Útþenslustefna Bandaríkjanna !

 

 

 

Það er nú að verða flestum ljóst, að hugmyndir Donalds Trumps komandi Bandaríkjaforseta um að gera Ameríku mikla á ný, er hugsuð á kostnað undirlægjuþjóða Bandaríkjanna í Nató og víðar. Stærsta eyja heims er nú í sigtinu og vald Dana þar er ekki neitt sem veldur manni eins og Trump áhyggjum. Hann býður sennilega bara Mette og Lars Lökke í heimsókn í Hvíta húsið og málin verða trúlega leyst yfir góðum málsverði af dönsku svínakjöti, þó engin danska verði töluð yfir borðum !

 

Það standast auðvitað engir Natóþjóða forsprakkar heimboð í Hvíta húsið og varla eru Mette og Lars Lökke þar neinar undantekningar. Og náttúrulega verða sjónarmið Grænlendinga sjálfra hreint  ekki mikið til umræðu á svo hásivilíseruðum fundi. Danir tala þar bara fyrir þá á háensku og kannski svolítið fyrir sjálfa sig í leiðinni !

 

Trump býður sem sagt í Grænland, en ekki heyrist að hann bjóði neitt í Ísland. Af hverju skyldi það nú vera ? Er það kannski vegna þess að hann telur Kana eiga hér svo til allt, ef gjörla er að gætt ? Það skyldi þó aldrei vera ! Menn bjóða skiljanlega ekki í það sem þeir telja sig eiga. Og hvernig á að gera Ameríku mikla á ný nema með því að hirða eitthvað af þeim sem eitthvað eiga ? Í þeim hópi verðum við Íslendingar sennilega ekki taldir mikið lengur, enda fjármálagæsla þjóðarbús handhafa hér glórulaus með öllu og virðist ekki ætla að batna með nýrri stjórn !

 

Margt er líka orðið svo þvert á alla eðlilega mannasiði í heimi þessum, að sumir gætu þessvegna hugsað sér að spyrja, af hverju kaupir Trump til dæmis ekki bara Mexíkó eða tekur landið og flytur íbúana, þessar skitnu 100 milljónir, yfir til Gvatemala og Nicaragua og ríkjanna þar suður og austur af, og sleppir því að byggja múrinn mikla ? Myndi það ekki stuðla bærilega að því að gera hina bandarísku Ameríku mikla á ný samkvæmt hinni rísandi stór-hugmyndafræði ?

 

Trump karlinn er eins og allir vita bandarískt ólíkindatól af furðulegasta tagi. Enginn veit hverju hann getur tekið upp á og flestir skjálfa á taugum og beinum vegna þess. Hin umboðslausa Úkraínustjórn þurfti víst að fá Þorgerði viðreisnarvalkyrju í skyndiheimsókn og tveggja milljóna evrusjóð með henni af íslensku þjóðarfé, bara til að hanga á löppunum. Þvílíkt ástand fyrir svona virkilega stórsjálfstæð ríki eins og Ísland og Úkraínu !

 

Grænland er stór biti, stór og girnilegur biti. Washingtonvaldið slefar ekki svo lítið yfir hugmyndinni um amerískt Grænland. Skítt með 36 trilljóna dollara ríkishallann þegar slíkur hvalreki er í sjónmáli. Trump leysir málið. Kannski hann verði sér úti um hagstætt vinaþjóðarlán í Rússlandi, Kína eða Norður-Kóreu, þegar hann hefur losað um tengslin við Natógrúppuna og gert heila galleríið að staurblönkum, Vestur-Evrópuþjóða klúbbi, líklega með hernaðarlega getu á brusselísku núlli !

 

,,Trump er hinn taktíski snillingur sem leysir allt“, segja þeir sem þora ekki að halda öðru fram. En snilld hans er líklega bara tilbúin oligarkasnilld og felst líklega helst í því að taka eitthvað í heimildarleysi. Það er háttur tillits-lausra auðmanna sem ganga um veröldina á skítugum, vestrænum auðvaldsskóm, og hafa lengi gert. Þar er Trump líka á heimavelli sem forstjóri en varla sem forseti !

 

Hvað er svo framundan ? Margir spyrja þess og auðvitað veit enginn neitt þegar 100% ólíkindatól sest að völdum. Sumir kynnu að vilja halda því fram að það ættu að vera til lög sem bönnuðu að slík ólíkindatól öðluðust einhver allsherjar-völd, en það væri náttúrulega í fyllsta máta ólýð-ræðislegt og þar við situr. Margir njóta lýðræðislegs frelsis og það jafnvel margir sem síst ættu að gera það. Það er víst eitt af hinum stærri harmsefnum heimsbyggðarinnar !

 

Bandarísk stjórnvöld eru löngu orðin alræmd um heim allan fyrir óvirðingu sína gagnvart lýðræðiskosningum í öðrum löndum. Ef þeim líkar ekki niðurstaðan eru kosningarnar sagðar hafa verið svindl og allt í fölskum dúr. Lagt er fé til höfuðs þjóðhöfðingjanum og öllum gullforða viðkomandi lands stolið. Svo er leiðtogi stjórnar-andstöðunnar viðurkenndur sem sigurvegari og honum boðið til Washington og þar fær hann eflaust klassamáltíð í Hvíta húsinu með eigin þjóðarrétti, og gefur svo á eftir, líklega sæll og saddur, leyfi sitt til allra bandarískra afskipta af málum síns eigin lands !

