar ekki trúnaðarmenn þó þeir haldi það, og kjósa jafnvel að vinna gegn þeim skyldum sem þeir eru kosnir til að gegna !

 

Slíkir aðilar eru ekki þeim vanda vaxnir að starfa fyrir heildar-hagsmuni fólks og ættu að sjá sóma sinn í að koma hvergi að slíkum málum. En sóma-tilfinning er víst ekki öllum gefin !

 

Nógu erfið getur barátta launþega verið við það kolsvarta afturhald atvinnu-rekenda sem nú hefur afhjúpað sig, þó það séu ekki alltaf einhverjir tilbúnir með morðkutana að baki fólks, en það virðast hinsvegar alltaf vera einhverjir sem hika ekki við að koma fram sem júdasar gagnvart eigin félögum !

 

En það er ljóst að launþegar landsins verða nú að sameinast og verjast yfirgangi SA, annars er öll staða þeirra og þar með almannaheill í hættu fyrir auknum fasisma-tilburðum hinnar mjög svo óþjóðlegu auð-stéttar í landinu !

 

Stöndum nú öll með Eflingu

gegn árásarbylgjum helsis,

sem stefna að kúgun og keflingu

og kyrkingu mannlegs frelsis !

 

 

 

,,Öllu skal fórnað á altari Nató !!!”

 

 

Sagt er að foreldrar í Reykjavík séu æfir yfir því hvað æfingagjöld barna þeirra sem stunda íþróttir hafa hækkað mikið að undanförnu. Hvaða nöldur er þetta eiginlega ? Veit fólk ekki að það kostar að taka í arma sína 45 milljón manna þjóð utan úr Evrópu ?

 

Það hefur brotist út stríð í Evrópu sem við erum að hluta til ábyrg fyrir af því að við erum í hernaðarbandalagi. Það kostar auðvitað að vera í slíku samtryggingarstarfi. Þessvegna höfum við tekið á móti á þriðja þúsund manns frá þessu átakasvæði og einn Nató-ráðherrann okkar hefur rétt aðilum þar nær hálfan milljarð króna yfir borðið af þjóðarhýrunni !!!

 

Svo á að virkja stórlaskað heilbrigðiskerfið okkar til að taka á móti særðu fólki, líklega hermönnum, frá Úkraínu. Eitthvað kemur það til með að kosta, en skiptir það annars nokkru máli þar sem við erum svo óskaplega rrrrríííííkkkk !!!

 

Það skiptir auðvitað engu í þessu sambandi þó ýmis kostnaður hækki hér innanlands. Fólk verður bara að hætta þessu röfli og borga Nató-skattinn sinn með ábyrgð og festu. Það gerir hún Kata með bros á vör, en reyndar græddi hún svo vel á verðlauna-glæpasögunni sinni að hún er aflögufær !!!

 

En jafnvel þeir sem þykjast ekki aflögufærir, þeir sem eru að röfla og skapa leiðindi, verða að skilja að þeir verða að fórna einhverju fyrir samstöðu vestrænna þjóða, fyrir hin algóðu gildi, í nafni hins heilaga heimsfriðarbandalags Nató !!!

 

Aldrei hefur setið að völdum á Íslandi ríkisstjórn sem þekkir jafn vel Nató-skyldur sínar og ríkisstjórn Kötu Kobbadóttur. Og ekki síst þessvegna verða landsmenn skilyrðislaust að fylgja þar í kjölfarið. Kata og Bjarni geta svo sagt okkur hvað við eigum og verðum að gera. Sérstaklega þó Bjarni, hann getur áreiðanlega talað fyrir munn allra landsmanna, eins og Davíð og Halldór gerðu hér um árið framhjá utanríkismálanefnd. Bjarni færi létt með það viðvik, alveg eins og hann talar í flestum málum glaðbeittur út um hægra munnvikið fyrir hana Kötu sína !!!

 

Það þýðir ekki neitt að vera að tuða um íslensk sérmál við þær aðstæður sem nú ráða. Við þurfum núna að standa saman öll sem eitt, nema náttúrulega alls ekki í málum Eflingar, en að öðru leyti. Heiður okkar, hvað sem það kann nú að vera, er í veði. Það segir yfirstjórn Nató og ráðherrar hennar hér !!!

 

Skítt með heilbrigðiskerfið, skítt með skólakerfið, skítt með vegakerfið og skítt með ríkiskerfið. Skítt með öll kerfin í landinu nema kvótakerfið. Það eitt er líka í algerlega réttum höndum og við getum áreiðanlega fengið Nató-stimpil upp á það !!!

