Það hefnir sín !

 

Sú tíska að veita verðlaun

er vandi hér á jörð,

því fljótt kann flest að gerast

sem fellir slíka gjörð.

Því verðleikarnir víkja

er veruleikinn fer

að vitna um eitthvað verra

en verðlaunandi er !

 

Að heiðra hina og þessa

sem hafa ei trausta gerð,

það hefnir sín og heggur

sem hættumikið sverð.

Svo illt er að veita verðlaun

og vita ekki hvað

verðlaunahafinn vinnur

til vansa eftir það !

 

Það þekkjast þannig dæmi

sem þolað fá ei ljós,

sem snúa öllu öfugt

og æpa á gefið hrós.

Þá dyggð er dregin niður

í daunillt glæpasvað.

Þá hefnir sín sá heiður

sem hitti á rangan stað !

 

Í Myanmar nú mannfólk

er myrt að grimmum sið.

Þar ræður andi ríkjum

sem rýfur allan frið.

Og Róhingar það reyna

hvað römm er dauðans þraut.

Þar varnar sú ei voða

sem verðlaun forðum hlaut !