 

Slík vinnubrögð hafa sem vitað er margsinnis verið viðhöfð, enda orðin þaulæfð í höfuðríkinu mikla og þrælkunn í öðrum löndum. Og afleiðingar andstöðu við slík áform eru svo sem alkunn líka og alræmd að sama skapi. Því ef menn láta sér ekki segjast og hlýða og halda kjafti, er alltaf hægt að splundra og sprengja og senda viðkomandi vandræðaland í rústum til steinaldar, með samþykki klappliðs á lýðræðisþinginu mikla í Vostúni !

 

Hákarlinn hakkar þannig í sig sardínur heimsins án þess að viðhafa nokkurt lýðræðislegt viðbit fyrir eigin kjaft. Græðgi hans er orðin takmarkalaus og ekkert virðist geta stöðvað yfirgang hans. Heimurinn er mun verri bara fyrir það að þessi valdníðsluvargur er til. Frumherjar Bandaríkjanna myndu annarlega ekki vilja sjá hvernig barnið þeirra hefur breyst í hrollvekju heimsmálanna á síðari tímum. Og nú er staðan sú, að enginn veit svo sem hver getur orðið næsta fórnarlamb hroll-vekjunnar, en kannski má ætla að Danmörk verði næsta sardínan fyrir gleypuganginn og græðgina á matarborði hinnar miklu Ameríku ?

 

Að Grænlandi gengnu inn í herbúðir Trumps, liggur ljóst fyrir að samsvarandi rök fyrir öryggishagsmunum Banda-ríkjanna gætu gilt fyrir hvaða landtorfu sem er í veröldinni, eða sem sagt fyrir afganginn af heiminum ! Þá ætti líka flestum að verða ljóst, og það jafnvel vanhugsandi vesalingum og það jafnvel á Íslandi, að skilningur bandarískra stjórnvalda í dag á lýðræði, er greinilega eitthvað allt annað en afgangurinn af heiminum telur það vera !

 

 

,,Nýja Kalmarsambandið“ og glóruleysisgangan !

 

 

 

 

Við Íslendingar erum nokkuð sérstök þjóð þó við teljumst til örþjóða. Það finna meira að segja ýmsir aðrir en við sjálfir og löngum er margt hjalað um landann, bæði innanlands og erlendis. Stærstur hlutinn af því afþreyingar málæði er náttúrulega hégóminn einber, en eitthvað verður fólk að hafa fyrir stafni og aldrei getur allt af því verið vitlegt sem þá er gripið til. Sumir segja ,, betra er illt að gera en ekkert“ en ekki er ég nú sammála þeirri speki og vísa henni til sinna vafasömu föðurhúsa !

 

En sem sagt, við Íslendingar erum sannar-lega með réttu örþjóð, þó minnimáttar-kenndin hafi – svona af og til í það minnsta, – smitað okkur af andstæðunni sem er auðvitað stórmennsku-brjálæði. Við ætlum oft að sigra heiminn, reyndum það jafnvel í eitt sinn í fjármálasnilli, sem reyndist svo bara botnlaus lántaka ófyrirleitinna skólastráka í innlendum og erlendum bönkum. En jafnvel forseti lýðveldisins trúði á þá snilli og sagði þar margt ókomið enn. Og einn ráðherra, sem enn dansar á valdagólfinu, úthúðaði dönskum manni sem var gagnrýninn á snilldina, en sá var nú bara raunsær eins og Dönum var oftast tamt að vera !

 

Á síðustu árum höfum við svo með stórmennskubrjálæðislegum töktum blandað okkur inn í stórveldaslaginn og lagt þar líklega af mörkum ófáa milljarðana til vígreifra vopnakaupa og annarra hernaðar-þarfa, að sögn fyrir lýðræðið í heiminum. Við sönnuðum þar rétt einu sinni, að við erum voldugusta smáþjóð í heimi, en að vísu á öfugum nótum !

 

Við stofnuðum líka nýlega til sérstaks innviðaráðuneytis, sennilega vegna þess að helstu innviðir okkar voru þá að hrynja og eru það enn. Vegakerfið er gatslitið vegna ofkeyrslu, heilbrigðiskerfið á hliðinni og alls staðar vantar peninga til að berja í brestina. Þar að auki er Nató skattheimtan orðin nokkuð íþyngjandi fyrir ríkishaginn, jafnvel fyrir örþjóðar-stórveldi af okkar einstöku gerð. En íslenskur mikilleikur er auðvitað sem fyrr verulega afstæður og að auki stærð-fræðilega óútreiknanlegur !

