Nató – krabbameinsæxli Evrópu !

 

 

Við sem lifum í þessum heimi, viljum áreiðanlega flest fá að búa við frið. Fá að lifa lífi okkar, geta af okkur börn og skila einhverju góðu í hendur afkomenda okkar við ævilok. En þeir eru margir sem eru neyddir til að ganga aðra braut og deyja fyrir tímann í stríðsátökum og allskyns óáran sem þeim tengjast og allar eru þær hörmungar yfirleitt meira og minna af mannavöldum !

 

Andstæða friðar er nefnilega stríð og það eru alltaf einhverjir sem vilja stríð. Vopnasalar og allra handa  hergagnafram-leiðendur, valdamenn sem vilja meiri völd, gráðugir mannhákarlar sem virða lífið einskis, hershöfðingjar sem vilja auka orðstír sinn og allra handa mannkvikindi, yfirleitt lið af lakari sortinni !

 

Það eru stígvélaðir pattonar víða til í herjum, ruddalegir menn, metorðagjarnir og orðufíknir, menn sem seint munu verða friðflytjendur. Þeir sjá sjálfa sig gjarnan á flugi í forustu fyrir einhverri sigurbylgju hetjuskapar og manndáða. En í raun eru þeir bara litlir, hræddir karlar í óstöðugum heimi, og kunna manna síst með völd að fara. Og eftir kjarnorkustríð er ólíklegt að menn flaggi mikið heiðurs-merkjum eins og eftir velheppnað stríð. Geislavirknin mun ekki leyfa það, að þeir sprangi mikið um með orðum þakin brjóst !

 

Veröld okkar mun alltaf síður en ella búa við frið meðan hernaðarbandalög eins og Nató eru og verða til. Nató er samsteypa valds sem þrífst á stríði og verður að halda sér uppi með því að skapa forsendur fyrir viðvarandi stríðshættu. Nató var búið til á sínum tíma vegna ætlaðrar nauðsynjar á svokölluðu ógnarjafnvægi gegn Ráðstjórnarríkjunum. Þegar þau hrundu, töldu margir tímabært og nauðsynlegt að Nató hyrfi af vettvangi líka !

 

En áhrifamikil öfl í Vestur-Evrópu og Bandaríkjunum vildu viðhalda sínum fyrri hervaldstökum. Þeir vildu viðhalda Nató og eiga þar fyrirliggjandi grimman varðhund til gæslu valda sinna. Í þeirri fylkingu bar mikið á hægrisinnuðum forustumönnum í pólitík og leiðandi mönnum í auðhringum Vesturlanda. Mönnum sem gefa allt fyrir að hafa völd og meiri völd. Þau öfl hafa ekkert breyst og munu ekki breytast. Fyrr frýs í helvíti en það gerist !

 

Ef við stefnum að friði byggjum við ekki upp hernaðarbandalög. Við þurfum þess í stað að byggja eitthvað upp sem nærist á friði en ekki stríði. Stöðugt meira vígbúnaðarferli hrópar eftir því að vopnin verði látin tala. Og að því mun koma samfara slíku ferli !

 

Hernaðaráróður, svokallað ógnarjafnvægi, stríðstólaskakstur og skelfingarvakningar, eru fylgjur sem fela í sér dauða. Allar slíkar æsingar og hræringar af mannavöldum í samfélögum þjóðanna eru andstæður við líf og frið. Þeir sem vilja og ætla sér að lifa og hrærast í hernaðarhyggju velja ranga leið. Í þeim hópi eru og hafa yfirleitt alltaf verið allir mestu fjölda-morðingjar heimsins !

 

Veröldin á marga gersemina til. Í undraverðum byggingum og listaverkum hefur mannsandinn risið hátt, í andans verkum ljóða og sagna býr það sem veitir mennskunni ferskan framgang, ef sjónarmið lágkúru og mannhaturs eru ekki látin hlekkja og hefta heilbrigð stefnumið. Látum ekki ófriðaröfl hernaðarhyggjunnar steypa okkur fram af ystu nöf. Næst verður það svo, því allt er þegar þrennt er. Og þá verða það gereyðingarvopnin sem tala !

 

Allt hernaðarbrölt er sýking á heilbrigðu ferli lífs og dáða, krabbameinsæxli dauðans teygja sig þar fram, allt sem hrópar gegn heilbrigðum sálum í hraustum líkömum. Og ef þessi æxli feigðar og dauða fá að ráða, munu þau eyðileggja öll afrek mannsandans í þessum heimi og veröldina sjálfa með !

 

Tökum aldrei þátt í slíkri feigðargöngu, hvorki fyrir Nató né nokkurt annað manngert fyrirtæki dauða og tortímingar. Leggjum vopnaskakið niður og styðjum frið milli þjóða með öflugum alþjóðlegum samhug !

 

Látum Sameinuðu þjóðirnar standa undir nafni. Flytjum aðalstöðvar þeirra frá Bandaríkjunum, þar sem þær áttu auðvitað aldrei að vera. Setjum þær niður í Sviss eða einhverju ríki sem ætti að geta veitt þeim heilbrigða umgerð um starfsemina og látum með fjölþjóðaátaki samtökin verða það sem þau áttu að verða !

 

Tökum ávallt afstöðu með lífinu og framtíð þess hér á jörð. Andmælum af heilum hug stríði og dauðastefnu. Stefnum heilshugar að því að vera manneskjur í manneskjulegri heimi. Komandi kynslóðir munu þakka okkur það og ekki síst fyrir það - að fá tækifæri til að lifa !