,,Ljósum fækkar lífs í byggð !“

 

 

Það er hásumar, en yfir gjörvalla mannanna byggð í þessum heimi er að færast myrkur. Það er andlegt myrkur sem ásækir stöðugt meira það mannkyn sem hefur villst á leið sinni og virðist ekki lengur leita ljóss og áframhaldandi lífs. Eyðingarhvöt mannsins virðist vera að ná æ sterkari tökum á honum, með þeim tryllingi sem oft er einbeitt fylgja tortímingarviljans. Ljósin sem lýstu eru að dofna í mannlegri sýn, vegna þess að uppreisnin er orðin svo óð og villan orðin svo mikil. Það er augljóst að miklir örlagatímar eru í nánd fyrir allt mannkynið. Þrengingar komandi tíðar verða trúlega engu líkar. Ónefndur aðili vill fara að brjóta sér leið upp á sviðið !

 

Siðafall síðustu ára í mannheimum er alveg rosalegt og greinilegt að einhverjum liggur mikið á. Enginn hefur ótak-markaðan tíma nema Guð einn, enda liggur honum aldrei á með sín verk. Þau komast í framkvæmd þrátt fyrir það. Það er því ljóst, að hin illa undirrót og forsenda að þessari hraðfara niður-talningu á siðlegri reisn mannfélagsins, er einhver sem er háður tímamörkum engu síður en við mennirnir. Og hver skyldi þar vera á ferðinni annar en höfðingi þessa heims, vitandi að völd hans verða bráðum af honum heimt !

 

Það dylst engum heilvita manni sem horfir yfir upptrekkt átakasvið þessa heims, að það styttist í endalokin. Það er ógerningur að hugsa sér, að hin hættulega staða og andspænið sem verður sífellt hvassara, geti þannig haldið áfram um langan aldur. Flóðgarðarnir hljóta brátt að fara að bresta með tilheyrandi eyðileggingu, og kjarnorkueldflaugarnar sem lengi hafa verið stilltar á skotmörk sín, sem eru helstu borgir nútímans, geta með svo til engum fyrirvara farið æðandi af stað - beint í mark !

 

Hvað á að koma í veg fyrir það ? 1) Hinn ætlaði viðræðugrundvöllur heimsins innan Sameinuðu þjóðanna, þegar óvirtur og eyði-lagður ? 2) Hæfni, ábyrgð og friðarvilji leiðandi manna heimsins, sem lýsir svo lítilli stærð, að hún er ekki lengur mælanleg ? 3) Alþjóðalög og milliríkjasamningar, sem engin yfirvöld virða lengur, ef þeim býður svo við að horfa ? Allt sem hefur þótt ærlegt til þessa hefur verið stórlega gildisfellt og veröldin virðist í frjálsu falli eigin afglapa !

 

Það er líklega verið að leika síðustu leikina á sviði hinna stórpólitísku átaka í yfirstandandi tíma og þar ber enginn ábyrgð. Staðreyndin er nefnilega sú, að það ver ekkert lengur þennan heim, af hálfu mannkynsins. Hann virðist nefnilega algerlega varnarlaus fyrir eigin afbrota-starfsemi og vaxandi glæpahneigð í öllu !

 

Vopnum fjölgar sífellt í veröldinni. Og til að markaður verði til staðar fyrir sölu þeirra, vilja óþokkamenni að viðhalda styrjöldum. Og það eru víst nógir til að sjá um það. Basil Zaharoff er enn til í mörgu gervi. Flestöll ríki Vesturlanda stunda vopnasölu sem stóran tekjulið í sínum efnahagsmálum, og eins önnur ríki sem bolmagn hafa til vopnaframleiðslu. Þar virðist enginn undanskilinn. Kaupmenn dauðans eru á ferð um alla jörðina dags daglega og stríðsátök eru fylgja þeirra hvar sem þeir fara !

 

Donald Trump er lítið annað en bóla sem kemur og fer. Hann mun ekki leysa neinn vanda, enda hefur hann lítinn vilja og þaðan af síður burði til þess. Tilburðir hans, sem eiga að vísa í þá átt taka oftast mið af hótunum og yfirgangi og það fer illa í flesta, enda talar Trump niður til annarra í öllum tilfellum og kann ekki annað. Það er hans siðamáti í öllum hans málflutningi og falleinkunn fylgir !

 

Trump er forstjóri öllu fremur en forseti. Hann virðist ekki þekkja lýðræði nema af afspurn. Og hann virðist halda að Bandaríkin séu eitthvað sem hafi rétt til að vera öllu æðra í þessari veröld okkar nú og framvegis og hroki hans lokar mörgum dyrum að eðlilegum, mannlegum samskiptum jafnt innanlands sem utan. Mannsiðir hans virðast vægast sagt mjög umdeilanlegir, hvort sem vinir eiga í hlut eða fjendur !

 

Margir telja núorðið að valdatími Trumps sé þegar orðinn miklu nær því að vera martröð en draumur. Hann ræður ekkert við þau myrku öfl sem búa að baki tjalda í valdakerfi heimsmálanna, og verður þar vafalaust að sýna undirgefni sem aðrir. Á meðan vex bara hrollvekjan. Það er því ekki neins góðs að vænta af manninum þó hann tali digurt og telji sig víst stærstu ögnina í gerinu. Lausnir hans á málum munu aldrei verða að veruleika, enda eru þær sérgæskufullar og siðlausar að öllu inntaki. Þar er ekkert sem býr yfir neinu valfrelsi fyrir aðra !

 

Það er því hvergi bjart yfir bólum jarðar. Norðurlönd eru sokkin í Natósvart hugar-farsvíti og hafa vafið sig þar inn í eigin dauðahring til skammarlegra örlaga. Allt er á hverfanda hveli og þjóðir heims hafa ekki lengur samráð um eitt eða neitt. Það fer hver sína leið eftir eigin hentug-leikum. Við slíkar aðstæður þarf enginn að búast við því að hugað sé mikið að friði, enda er það ekki gert !

 

Víða sækir hjörtu hryggð,

hatur vex í orðum.

Ljósum fækkar lífs í byggð,

lausn er hvergi á borðum.