Hin kratíska feigðarstefna Norðurlanda !

 

 

 

Þegar allt það sem Norðurlönd hafa staðið fyrir í meira en öld hefur verið svikið af þeim sjálfum, mun það sjálfkrafa leiða til tortímingar og úrkynjunar viðkomandi þjóða. Ekkert varir til frambúðar í þessum heimi og þegar öll norræn manndómsgildi hafa verið svikin er ekkert eftir. Stöðugt aukin siðspilling í umræddum löndum mun tiltölulega fljótt eyða öllu heilbrigðu atgervi og ekkert verður skilið eftir. Allt verður annað og verra en það var !

 

Það var virðing og gæfa yfir stefnu Norðurlanda meðan þau stóðu að friðsamlegum milliríkjamálum og fengu gott orðspor fyrir slíkan málflutning. Þau voru þá eins og bjarmi vonar yfir hafi þjóðanna. En nú er spillingaralda auðvaldsyfirgangsins gengin yfir Atlants-hafið frá vestri, og hefur fært hina sönnu arfleifð Norðurlanda í kaf !

 

Það mun skiljanlega ekki leiða neitt gott af sér og það mun fljótt sýna sig. Norðurlöndin hafa ákveðið að segja skilið við fyrri stefnu friðar og manndómsheilla og gerast stríðshækjulönd Bandaríkjanna. Í því felst mikið mennskuhrap. Og auðvitað eru kratar þar fremstir í flokki og sem Íslendingur finnst mér sem andi fram-liðinna Stefaníufylgjenda svífi þar hlakkandi yfir vötnum vesalmennskunnar !

 

En sú tíð mun koma að mikil alda mun ganga yfir Atlantshafið frá austri til vesturs, sem ægileg afleiðing af sprengjugosi á ónefndum stað. Hún mun rísa í ótrúlega mikla hæð og þegar hún nær ströndum Bandaríkjanna mun hún ganga í það minnsta 30 kílómetra inn yfir landið. Það verður skelfilegur atburður. Þá mun endurgjaldið fyrir voðaölduna sem kom úr vestri verða greitt að fullu frá hinum gamla heimi !

 

Bandaríkin eiga dóm yfir sér og það styttist í hann. Engin þjóð sem hefur leyft sér að ganga fram gegn rétti annarra þjóða með þeim hætti sem Bandaríkin hafa gert, kemur vel út í mannkyns-sögunni eða getur gert það. Afleiðingar illra verka skila sér alltaf að lokum. Rómverski yfirgangurinn fær alltaf sín verðugu endalok og þau verða því verri sem hann var meiri og stóð lengur yfir. Slík endalok bíða með óumflýjanlegum hætti Bandaríkjanna. Jafnvel eitthvað í líkingu við iðrun Níniveborgar gæti ekki lengur breytt þar neinu. Dómurinn er þegar fallinn !

 

Á sínum tíma flykktist kúgað fólk frá Evrópu í stórhópum vestur yfir Atlants-hafið í hið meinta frelsi þar. Og það byrjaði strax á því að kúga og drepa þá sem þar voru fyrir og einskisvirða lífs-rétt þeirra. Þeir glæpir sem þá voru framdir bíða enn uppgjörs. Þar byrjaði hin svívirðilega uppsöfnun ranglætisins !

 

Villimennirnir sem komu urðu nefnilega fljótt miklu meiri villimenn en þeir sem fyrir voru. Og eftir eyðingu rauðu þjóðanna og menningar þeirra, skrifuðu þeir söguna í framhaldi mála að eigin smekk, yfirfulla af lygum og ljótum dómum um fólkið sem bjó fyrir í landinu. Vitnisburðirnir sem gengu þar á móti náðu aldrei fram, því þar var búið að þagga niður allar raddir með skefjalausu ofbeldi. En sannleikurinn lætur aldrei kæfa sig til fulls, hann leitar fram að lokum og krefst réttar síns með því valdi sem ekkert getur hnekkt !

 

Yfirgangsvaldið í Washington er ekki á neinn hátt vænlegt fyrir heimsfriðinn. Ein fjölmenningarþjóð, sundurleit sem mest getur verið, hefur engan rétt til að tala niður til umheimsins og þrælka hann eins og Bandaríkin hafa gert svo lengi. Það kallar á uppsafnað hatur sem að lokum kann að koma alls staðar frá. Sagan býr yfir heimshrópi af slíku tagi. Heimshrópið sagði á sínum tíma - Niður með Assyríu, niður með Babýlon, niður með Róm og nú segir það á sama hátt með fullum rétti : Niður með Bandaríkin !

 

Eigi mannkynið að fá að lifa á þessari jörð við frið og samvinnu landa á milli, verða heimsvaldasinnaðar yfirgangsþjóðir að hverfa að öðru og missa sín ofurvöld. Taglhnýtingar þar á bæ, af því tagi sem Norðurlöndin virðast nú því miður orðin, munu þá verða að hylja þjóðarásjónur sínar með skömm. Yfirgangsþjóðirnar munu verða sigraðar af sjálfum höfuðskepnum heimsins. Jörðin mun fyrir anda Skapara síns rísa gegn slíkum ríkjum og eyða valdshroka þeirra. Náttúruöflin munu þar þekkja sínar skyldur og koma til með að framfylgja þeim. Spádómsorð hins skapaða lífs segja það og staðreynd þeirrar framvindu mun sanna sig áður en yfirstandandi öld verður á enda runnin !