 

Eftir nokkra daga tekur Donald Trump við völdum í Bandaríkjunum og fyrirrennarinn fer líklega á elliheimilið þar sem hann hefði átt að vera síðustu árin, ef allt hefði verið samkvæmt náttúrulegum niður-stöðum. En hvað kemur til með að gerast við þessi merkilegu tímamót ? Þeir sem hafa trúað því statt og stöðugt allt fram að þessu, að Trump væri ofurmenni, verða fljótt fyrir herfilegum vonbrigðum og Ísland verður líklega að senda sérsveitarlegan viðreisnar-herafla til Úkraínu !

 

Norðurlöndin, sem virðast öll komin í hamslausan hergír, þurfa sennilega þegar á heildina er litið, að vígbúa þegar í stað 75 - 100 fullmannaðar herdeildir, og senda þær sömu nauðbjargarleiðina til frelsunar lýðræðinu, í hinni lýðræðislausu Úkraínu. Þar með getur Nató trúlega andað léttar, vitandi að hörðustu mál dagsins, stríðsmálin sjálf, eru komin í sterkari hendur. Kalmarsamband nútímans virðist nefnilega gengið til öruggrar forustu til varnar allri hinni gífurlegu stjórnmála-spillingu í Vestur-Evrópu, jafnt í Úkraínu sem Brussel !

 

Sennilega á svo að taka norræna sigurstefnu, beint frá Kursk inn á mitt Rauða torgið í Moskvu, þar sem Selenski verður líkast til hylltur af nýja Kalmarsambandinu, í svipuðum stíl og þær Kata og Kolla hylltu hann í Kiyv fyrir ekki svo löngu. Eða er ekki svo ?

 

Nei, því miður, það gerist víst ekki, draumsýnir eiga ekki samleið með neinum veruleika, jafnvel ekki norrænar draum-sýnir. Og auðvitað er það alfarið bölvuðum Rússunum að kenna eins og allt annað. Jafnvel nýja Kalmarsambandið er - satt best að segja – skelfilega hrætt við mannætur Moskvuvaldsins, og þá svakalegu hervæðingu sem sögð er komin á fullt í Rússlandi á þrískiptum vöktum allan sólarhringinn !

 

Hernaðaruppfærslutíðindin að austan geta þannig jafnvel hrist móðinn úr voldugustu smáþjóð í heimi, sem ætlaði sér víst fyrir tiltölulega skömmu að trekkja upp gangverkið í Bandera-klúbbnum í Kiyv. Já, og það bara fyrir atbeina funandi forseta-faðmlaga tveggja topp-píu-glansnúmera frá örþjóðar-eyríki norðurhjarans. Og nýlega hefur enn ein topp-pían frá Íslandi og líklega ein af nákvæmlega sama tagi, flogið út til að endurnýja faðmlögin við hina lýðræðislausu ráðamenn í Kiyv !

 

Og í ljósi allrar þeirrar vitleysu sem í gangi er og illrar meðferðar á íslenskum þjóðarfjármunum, er skiljanlega hreint ekki svo galið af einföldum Íslendingi að spyrja :

Erum við Íslendingar ekki farnir að spila okkur á öfugum nótum út úr allri lifandi músík heimsbyggðarinnar, og farnir að þrautspila þungarokks fantasíuna sem kann að vera undanfari endanlegrar brot-lendingar íslensku þjóðarinnar og íslenskra þjóðarhagsmuna, í gegnum brunandi hraðferð, niður á við, beint á ónefndan ógæfustað ?

 

 

 

Litlar, leiðitamar þjóðir !

 

 

 

Bretar þóttu eiginlega lengi vel allra þjóða útsmognastir í því að draga nýlenduþjóðir á asnaeyrunum með loforðum og gylliboðum sem sjaldnast náðu til veruleikans. Síðasta mannsaldurinn hefur þó komið mjög afgerandi í ljós, eins og í flestu af því sem til vansa er, að þar hafa Bandaríkin farið langt fram úr þeim, og ólíklegt er að nokkur þjóð eigi nokkurntíma eftir að sækja lengra í óheiðarlegra og svívirðilegra framferði gagnvart öðrum þjóðum en einmitt þessir ,,Lærisveinar Breta númer 1 !“

 

Bandarísk alríkisstjórnvöld hafa mjög ástundað það í áratugi að taka yfir sjálfstæði smáþjóða með þeim hætti að forustumenn þeirra gera sér í fæstum tilfellum grein fyrir því að sjálfstæði þeirra og þjóðlegt frelsi er farið. Það virðist orðið svo eðlilegt framhald mála í augum slíkra minileiðtoga að koma fram sem viðhengi Bandaríkjanna, að það telst víst engin þörf að láta slík mál fara fyrir utanríkismálanefnd eða jafnvel sjálft þjóðþingið !

 

En smáríkjaforustumenn belgja sig oft allra manna mest út af þjóðernishroka og þúfnakóngadrambi og þykjast jafnan tala fyrir hönd sjálfstæðustu þjóða í öllum heiminum. Minnimáttarkennd þeirra hefur þá iðulega snúist upp í stórmennsku-brjálæði og íslenskir forustumenn hafa sumir hverjir fengið alvarlegan snert af slíkri sýkingu eins og slepjuleg ummæli þeirra á upptrekktum hátíðastundum hafa oft og tíðum borið með sér !