 

Nató-kerfið er forgangsmál fyrir skyldur Íslendinga og það verður að fá sitt, þó það komi niður á öllu hinu. Skítt með þá miklu fórn, sem er í raun lítilvæg, þegar hún er lögð á altari hinnar heilögu varnarskyldu sem hlýtur að hvíla á herðum allra stríðsbandalagsþjóða og ráðamanna þeirra sem eru auðvitað um leið öruggustu og bestu ábyrgðarfulltrúar heims-friðarins !!!

 

Góðir og gegnir íslenskir rétthugsunarmenn ættu nú auðvitað að taka höndum saman um að fara sem sjálfboðaliðar til Úkraínu og berjast þar fyrir hinu mikla málefni Nató, hinum þrælvopnaða heims-friði. Það hljóta að vera stórir hópar manna í landinu tilbúnir að fara í þann björgunarleiðangur !!!

 

Það er varla annað en sjálfsögð skylda, þar sem við Íslendingar, borgarar í stærsta smáríki veraldar, erum orðnir ábyrgir fyrir heims-friðnum. Menn geta tekið með sér í líkamlegt nesti hangikjöt og svið og í andlegt nesti - að sjálfsögðu verðlauna-glæpasöguna hennar Kötu !!!

 

( Aths : Þetta er að sjálfsögðu öfugmæla-pistill. En hann tekur þó mið af því áróðursefni sem haldið er að okkur, um leið og okkur er sagt milli lína í öllum fréttum að við eigum ekki að vera að hugsa. Það verði auðvitað gert fyrir okkur,  en þó ekki ókeypis !)

 

 

 

Stöndum í öllu gegn mannfyrirlitningu og þrælahaldi í landinu okkar !

 

Undarlegt er mannfólkið og aldrei verður það ómerkilegra en þegar það berst fyrir sérhagsmunum þess forréttindaliðs sem vill níða alla almannaheill niður í þessu landi !

 

Við þurfum ekki að sækja dæmin í þessum efnum til annarra landa. Þau blasa í allri andstyggð sinni við augum okkar í okkar eigin landi. Við getum séð hérlendis í nöktum veruleika mannfyrirlitninguna og virðingar-leysið sem fjármagns-elítan í hroka sínum sýnir þeim sem þurfa mest að strita og lægst hafa launin !

 

Þegar einhverjum þjóðfélagshóp er þannig vísað frá samfélags-borðinu og sagt að þegja og vinna sína vinnu, er eina leiðin fyrir hann að segja sig frá samfélags-sáttmálanum og svara í nafni verkalýðslegrar samstöðu : ,,Þá skuluð þið halda hlutunum gangandi án okkar. Við erum frjálst fólk en ekki þrælar” !

 

Og ef við Íslendingar sem frjálst fólk ætlum að líða þrælahald í okkar samfélagi, þá er okkur sannarlega aftur farið og fyrir þá sem það gera, er það hentast að fara að hyggja að beininu undir borðinu sem fleygt var í hundana og sagt er enn að sé í boði og ekki meira !

 

Ég velti því fyrir mér hvar þjóðin mín sé stödd í skilningi sínum á íslensku máli ? Miðlunar-tillaga er framsett málamiðlun sem fer bil beggja í því skyni að sætta deiluaðila. Svokölluð miðlunar-tillaga ríkissáttasemjara, er hinsvegar eins og fram hefur komið, nánast eftirrit af viðhorfum SA og hefur þannig ekkert gildi !

 

Það segir sig sjálft að slíkt er engin miðlunar-tillaga og fráleitt að ætla Eflingar-félögum að greiða atkvæði um þá skítlegu skenkingu í gegnum ríkissáttasemjara frá SA. Sú nálgun mála er tilræði við allt heilbrigt verkalýðsstarf og yfirgangurinn sem þar er sýndur er óboðlegur með öllu !

 

Ríkissáttasemjari virðist samt sem áður furðu lostinn yfir því að hann sé búinn að fyrirgera trausti Eflingar ? Við hverju bjóst maðurinn eiginlega ? Það er augljóst að honum verður aldrei treyst framar eftir framgöngu hans í þessu máli. Í því hefur hann að margra mati fremur komið fram sem ríkissáttakremjari. Svokölluð miðlunar-tillaga hans verður líklega er fram líða stundir sögulegt plagg sem víti til varnaðar !

