Skagastrandarbyggð eða Skagabyggðarströnd ?

 

 

Ákallið eftir hinu mikla forsjárvaldi hefur löngum viljað verða sterkt í þessum heimi. Það hafa aftur og aftur verið byggð upp öflug ríki á þeim grunni, en þau hafa öll hrunið með skelfilegum afleiðingum. Menn hafa varið þar heilu öldunum í gífurlega fórnfreka uppbyggingu í krafti drauma sinna um síðari velsæld, en það hefur alltaf endað með hruni !

 

Samþjöppun valds er ekki af því góða og verður það aldrei. En allir vilja samt fá hlutina til sín en enginn vill láta taka neitt frá sér. Staðreyndin er hinsvegar sú, að maðurinn verður að geta búið við skikkanlegt frelsi ef honum á að geta liðið vel. En sem vitað er, býr miðstýringarvald alltaf yfir frelsisskerðingum !

 

Frelsisþrá hins mannlega hjarta þarfnast þess sama á nærslóðum sem annars staðar. Súdan og Grímsnesið er enn af svipuðum toga hvað það snertir. Þannig verður það alla tíð !

 

Ef gamli Vindhælishreppurinn tekur upp á því að sameinast á ný, ætti svo sem ekki að vera erfitt að finna nafn á krógann. Þau sveitarfélög sem eru þar innan marka eru bara tvö, Sveitarfélagið Skagaströnd og Skagabyggð. Samkvæmt fyrirsögn þessa pistils væri líkast til auðvelt að mynda sameiginlegt nafn á getnaðinn út frá fyrri nöfnum þessara sveitarfélaga !

 

En samvinna þessara tveggja sveitarfélaga hefur lengi verið allmikil og góð og í sjálfu sér engin sérstök ástæða til að breyta því sem er. Ef menn kjósa að líta á það sem óhjákvæmilegt lokatakmark að sameina alla austursýsluna í eitt sveitarfélag og hafa alla stjórnsýslu á Blönduósi, má spyrja, af hverju ætti það að vera lokahnykkurinn á sameiningarferlinu, í leitinni að hinum sterka bakhjarli ? Vilja þeir sem þannig hugsa ekki bara fara alla leið !

 

Mætti ekki í framhaldinu sameina sýsluna og Skagafjörðinn og færa svo stjórnsýsluna fyrir allt svæðið á Sauðárkrók ? Myndu Blönduósingar ekki fagna því – eða hvað ?

 

Mætti ekki síðar víkka svigrúm hins rísandi stórveldis svo enn frekar út til austurs og færa stjórnsýsluna á Akureyri ? Skagfirðingar myndu líklega fagna því – eða hvað ?

 

Mætti svo ekki að lokum gera allt landið að einu sveitarfélagi undir nafninu Reykjavíkurhreppur og hafa stjórnsýsluna í höfuðborginni ? Akureyringar myndu trúlega fagna því – eða hvað ?

 

Svo þegar hreppsómagar hinnar takmarkalausu menningarhyggju verða kannski orðnir óþarflega margir, gæti framhaldið orðið að sveitfesta þá út í Brussel, sem hlýtur þá að vera úthugsað lokamarkmið innmúraðra sameiningarsinna !

 

Enda telja þeir hinir sömu þá vafalaust flestir, að þeir séu þar með komnir í aldingarðinn Eden og lengra verði ekki komist í velmegun. En þar var nú reyndar til staðar höggormur !!!