 

Íslendingar hafa svo sem vitað er, stundum fengið hástemmt hrós frá bandarískum stjórnvöldum fyrir afskap-lega mikla þægð. Við erum sagðir vera vinaþjóð, jafnvel staðföst vinaþjóð, og það hefur komið fyrir að sjálfur Bandaríkjaforseti hafi tekið á móti íslenskum ráðamönnum með brosi á vör, um leið og hann hefur viðrað hundana sína. Það er líklega ekki ónýtt að fá að njóta slíkrar náðar, svo maður tali nú ekki um viðurkenninguna sem í henni felst, hjá heimsdrottnum hinnar algóðu forsjónar, sem situr að mati heilaþveginna þægðarskinna í Hvíta húsinu í Washington !

 

Allar þjóðir eru jafnan metnar af öðrum þjóðum á grundvelli dyggða sinna og þeirrar kröfu sem þær dyggðir geta gert til virðingar. Það er hinsvegar ljóst að sú innistæða okkar erlendis hefur rýrnað umtalsvert í seinni tíð, vegna þess sem kalla mætti að sé okkar eigin gildis-felling á dyggðum okkar og sjálfstæðis-legri reisn. Menn geta nefnilega ekki hegðað sér eins og þeir séu einir í heiminum og geti gefið skít í álit annarra, hvernig svo sem þeir hlynna að sínum heimagarði og bregðast eigin dyggðastefnu !

 

Allt hefur nefnilega sitt andstæða mat og tvennt er jafnan til þegar mál eru skoðuð og gerð upp. Stundum er því talað um sumar þjóðir sem alveg heilalausar tagl-hnýtingadruslur bandarískrar heimsvalda-stefnu. Þá er líka vísað til slíkra sem lítilla, leiðitamra þjóða, sem eigi sínar viðkomumála skúffur í einhverjum skáp í bandaríska alríkis stjórnkerfinu, undir tilvísunarorðum sem kunna að vera eitthvað í líkingu við skammstöfunina CPU, sem stendur þá fyrir eitthvað sambærilegt við „Complete Property of USA“ !

Er herleiðing Flokks fólksins að hefjast..... ?

 

Íslenskar samsteypustjórnir hafa löngum fengið það orð á sig, að þar hafi einhver aðilinn að samstarfinu verið svona fyrst og fremst til uppfyllingar varðandi þing-mannatölu og meirihlutatryggingu á alþingi. Menn geta velt því fyrir sér hver kunni að vera í því hlutverki í þeirri ríkisstjórn sem nú hefur sest í valda-stólana ?

 

Fyrr á árum var sjálfstæðisflokkurinn, í krafti stærðar sinnar, eins og eitruð planta fyrir alla samstarfsflokka. Hann bólgnaði út við að hafa ríkisstjórnar-valdið en samstarfsflokkarnir minnkuðu að sama skapi. Þeir urðu yfirleitt alltaf ósköp leiðitamir við íhaldið og urðu svo að gjalda fyrir það. En nú er margt breytt í pólitískum efnum og flestar fyrri stefnufestustoðir orðnar í lausara lagi og undirstöðujarðvegurinn lítið annað en sandur !

 

Hið fasta flokksfylgi fyrri ára er liðin tíð og nú virðist nánast allt kjörfylgi vera á fleygiferð í samfélaginu, líklega eftir því hver er talinn bjóða best. Þjóðin virðist að margra mati verða stöðugt tækifæris-sinnaðri og opnari fyrir markaðslegum tilboðum. Gamli Framsóknarflokkurinn virðist til dæmis ekki sérlega markaðshæfur tilboðsgjafi lengur. Hann er orðinn litli flokkurinn á þingi og líklegur til að verða það áfram uns hann dettur þar út endanlega sem leifar frá liðinni tíð !

 

Íhaldið í landinu er hinsvegar orðið þrískipt fyrirbæri. Það er hið ættar-tengda, bláa íhald í gamla sjálf-stæðisflokknum sem svo lengi réð þar öllu, en nú er flokkurinn varla lengur helmingur þess sem hann var og íhaldið þar því svipur hjá sjón !

 

Svo er verslunar og Brusselþjónkunar-íhaldið, sem virðist mjög sérhagsmuna-drifið klofningslið úr sjálfstæðisflokknum og talið raungerast í óþjóðleika sínum í öfugmælinu viðreisn, og svo virðist nýtt, sennilega nokkuð þjóðlegt íhald í gömlu gervi, vera að rísa á legg og vinna sér stöðu, í svonefndum Miðflokki !

 

Í samanlagðri þingmannatölu þessara flokka felst svo nærri því meirihluti á þingi í þrískiptu íhaldsfylgi og kannski gætum við átt eftir í náinni framtíð að sjá slíka samstjórn sem hægrisinnað bölvunarvald gagnvart almannaheillum í þessu landi ?