 

Verkalýðshreyfingin má ekki láta kúga sig undir forræði SA. Menn sem eru í forustu fyrir einstök verkalýðsfélög eða sambönd og hafa gert sig bera að óheilindum við málstað launafólks, eiga að segja af sér og skammast burt. Þeir hafa ekkert gott fram að færa og verkalýðshugsun þeirra er sjálfhverf og rotin að rótum !

 

Þegar slíkir gæsalappa verkalýðsforingjar koma fram með skilaboðin frá SA, um að það sé ekki meira í boði, eru þeir að afhjúpa hverskonar menn þeir eru. Það hefur aldrei verið neitt í boði af hálfu atvinnurekenda. Allar launabætur hefur jafnan þurft að sækja með harðfylgi, með stöðugri baráttu vökumanna fyrir málstaðnum og ekki síst verkföllum !

 

Þeir sem starfa á gólfinu eru undirstaða í atvinnulífinu. Það er öllu samfélaginu í hag að það fólk fái að finna í gegnum samningsgerð að framlag þeirra sé metið. Mannfyrirlitning og þrælahaldshugsun viðsemjenda þess er arfur frá vondum tímum og á hvergi heima nema í helvíti sjálfu. Vísum þeim viðhorfum til föðurhúsanna þar !

 

Stöndum með réttlátum kröfum Eflingar gegn kúgunarvaldi hinnar óþjóðlegu græðgisklíku sérhagsmunaelítunnar og meintum fjandskap  embættismanna-kerfisins. Aldrei að víkja !

 

 

 

Nú er Kölski kátur !

 

Nú eru vafalaust veisluhöld í helvíti, enda útbreiðslufundur í gangi með djöflafurstum heillar heimsálfu, að ráðslaga um málin. Það liggur fyrir að Vesturveldin og Evrópu-sambandið voru búin að fjárfesta í Úkraínu fyrir meira en 70 milljarða dollara fyrir stríð og langt komin með að leggja landið undir sig fjárhagslega. Innrás með peningavaldi og innrás með herafla eru tvær greinar af sama meiði og sú fyrrnefnda er oftast hættulegri en hin !

 

Að sjálfsögðu snýst dæmið ekki um lýðræði og sjálfstæði í Úkraínu. Það snýst um valdatogstreitu stórveldapólitíkur á svæðinu og Vesturveldin eru þar að þrengja sér til austurs inn fyrir aldagömul áhrifasvæði og varnarlínur Rússa !

 

Í þeim gjörningi felst slík ögrun, að Rússar hafa svarað henni með því að segja að þeir séu til í allt. Gerir fólk sér grein fyrir hvað það getur þýtt ? Innrás þeirra í Úkraínu 24. febrúar 2022 var ekki upphaf þessara átaka. Þau byrjuðu í raun um 2013, en Rússar voru lengi framan af seinþreyttir til vandræðanna !

 

Ástæða er til fyrir fólk að hugleiða það, að lífskjör almennings í Úkraínu hafa nánast ekkert batnað á þrjátíu ára yfirlýstum lýðræðis og sjálfstæðistíma, en allir ráðamenn landsins hafa hinsvegar orðið stórríkir á stuttum tíma ! Hvaðan skyldi sú auðsuppspretta hafa runnið ?

 

Spyrja má í því sambandi - hvernig koma menn sér upp nýlendum ? Hverjir kunna þá aðferð til valda og vinnings betur en alræmdar arðránsþjóðir Vesturlanda og kolsvart Kölska-valdið í Brussel ? Svari því hver fyrir sig !

 

Nú er hrúgað vopnum í Úkraínumenn af hálfu Nató, Banda-ríkjanna, Bretlands og jafnvel Þýskalands, auk annarra þjóða. En menn skulu ekki halda að það sé ókeypis. Þetta er allt leynileg vopnasala og bókað sem skuld á Úkraínu. Þannig á endanlega að yfirtaka landið !

 

Úkraína verður aldrei sjálfstæð eftir þetta, enda hefur hún í raun aldrei verið sjálfstæð. Staðsetning landsins hefur aldrei leyft það. Og þjóðernishreinsanir og fjöldamorð á rússnesku fólki í austur-héruðunum allt frá 2013, voru orðin af þeirri stærðargráðu að Rússar áttu engan annan kost en að grípa inn í málin og verja sitt fólk. Raunar er alveg furðulegt hvað þeir drógu það lengi !

