,,Fyrst þú sást það !“

 

Einu sinni reyndi maður nokkur fátækur að efnum, að drýgja föng sín með því að hnupla lambslæri í vinnu sinni hjá kaup-manninum í viðkomandi þorpi. Það gerðist þegar menn voru að fara úr vinnu í hádegismat eða að loknum vinnudegi. Hann skellti lærinu undir peysu sína og ætlaði með fenginn heim, en þá þurfti það nú að gerast að kaupmaðurinn sá til hans álengdar og þótti eitthvað einkennilegt við hollinguna á honum. Hafði þá lærið sigið svo að hækillinn stóð út um buxnaklaufina, sem var óvart opin. Vitað var að maðurinn átti til nokkuð mikla hirðusemi, svo kaupmaður kallaði til hans höstuglega ,,skilaðu því sem þú hefur tekið !“ Maðurinn svaraði samstundis: ,, Sjálfsagt, fyrst þú sást það !“

 

Stundum dettur mér þessi saga í hug þegar sagt er frá því að glæpir hafi komist upp og menn hafa játað brot sín og afsakað breytni sína á allar lundir – fyrst það komst upp um þá. Margir leiðtogar hafa beðist afsökunar á glæpum sem framdir hafa verið af ríkjum þeirra bæði út á við og inn á við. Kaþólska kirkjan hefur margsinnis beðið afsökunar á glæpum sem þjónar hennar hafa framið og verður þó aldrei öllu til tjaldað sem átti sér stað undir þeim formerkjum, enda er þar um að ræða eina ljótustu sögu sem til er og nær hún yfir margar aldir myrkurs og skelfinga !

 

Ástralir og Nýsjálendingar hafa beðið frumbyggja afsökunar á meðferðinni á þeim á fyrri tímum. Danir hafa verið að biðja Grænlendinga afsökunar á þeim brotum sem fyrri stjórnvöld Dana frömdu gagnvart þeim, og meira að segja íslenska ríkið hefur farið í svipað ferli gagnvart þeim viðbjóði sem fulltrúar þess létu viðgangast gagnvart ýmsum smælingjum þessa lands á sínum tíma. Þannig má nefna margt til viðbótar í óendanlegri glæpasögu okkar villuráfandi og guðlausa mannkyns. Og halda menn svo að með þessum afsökunum eigi líklega allt að teljast klárt og kvitt !

 

Nei, það er mikill misskilningur að svo sé. Hér er bara um að ræða kattarþvott og yfirborðstilgerð af lakasta tagi ? Þarna verður ekkert gert upp að fullu fyrr en á efsta degi og þá verða líka hinir raunverulegu afbrotamenn vaktir upp og kallaðir fyrir dóm. Og þá verður engu leynt eða undan stungið, allt verður lagt fram af því yfirvaldi sem enginn getur véfengt og allt veit. Þá mun filma allífsins flytja sinn vitnisburð og menn munu standa frammi fyrir öllu því sem þeir gerðu og héldu að enginn vissi. Allt ranglæti, öll svik, allt sem óhreint er, verður hreinsað út úr þessari veröld, ásamt þeim sem eiga sér enga bjargar von lengur og verða að hverfa að eilífu úr lífheimi Guðs Náðar !

 

Það er engin sönn iðrun fólgin í orðunum ,,fyrst þú sást það.“ Þar er aðeins um viðurkenningu brotavalds að ræða, sem gerir sér grein fyrir því að það þýðir ekki að þræta. Það hefur komist upp um hann og staða málsins er orðin sú að best er að gera ekki illt verra úr því sem komið er. Hækillinn stendur út úr buxnaklaufinni !

 

 

Sum brot eru kannski ekki ýkja stór, en önnur eru yfirtaks stór og sá sem dæmir á hinum efsta degi dæmir allt og alla af fyllstu réttvísi. Þar verður engin spilling til staðar – og þeir sem aldrei hafa þjónað öðru en egói sínu og eigin hag, koma þar ekki lengur við sögu. Einkunn þeirra verður núll. Til staðar er aðeins hið fullkomna réttlæti, lagt fram af Almættinu í blessunarþágu þeirra sem lífið eiga að erfa !