 

Vinstri grænir voru síðasta samstarfslið sjálfstæðisflokksins, sem var líklega að flestra mati, herleitt af honum til óhæfuverka gegn almennum þjóðar-hagsmunum. Íhaldið fékk sýnilega í gegnum þá samninga þá stöðu, að margra hyggju, að fá að rótast um í ríkisfjármálum að vild, gegn því að tiltekin manneskja fengi að vera forsætisráðherra. Sú pólitíska herleiðing stóð að mestu í sjö ár og henni lauk með því að Vond og glórulaus íhaldsundirlægja þurrkaðist út af þingi, vegna þjóðlegrar andstöðu, og það - að nánast almennu áliti - með skömm !

 

Flokkur fólksins þarf að vera vel á verði. Hann má ekki láta nota sig til neinna ranglætisverka gegn fólkinu í landinu. Ef hann ætlar að vera varnarvirki fyrir almannahagsmuni, verður hann í það minnsta að gera sér grein fyrir að hann er kominn í stjórnarsamstarf sem býður ýmsum hættum heim og það er staðreynd !

 

Einkum vegna þess að félagsskapurinn hlýtur að teljast vafasamur, svo ekki sé meira sagt. Stefnulegur ágreiningur getur auðveldlega komið upp og þá líklega helst milli Flokks fólksins og hinna tveggja. Og það er söguleg staðreynd að þegar valkyrjur fara í hár saman er sjaldnast von á góðu. Vond og glórulaus örlög ættu vissulega að geta hrætt í hverju því samstarfi sem er kannski ekki að fullu byggt á þeim heilindum sem þyrftu að búa að baki, svo vel fari !

Um tilhneigingar til frestunar lýðræðis ?

 

 

 

Forustulið í stjórnmálum hefur undanfarin ár sýnt það í nokkuð drjúgum mæli, að það er mjög fljótt til að nýta sér allskonar uppákomur til að fresta lýðræðislegum skylduverkum, fresta kosningum og nánast öllu sem rétt er að gera, til að geta hangið í völdum lengur, annaðhvort í flokki sínum eða í ríkisstjórn !

 

Segja má, að þannig hafi allmargar ríkisstjórnir á heimsvísu farið að hegða sér sem herstjórnir, þó þær þykist samt vera lýðræðislegar. Selensky-stjórnin í Úkraínu notar til dæmis stríðið þar til að fresta öllum eðlilegum lýðræðis-kosningum. Meira að segja situr Selenski sjálfur ólöglega sem forseti, en kjörtímabil hans rann út snemma á árinu sem er að líða. Það framferði sem hann hefur sýnt hefði einhverntíma þótt vægast sagt mjög aðfinnsluvert, en nú þykja fasistastjórnir víst fínar á Vesturlöndum, en lýðræðið virðist langt frá því að vera þar í sama uppáhaldi, hvort sem talað er um Hvíta húsið, Pentagon eða Brussel !

 

Það er líklega engin ríkisstjórn á Vesturlöndum tilbúin að þjóna lýðræðinu með því að láta af völdum á réttum tíma, ef hún getur fundið sér átyllu til að framlengja valdsumboð sitt, jafnvel þó með svikum og blekkingum sé. Valdafólk sem missir umboð sitt í kosningum lýsir því gjarnan yfir núorðið, að kosningar sem það hefur beðið ósigur í, hafi verið falskar og ólöglegar og aðeins það sé með rétt umboð frá þjóðinni, samanber hegðun Trumps eftir kosningarnar 2021 !

 

Svo illa virðist nú komið fyrir ærlegum og lýðræðislegum vinnubrögðum í okkar ,,háþróaða“ vestræna heimshluta. Nægir þar alveg í sjálfu sér að benda á hvað forsetakosningar í Bandaríkjunum hafa verið dregnar niður gildislega og virðingarlega á allra síðustu árum af þeim sem síst skyldu ástunda slíkt. Og þegar fulltrúar stórveldanna niðurlægja lýðræðið með slíkum hætti, finnst öðrum valdamönnum líklega að þeir megi til með að gera það líka. Benda má á nýlegar yfirlýsingar fráfarandi forseta Georgíu sem sagðist nánast ein vera handhafi lýðræðis í sínu landi. Svona er hrokinn víða orðinn hjá upptrekktum elítusinnum !

 

Þannig er hið ofurmenntaða forustulið umheimsins stöðugt að stíga fleiri glópskuskref frá þeim gildum sem samfélagssáttmálar liðinna áratuga hafa yfirleitt gengið út frá. Með því fylgja svo afleiðingar sem enginn veit kannski sem stendur hverjar kunna að verða fyrir almenna lífshagsmuni í nútíð og framtíð, og þar getur öryggismálum heilu þjóðanna oft verið stefnt í vísan voða, ekki síst inn á við. Er kannski með slíku verið að safna saman fóðri fyrir komandi borgara-styrjaldir hér og þar ?

 

Jafnvel íslenski sjálfstæðisflokkurinn, svo lítill sem hann er nú orðinn og bókaður með litlum staf, virðist í gegnum forustu sína vilja draga dám af þessum nýju vinnubrögðum og fresta landsfundi þangað til betur árar, hvað svo sem það á að merkja. Það sýnir að einnig hérlendis er sú andlýðræðislega tilhneiging til staðar, að velta til stefnuskrám og starfsreglum, eftir því sem þurfa þykir, líklega fyrir hagsmuni þeirrar ráðamanna-klíku sem reynir að hanga sem lengst við völd. Allt framferði af slíku tagi er hinsvegar einkum fallið til að ýta undir stjórnleysi og draga úr virðingu fyrir lögum og reglum !