 

Vesturveldin lýstu yfir vanþóknun sinni á drónasölu Írans til Rússa og töldu þau viðskipti ólögleg. Hverskonar Almættis stælar eru það ? Mega ekki tvö fullvalda ríki versla sín á milli án leyfis frá þeim ? Hverskonar hroki er þar á ferð ?

 

Og á meðan ausa þau sjálf í sífellu stórpólitískum sprekum á ófriðarbálið og hverskyns bölvunarbensíni. Hverskonar friðar-viðleitni er það ? Auðvitað engin, enda að öðru stefnt, því arðránsöfl lifa alltaf á arðráni og viðvarandi kúgun annarra og aldrei er stolið meira og rænt en í kringum stríðsaðgerðir !

 

Er líf jarðarbúa virkilega ekki meira virði en það í augum þeirra sem segjast alltaf vera góðu gæjarnir og þykjast berjast fyrir friði, lýðræði og sjálfsákvörðunarrétti þjóða, að þeir stefni að fullu stríði við Rússa sem getur varla endað með öðru en að kjarnorkuvopnum verður beitt ? Þá munu líklega flestir sjá heimskuna sem að baki mála hefur búið, þó að það verði þá orðið um seinan. Ragnarökin verða hafin og engin leið til baka !

 

Þetta er nefnilega ekki stríð Pútíns eins, þó að valdapólitík og áróðursmaskína Vesturlanda vilji láta það heita svo. Þetta er og verður stríð rússnesku þjóðarinnar gegn innrás að vestan eins og löngum fyrr. Nú á nefnilega að ná því marki sem óþverrinn Hitler og herir hans náðu ekki, en það kunna fleiri en Rússar að koma til með að standa þar í vegi. Aðrar stórar þjóðir eru til sem munu ekki una yfirgangi nýrrar nýlendustefnu Vesturlanda !

 

Og hin leysta frumorka mun ekki leyfa neinum að sigra í stórstyrjöld allra vopna í dag og halda þar vinningi. Það kann að fara svo að stórborgir heimsins, margar hverjar, verði ekki mikið lengur það sem þær eru í dag. Þannig er leikið sér með fjöregg mannkynsins í fullkominni óþökk alls þorra íbúa þessarar jarðar !

 

Það er skelfileg tilhugsun, að milljónatugir íbúa þeirra borga kunni að farast í vítiseldi kjarnorkustyrjaldar vegna heimsku hrokafullra ráðamanna og geislavirknin fái svo að leika sér að afganginum af mannkyninu !

 

 

 

 

 

 

Er Germanska stórríkið að rísa á ný ?

 

Það dylst ekki neinum að Þjóðverjar eru farnir að breyta heldur betur um stefnu og ýta undir ófriðarmál í álfunni eins og flestir virðast gera um þessar mundir. Vægi þeirra í slíkum efnum hefur löngum verið mikið. Reynslan ætti að kenna okkur að þegar þeir mæta til leiks kann að vera skammt til vígvalla í Evrópu !

 

Það er litlu meira en þrír áratugir síðan Þýskaland sameinaðist og blóðsúthellingar og fórnir seinni heimsstyrjaldarinnar voru strikaðar út eins og þær hefðu aldrei átt sér stað. Það er fyrirboði um vonda framtíð. Þýskir skriðdrekar eru komnir af stað í Evrópu á ný og það er vond tilfinning sem fylgir því fyrir milljónir manna !

 

Þýskaland stjórnar nú Evrópusambandinu og áhrif þess innan Nató eru mjög sterk. Í upphafi tilvistar hernaðarbandalagsins fóru margir hershöfðingjar og aðrir foringjar úr her Hitlers til starfa hjá Nató. Þar áttu þeir öruggt athvarf frá fyrstu tíð því litið var svo á að fortíð þeirra mælti með þeim !

 

Bandaríkin voru þá þegar byrjuð á því að pumpa kalda stríðið upp undir forustu Truman-stjórnarinnar og bandaríska auðvaldsins. Andi Roosevelts var horfinn af sviðinu og með honum nánast öll heilbrigð sjónarmið !

 

Sovétríkin með vesturhluta lands síns meira og minna í rústum, vildu fá svigrúm til að hefja uppbyggingarstarfið heima fyrir og jafna sig eftir blóðtökuna, sem var í kringum 26.6 milljónir manna. En reynt var að gera þeim það eins erfitt og mögulegt var, er þau höfnuðu öllum Marshall-mútum að vestan !

