Bandarísk saga !

 

Bandarísk saga er blóðug öll,

bölvun og smán við hana fest.

Þar hefur vaxið sú vítishöll

sem veraldar þjóðum spillir mest !

 

Frumbyggjum var þar forðum eytt,

fjöldamorð áttu sér víða stað.

Vaðið með drápum vítt og breitt,

vitnisburðirnir sanna það !

 

Í Ameríku er ófreskjan

auðvaldið – mest til bölvunar.

Mafían, löggan og Ku Klux Klan

kálandi fólki hér og þar !

 

Morðöldur eru svo magnaðar

og mikið af glæpatólunum,

að börnin ganga með byssur þar

og bana hvert öðru í skólunum !

 

Þar hefur gróðagirndin stærst

greinst og drottnað með hrokans ris.

Þar hafa flestir sýkst og særst

og siðferðið farið til helvítis !

 

Þaðan er allt sem frelsar flæmt,

svo fallin er sérhver bjargarvon.

Ríkið er feigt og dauðadæmt,

það drepst í sora sem Babylon !

 

Þá hefst upp eldur við hæstu fjöll

sem hrynja svo yfir blindan lýð.

Bandarísk saga er blóðug öll

en bráðum verður hún liðin tíð !

 

         Ooo0ooo