 

Erfitt er að skilja hvað liggur til grundvallar því að menn fari að hörfa með slíkum hætti frá því sem verið hefur kjölfesta í löggiltu skipulagi mála. Virðist þó nokkuð augljóst að um sé að ræða tímanlega tilfærslu á valdi og þá er ljóst að hún er hugsuð í þágu einhverra afla sem vilja ekki una þeim reglum sem hafa gilt og ber að vinna eftir. Líklega má þá ætla að eitthvað það sé í gangi sem fara á leynt og þjóna á sínum tilgangi varðandi yfirráð og völd !

 

Óhreinleiki hefur löngum verið fastlímd fylgja í pólitískum leikbrögðum. Orðspor manna sem stunda pólitíska loftfimleika hefur löngum þótt vafasamt og fæstir ætla slíkum mikla fylgispekt við ærlegar leikreglur. Drjúgur fjöldi stjórnmála-flokka á Vesturlöndum gengur núorðið undir svo jákvæðum og lýðskrumslegum nöfnum að þeir standa enganveginn undir þeim !

 

Að ákveðinni hyggju þess sem þetta skrifar, er litli sjálfstæðisflokkurinn á Íslandi afgerandi staðsettur í þeim hópi. Sjálfstæðisleg og þjóðfrelsisleg tenging þess flokks við mannfélagslega íslenska heildarhagsmuni hefur aldrei verið sönn og sérhagsmunir valdaætta og ýmissa fjármála-afla hafa alltaf ráðið þar ferðinni. Stundum hefur það orðið Íslandi og íslenskri þjóð til hinnar mestu ógæfu, ekki síst í þeim málum sem varðað hafa sjálfstæði og þjóðlegt frelsi okkar Íslendinga, sem fyrr segir !

 

Fróðlegt verður að vita og sjá hvernig hin nýkoppsetta Kristrúnar-stjórn kemur til með að vinna úr málum fyrir þjóðina ? Sýnilegt virðist þó þegar, að Flokkur fólksins eigi að vera litla hjólið í því gangverki. Ekki myndi það koma á óvart að samkomulagið innan þess flokks muni láta á sjá á kjörtímabilinu, vegna vaxandi innri ágreinings og ekki síður vegna ágangs samstarfsflokkanna. Flokkur sem er - samkvæmt ummælum eigin formanns, ,, stofnaður við eldhúsborðið heima hjá henni“ hlýtur að vera með nokkuð margar lausar skrúfur, sem ekki hefur gefist tími til að festa almennilega, þó hátt hafi verið talað !

Enginn friður, engir samningar, ekkert traust !

 

 

Sumir sem fjalla um stríðið í Úkraínu, tala um að semja þurfi um frið með þeim hætti að Rússar komi aftur inn í samfélag Evrópuþjóða og verði meðteknir sem slíkir. Það er hinsvegar ólíklegt að svo verði og er varla til umræðu. Það er ekkert traust eftir til að byggja á fyrir slík samskipti !

 

Það er því skynsamlegast fyrir Rússa, sjálfs sín vegna, að segja alveg skilið við Vestur-Evrópuríkin og einbeita sér að viðskipta-samböndum við ríki í Asíu og ríki í öðrum heimshlutum. Rússar hafa, eins og margsannast hefur, ekkert að sækja til Vestur-Evrópu nema svikræði og pretta-pólitík, samningarof og trúnaðarbresti. Þeir eiga því að loka vestur-glugganum alfarið !

 

Tilraunir Vesturveldanna til að brjóta Rússland á bak aftur, með víðtækum viðskiptaþvingunum og allra handa kúgunar-ferli, þjófnaði á rússnesku fé í bönkum og misbeitingu alþjóðastofnana gagnvart rússneskum þjóðarhagsmunum, hljóta að vera búnar að sýna Rússum það margfaldlega svart á hvítu hvernig innrætið er gagnvart þeim. Það er falskt, lygið og svikult og þannig hefur það alla tíð verið. Öfund og hatur hefur alltaf ríkt gagnvart Rússum hjá stjórnvöldum í Vestur-Evrópu. Sú staða var fyrir hendi löngu áður en Bandaríkin fóru að einbeita sér að því að eitra þau samskipti, enn frekar með ógeðslegri sérhæfni sinni í slíkum efnum !

 

Það voru Rússar sem stöðvuðu sigurgöngu Napóleons á sínum tíma og það voru einnig þeir sem stöðvuðu Hitler og nasismann fyrst og fremst. Það kostaði líka sitt. Þeir áttu líka sterkan þátt í því að tryggja hlutleysi annarra ríkja gagnvart stríðinu í Norður Ameríku þegar amerísku nýlendurnar voru að berjast fyrir sjálf-stæði sínu. Þeir björguðu málum 1952 fyrir Íslendinga þegar ,,bresku vinirnir“ ætluðu að brjóta okkur á bak aftur með löndunar-banni. Þeir keyptu af okkur allan fiskinn. Þá gerðu Natóvinirnir ekki neitt okkur til hjálpar, enda Bretinn að þeirra mati ólíkt mikilvægari bandalags-þjóð en við, þessar fáu hræður hér út í ballarhafi !