 

Vesturveldin voru þá sem óðast að koma sér fyrir í gömlu glæpasporunum frá 1938 og Munchen-andinn var aftur sestur að í hugum ráðamanna þeirra og sú hugsun allsráðandi að Sovétríkin ættu ekki að vera til. Heimsvalda-sinnaður auðklíku-andi hugsar alltaf eins og ágirndin undirrót alls ills, ræður þar alltaf för !

 

Vesturveldunum hafði illilega mistekist að siga Hitler í austur, eftir allan fjárausturinn í hann, og vonbrigðin sátu föst í fjármálagreifum auðhringanna ásamt glóandi reiðinni út í uppvakninginn sem brást þeim og hatrinu á bölvuðu komma-ríkinu sem kom honum fyrir kattarnef og öllum þeirra glæstustu valda-draumum !

 

Síðan hafa valdadraumarnir snúist um það að gera aðra tilraun með Sókn í austur og nú eru Þjóðverjar sem sagt mættir til leiks með nýjum hætti og Vestur-Evrópuríkin eru öll komin undir þýskt efnahagsvald. Það virðist þannig ekki eftir neinu að bíða og sagan fer hugsanlega að endurtaka sig, hin hryllilega og blóðuga útþenslusaga þýska ríkisins frá árunum 1933 til 1945 !

 

Núverandi kanslari Þýskalands virðist eiginlega eins og einhver endurholdgaður Franz von Papen, valdhafinn í millibils-ástandinu, svo fróðlegt verður að sjá valdhafann sem kann að taka við af honum, hugsanlega senn hvað líður. Ætli það verði ekki sjálfur Stórvaldhafinn ?

 

Að múlbinda verkalýðinn !

 

 

Margt er skrítið á Íslandi í dag og kröfur auðmagnsaðila verða stöðugt meiri og harðari gegn félagafrelsi og almannafrelsi. Það breikkar alltaf bilið milli ríkra og fátækra í þessu landi. Afætuliðið og hákarlablokkin gengur á lagið. Þar virðist allt varið af alþýðufjandsamlegu framkvæmdavaldi og dómsvaldið er ekkert til að treysta á frekar en í kvótamálum sérgæskunnar !

 

Það er greinilegt að þrælahaldshugsun er ekki undir lok liðin á landinu bláa sem nú virðist orðið blárra en nokkru sinni fyrr. Sumir virðast ekkert hafa lært í gegnum aukið mannfrelsi á seinni tímum og vilja greinilega afnema allar unnar réttarbætur fyrir venjulegt fólk. Stefna slíkra er að múlbinda verkalýðinn að nýju !

 

Svikræði er víða í gangi og nú er kominn sá tími að júdasar kvarta yfir því að þeir séu stungnir í bakið. Staðreyndin er hinsvegar sú að slíkir verknaðir eru í raun alfarið það sem þeir sjálfir iðka af eðlislægri hvöt og gömlu hnífasettin eru þar komin á flug. Hin myrku auðvaldsöfl styðjast þannig þessa dagana sýnilega við rakið fimmtuherdeildarvald innan vébanda og er sú staðreynd mála svo nöturleg að hún er verri en blóðugasta skömm !

 

Sérhver Íslendingur sem veit af þeirri baráttu sem háð hefur verið af síðustu tveimur kynslóðum þessa lands fyrir mannsæmandi launum og skilur inntakið í þeirri baráttu, hlýtur að hafa fullan skilning á því hvernig Efling heldur á málum !

 

Það virðist sem enginn verkalýðsforingi sé eftir í landinu nema Sólveig Anna Jónsdóttir. Karlarnir sem halda sig vera í þeirri stöðu eru bara tuskur og virðast í allskonar makki við mótaðilann. Þeir standa enganveginn undir nafni. Stjórnmála-hirðin sem við völd er í landinu er líka langt frá því að vera verkalýðssinnuð og ætti að skammast sín í bak og fyrir en kann það auðvitað ekki !

 

Eflingarfélagar eru láglaunafólk sem á fullan rétt á leiðréttingu launa umfram aðra. Engir hafa verið sviknir eins og þeir um langt skeið. Möguleikar þeirra til eðlilegrar framfærslu eru stöðugt skertir og hálaunahyskið innan ASÍ hefur enga samúð með þeim. Það ætti að vera flestum ljóst. Þeim á bara að fórna. Það geta ekki allir drýgt tekjur sínar með því að skrifa glæpasögur !

