Skattheimta skítmennskunnar !

 

 

 

Lengi framan af ævi var ég stuðningsmaður Ríkisútvarpsins. Það má jafnvel segja að ég hafi verið hollvinur þess og talið það nauðsyn fyrir land og þjóð. Það átti meðal annars að kynna okkur sem sjálfstæða þjóð og vaka yfir því að við héldum okkur í þeirri stöðu. Þannig held ég að margir fleiri hafi hugsað á þeim árum !

 

Það var margt gott efni í útvarpinu hér áður fyrr, þjóðlegt efni og þroskandi og tengingin við fólkið í landinu virtist heilbrigð og sönn, þannig að útvarpið virtist vera að skila hlutverki sínu með ágætum. En nú er öldin önnur í þessum efnum - vægast sagt !

 

Mér finnst að á seinni árum hafi útvarpinu eiginlega verið stolið frá þjóðinni. Það er ekki lengur þjóðlegt eða þroskandi. Það er bara orðið ömurlegt fyrirbæri. Sem Íslendingur get ég ekki lengur meðtekið það sem menningareflandi íslenskan fjölmiðil.Dagskráin virðist eiginlega bara meira og minna einhver meiningarlítil menningarsuða fólks sem virðist vera að farast úr fjölmenningarfári og egoisma !

 

Það er eins og einhver áróðursklíka innantómrar sjálfselsku og sérhagsmuna-legra bolabragða hafi tekið yfir allt og dagskráin virðist mér nánast undan-tekningarlaust einómur slíks efnis. Markaðshyggjan er látin valta yfir allt og þjóðlegum viðhorfum er nánast úthýst með öllu fyrir endalausa menningarslepju !

 

Ekki veit ég hver fjandinn stjórnar svona öfugum vinnubrögðum, en ég þykist nú gjörla vita að Ríkisútvarpið mitt gamla sé dautt og meira að segja verra en dautt. Það er orðin ógeðsleg andstæða þess sem það var og átti að vera. Það tók mig nokkurn tíma að trúa því virkilega að hlutirnir væru orðnir svo falskir og ómerkilegir sem þeir eru. En ég gat ekki sætt mig við fréttalygabatteríið lengur !

 

Það er sem sagt orðið fullljóst í mínum huga, eftir illa reynslu af síversnandi hamskiptum fjölmiðilsins, að Ríkis-útvarpið er ekki lengur það sem það var. Það er orðið að umskiptingi þjóðleysu og gervimenningar. Það stendur ekki lengur neinn vörð um sameigin-legan arf okkar Íslendinga. Skyldur þess virðast allar orðnar handan hafs og bera fáu því vitni sem verja ber fyrir okkar hönd !

 

Einhverjir fyrirlitlegir ómenningarhópar virðast nú ráða lögum og lofum í þessu, að mér finnst, úrkynjaða útvarpi og endalaust útlendingadekur og flæði af ómerkilegu bulli virðist nú fylla hverja rás. Og svo erum við öll skattlögð fyrir þennan ósóma, sem er okkur þó ekki lengur þjóðvanda-bundinn á nokkurn hátt og engu íslensku til framdráttar. 20.200 kr. skattur er þar lagður á hvern og einn með valdboði !

 

Ég vildi sannarlega sjá þær krónur fara í eitthvað uppbyggilegt. Þær gera það ekki þarna. Ég vil að menn almennt afneiti þessum skatti sem á engan rétt á sér lengur. Hvernig er hægt að fara svona með hlutina ? Eru Íslendingar að missa allt þjóðlegt úr höndum sér og verða að algerum viðrinum í þessu ríksútvarpslausa samfélagi sem virðist ekki hafa neina heilbrigða stýringu lengur ?

 

Við höfum átt ýmislegt í þjóðlegum skilningi mála frá fyrri tíð, en margt af því virðist sannarlega hafa verið eyðilagt í hamslausri efnishyggju-græðgi síðari ára sem virðist ekki þekkja nein takmörk lengur. Íslenska þjóðin er þar komin fram á ystu nöf !

 

Það virðist hreint út sagt lítil sem engin heilbrigð hugsun viðhöfð í fréttaflutningi þessa skrumskælda fyrirbæris sem nú er kallað Ríkisútvarp okkar Íslendinga, en er það ekki lengur. Fátt undirstrikar að þar sé um að ræða sjálfstæðan fjölmiðil sem ber sjálfstæðu ríki eðlilegan vitnisburð. Sú svikastaða sannleiks-málanna ætti að hreyfa við hugsun hvers sjálfstæðs Íslendings og við slíkar aðstæður óboðleikans ætti fólk að rísa upp gegn ómennskunni og hrópa : ,, Við mótmælum öll !“

 

Til dæmis er öllu efni útvarpað frá vestrænum fréttastofum eins og heilögum sannleika og ekkert sannprófað. Fólk er því ekki lengur að hlusta á fréttir, það er að hlusta á áróður, sem virðist að miklu leyti settur saman úr tómum lygaþvættingi og það út í gegn !

 

Mér ofbauð að lokum svo gjörsamlega hvernig komið var, að ég hætti fyrir rúmu hálfu ári að hlusta á sjónvarpsfréttir og fréttatengda þætti frá þessari endur-varpsstöð Nató, sem hér er nú rekin fyrir íslenskan skattpening og kölluð ríkis-útvarp. Ég fann fljótlega að það gerði mér bara gott og að ég gat notað tímann í miklu þarflegri hluti !

 

Ég þrífst nefnilega ekki á lygum og einhverri fréttamafíu-framleiðslu sem send er á pólitískum færiböndum frá ESB og Nató í Brussel. Enginn ærlegur maður ætti að hlusta á efni sem er honum til vits-munalegs tjóns og gerir hann að lakari manneskju en ella !

 

Sumir starfandi fréttamenn virðast orðnir svo ákafir í að verða frægir fyrir að afhjúpa einhverja hliðstæðu af Watergate spillingarmáli, og ganga svo langt í þeirri löngun sinni, að full ástæða er orðin til þess að gjörðir þeirra sjálfra séu rannsakaðar og afhjúpaðar. Þeir eru þá komnir út fyrir allt velsæmi !

 

Í sumum tilfellum virðast þeir sjálfir búa til spillingarmálin. Ég fæ ekki betur séð en að Páll Vilhjálmsson stórbloggari hafi einmitt bent á ýmsar hættur sem skapast geta í kringum slík mál og hafa þær upplýsingar verið sérlega athyglisverðar og umhugsunar-verðar svo ekki sé meira sagt !

 

Ég vil halda í þjóðlega réttlætiskennd mína, sannleiksást og siðvitund. Ég geri það ekki með tengslum við ónýtt frétta-batterí eins og hið gildisfallna Ríkis-útvarp. Það þjónar nú allt öðrum tilgangi, að mínu mati, en því gamla þjóðlega viðhorfi að halda Íslendingum á heil-brigðum grundvelli mennsku og manndóms og leitast við að segja sannleikann. Þar er um mikla afturför að ræða í öllu siðrænu tilliti. Það er hryllingur að verða vitni að slíku !

 

Þegar ég horfi yfir mjög svo umrætt, en að minni hyggju, mjög svo spillt og eyðilagt svið frjálsrar íslenskrar hugsunar hjá viðkomandi fjölmiðli, renna mér í hug eftirfarandi hendingar :

 

Burt er það sem bætti haginn,

bjargaði mörgu í gegnum daginn.

Enginn lengur yls þar nýtur,

eftir situr bara skítur !