 

Nei, það er augljóst mál, að Rússar ættu hér eftir að skipta fyrst og fremst við heiðarlegar þjóðir, þjóðir utan Evrópu. Þjóðir sem eru miklu betri og áreiðanlegri aðilar í viðskiptum. Það eiga þeir alfarið að gera, hagsmuna sinna vegna, því vestræna auðvaldið mun aldrei reynast þeim ærlegur og sómakær viðskiptafélagi í einu eða neinu. Það er rökrétt niðurstaða fyrir þá að loka á næstu árum á öll viðskipti við Vesturlönd, sem eru sýnilega að verða úrkynjuð afgangsstærð í heiminum, sem enginn virðist lengur geta treyst í einu eða neinu !

 

Rússar eiga ekki að fara í fjárfrekar leiðslulagnir í samvinnu við vestræn ríki, ríki sem eru í Nató, til að tryggja þeim ódýra orku, og verða svo að horfa upp á að önnur Natóríki sprengi og skemmi þær sömu leiðslur, þvert á öll orð í sjálfum stofnsáttmála hins afhjúpaða árásar-bandalags. Slíkar þjóðir eiga Rússar algerlega að segja skilið við og þó fyrr hefði verið. Þær eru ekki viðskiptahæfar, sýna sig helst sem pólitísk viðrini, eru ekki verðar nokkurs trausts eða samstarfs og það er algjörlega fullreynt !

 

Nató gerir sýnilega samninga við Rússa sem og aðra með það fyrir augum að svíkja þá við hentugleika. Nató byggir ekki sam-skipti sín við aðra á neinskonar trausti, heldur á yfirgangi og kúgun. Nató er kapitalískt hagsmunabandalag en ekki lýðræðislegt frelsisbandalag. Samtrygging auðvaldsins ræður þar öllu !

 

Nató hefur étið upp alla frjálsa hugsun á Norðurlöndum og herstöðvar bandalagsins spretta þar upp eins og gorkúlur á daunillum mykjuhaug. Þeim hefur líklega fjölgað um á annan tug í Noregi á síðustu árum, enda er Noregur talinn 99,5% heilaþvegið Natóland. Það þýðir þá líklega að það sé ekki meira en 0,5% heilbrigð hugsun í Noregi og margir álíta að það láti nærri !

 

Menn eins og Fritjov Nansen fæðast ekki lengur í Noregi. Frjálshuga, ærlegir og góðir menn geta víst ekki þrifist þar öllu lengur. Þar virðast nú allir eiga að hugsa eftir fyrirskipuðum kennisetningum sem koma í massavís yfir um hafið frá Pentagon eða frá yfirvaldselítunni í Brussel og fylgja allar stríðsæsandi harð-línustefnu auðvalds og yfirgangs !

 

Nýja nýlendustefnan er alfarið hugarfóstur Natóvalds sem virðist orðið í fullri alvöru fasistasinnað og þar með virkilega heimshættulegt og í öllu  styrjaldar-hvetjandi fyrirbæri. Hið marg-nefnda Nató varnarbandalag virðist gjörsamlega horfið og árásarsinnað bandalag komið í staðinn sem ógnar öllum heiminum. Styrjöld í líkingu við þá ógn sem nú virðist eiga að vekja upp til veruleikans, hefur aldrei áður ógnað mannkyninu, enda getur hún orðið til þess að drepa allt líf niður í þessari veröld okkar – að fullu og öllu !

 

Hvar er Evrópufriðurinn sem Nató átti að tryggja ? Hvar er öryggið og allt það góða sem átti að koma með tilkomu Nató ? Hvað varð um öll þau miklu hamingju-loforð sem gefin voru ? Hafa þjóðir í þessum heimi nokkurntíma verið dregnar eins áfram á asnaeyrum, eins og þjóðir Vesturlanda á þessum síðustu og verstu tímum - af Natóvaldinu ? Og nú virðist helsta jólagjöfin frá Nató til aðildarþjóðanna, vera miklu meiri kröfur um fjárhagslegan stuðning og stóraukna skattheimtu, líklega fyrir hina komandi lokastórstyrjöld mannkynsins, sem virðist heillum horfið ?

 

Sú virðist eiga að vera niðurstaðan eftir nærri áttatíu ára samfelldar blekkingar og linnulausan heilaþvott í nafni hinna almáttugu Nató-máttarvalda. Þau virðast líka stefna að því að koma upp risavaxinni herstöð í Rúmeníu og þessvegna eru yfirgangs-vinnubrögðin gagnvart því ríki orðin eins ógeðsleg og þau eru. Það er sannkallað stríðsæsingaskrímsli risið upp enn á ný í þessum heimi okkar, skrímsli sem virðist horfa með köldum augum til allsherjar tortímingar alls þess sem lífið stendur fyrir !