 

En glæpasögur verða til með ýmsum hætti í þessu landi og þarf ekki að skrifa þær á blað. Þær verða til í veruleika í kringum það hvernig komið er fram við fólk. Þær verða til þegar troðið er á fólki og því þrýst dýpra og dýpra niður í fátæktargildruna. Forréttindalið þessa lands hegðar sér í dag eins og verstu hreppstjórarnir gerðu á hinum ömurlega þrælahalds-tíma vistarbands og vítishafta !

 

Styðjum Eflingu til bættra kjara og mannsæmandi launa. Snúumst gegn afætu-liðinu og hákarlablokkinni með fullum samtaka-mætti og vísum svikurum og úrtölu-mönnum innan raða verkalýðshreyfingarinnar til þeirra réttu heimkynna. Þeir eiga ekki að neinu leyti heima með heiðarlegu vinnandi fólki !

 

Hvenær hrynja Bandaríkin ?

 

Allt er í heiminum hverfult og ekkert varir til lengdar. Stórveldi rísa og stórveldi hrynja. Það er ekkert til viðvarandi framtíðar sem mennirnir gera. Þegar eitthvað stórt er byggt upp, hleðst að því stuðningur á margan hátt, aðallega af hagsmunalegum ástæðum. En slík hagsmuna-blökk verður aldrei varanleg. Og þeir svíkja oftast sem síst skyldi. Allt tekur breytingum !

 

Ein af meginspurningum dagsins er hvort tími sambandsríkja af stærra taginu sé að ganga yfir ? Þjóðfélagshópar finna sig best í tengslum við aðra á þjóðernislegum forsendum og sú staðreynd er enn sem fyrr að staðfesta sig í þróun mála í dag !

 

Bandaríkin sem sambandsríki hafa gliðnað mikið sundur á síðustu 20-30 árunum. Þau innifela nú svo miklar þjóðfélagslegar andstæður að mikil spurning er hvort fólk á þar lengur samleið ?

 

Gamli valdakjarninn sem tengdist mikið austurríkjunum og Nýja Englandi hefur glatað stöðu sinni að miklu leyti. Suðurríkjakjarninn er orðinn mun blendnari og meira tvíátta en hann var. Mikil fjölgun fólks af spænskum uppruna hefur breytt mjög valdastöðunni í suðvesturhluta ríkisins. Allt vekur þetta áleitnar spurningar um framtíðarstöðu ríkjabandalagsins ?

 

Sambúð svartra og hvítra um nánast öll Bandaríkin er viðkvæm og viðsjárverð og getur hvenær sem er kveikt bál sem tæpast verður slökkt. Þar virðist nóg eldsneyti til fyrir heiftarlega borgara-styrjöld. Svart fólk getur ekki endalaust búið við það sem því er boðið upp á. Friðurinn er dýrmætur, en margt getur eyðilagt hann !

 

Sovétríkin hrundu nánast á einni nóttu. Stærsta sambandsríki veraldar. Ákveðinn valdahópur rændi ríkinu og eignum þess og sagði skilið við alla arfleifð þess. Sérhagsmunalið í forréttinda-stöðu tók öll völd. Gæti eitthvað hliðstætt átt sér stað í Ameríku ?

 

Staða bandaríska ríkisins í efnahagslegu tilliti virðist skelfileg. Ríkisskuldir eru ríflega 31 trilljón dollara. Í forustusveit margra ríkja er vaxandi ótti við veikingu á stöðuvaldi dollarans. Byrjaðar eru tilraunir af hálfu annarra ríkja með að leysa hann af hólmi með öðrum gjaldmiðli og þá áður en Bandaríkin fara á hausinn einn daginn. En enginn veit hver framvindan verður. Kannski ræna auðmenn í lykilstöðum ríkiseignum að lokum og skilja allan almenning eftir í syndum spilltu skulda-díkinu ?

 

Afleiðingar hruns Bandaríkjanna yrðu gífurlegar um heim allan. Enginn veit hvað mun eiga sér stað við þær efnahagslegu hamfarir, en víst er að lífskjör tugmilljóna manna munu raskast og líklega versna að miklum mun. Fátækt og eymd munu verða hlutskipti íbúa Norður-Ameríku um ófyrirsjáanlegan tíma. Bandaríkjamenn munu þá fá að kynnast nýjum og verri veruleika. Sem fyrr mun það þá sannast að dramb er falli næst !

 

Allt of mikið hefur verið bundið við þá trú að Bandaríkin myndu ætíð halda velli. En skuldadagarnir í þeim efnum virðast nálgast nokkuð hratt og lítið virðist gert til að varna því að ríkjasamsteypan hrynji að lokum svipað og Sovétríkin !