 

Vesturlönd eru nú undir hættulegustu valdstjórn sem þar hefur þekkst frá upphafi og árásarbandalagið Nató er prímus mótor í því ferli öllu. Hitler sjálfur myndi líklega fagna manna mest ef hann gæti séð stöðu mála í dag. Sú staða er eins og nýr turn nasisma og mannhaturs sem kallar eftir yfirgengilegri slátrunar-hátíð á vegum djöfulsins. Á viðbjóðurinn aldrei að eiga sér nein takmörk í þessum gjörspillta, vestræna heimi okkar ?

 

 

 

Athyglisverð orð :

 

 

Óróleiki er í Þýskalandi vegna

 

stjórnarstefnu sem er ekki

 

vinsæl !

 

Gerd Schultze-Rhonhof hershöfðingi f.1939, talar:

 

„Góðan dag, kæru áheyrendur!

Ég starfaði ekki sem hermaður í 37 ár til að tryggja frið í Þýskalandi, til þess að horfa nú aðgerðalaus á, á meðan Þýskaland smám saman innleiðir þátttöku í óþarfa erlendu stríði !

 

„Spekingarnir okkar þrír,“ Scholz kanslari, ráðherrarnir Lindner og Dr. Habeck, neituðu allir herþjónustu á yngri árum sínum til varnar stjórnarskrár, frelsi og lýðræði Þýskalands. Þeir verja nú meira en 10 milljörðum evra á ári af skattfé í „frelsi, lýðræði“ og vestræn gildi í erlendu ríki sem hvorki er lýðræðislegt né stendur fyrir vestrænum gildum. Þeir nota skattfé okkar og til að draga á langinn stríð sem er nú orðið tilgangslaust.

 

Úkraína er á engan hátt lýðræðisríki og gildi þess eru ekki okkar gildi. Ellefu stjórnarandstöðuflokkar eru bannaðir í Úkraínu. Zelensky hefur bannað forseta-kosningarnar sem áttu að fara fram í mars 2024. Í Úkraínu eru allir fjölmiðlar samstilltir. Engar gagnrýnar fréttir frá úkraínskum blaðamönnum um Úkraínu eru leyfðar. Í Úkraínu eru pólitísk morð algeng. Úkraína er eitt af spilltustu ríkjum í Evrópu (samkvæmt Transparency International). Það er algengt í Úkraínu að kaupa sig undan herþjónustu. Úkraína skartar löngum lista yfir brot á alþjóðasamningum og brot á sáttmálum og alþjóðlegum samþykktum. Tegund og tíðni stríðsglæpa Úkraínu er einnig mjög há. (samkvæmt skýrslu ÖSE frá 29. júní 2022) !

 

Þessi Úkraína er hvorki lýðræðisríki né stendur fyrir okkar gildum, eins og þýskir fjölmiðlar og meirihluti stjórnmálaflokka reyna að láta okkur trúa. Túlkunin sem okkur er boðið upp á af opinberum aðilum að Úkraína hjálpi við að verja okkar gildi, er jafn fáránleg og „varnir Þýskalands í Hindú Kúsh“ sem Struck talaði um.

Hugmyndin um hugsanlega sameiningu tveggja stríðandi hluta þessarar þjóðar, austur og vestur er draumkennd heimska !

 

Ákafi meirihluta þýsku flokkanna til að hjálpa Úkraínu til sigurs með fjár- og vopnaaðstoð minnir mig á yfirlýsingu rússneska hershöfðingjans Alexander Lebed, sem sagði á meðan fyrsta Tsjetsjena-stríðinu stóð: „Leyfið mér að kalla til eina deild af sonum elítunnar og stríðinu lýkur daginn eftir.“ (Lebed var misheppnaður forsetaframbjóðandi í Rússlandi árið 1996.)

 

Önnur spurning sem hér kemur til umræðu er hvort Rússneska sambands-ríkið hafi í raun ógnað Vestur-löndum síðan það dró sig til baka frá Mið-Evrópu, eða jafnvel einhverju einu NATO-landi eða öðru nágrannaríki eftir upplausn Sovétríkjanna ?

 

Þannig eru viðvörunarorð þessa gamla þýska hershöfðingja sem ofbýður hvernig haldið er á málum í dag.

Athyglisverð ábending frá manni sem þekkir til hlutanna.

 

Efni gripið upp af blogginu sem full þörf er að endurvarpa.

 

 

 

 

 

Valkyrjustjórn eða valkvendastjórn ?

 

 

Það er auðvitað ekki æskilegt að gera því skóna að illa takist til með þá stjórnar-myndun sem nú er verið að reyna, en víst er þó að margt getur þar brugðið til beggja vona. Líklegt þykir mér að Flokkur fólksins eigi þar mest á hættu. Flokkur sá er til kominn að mestu vegna óánægju kjósenda með aðra flokka, og því ekki ennþá kominn með þá samhentu einingu sem rík þörf er á, þegar ganga skal til stjórnarsamstarfs. Það mun hætt við að ýmsar brotalamir komi fljótt í ljós innan flokksins af þeim sökum !

 

Það velkist enginn í vafa um það, að Inga Sæland er skörungur til orðs og æðis. En er hún formaður sem getur haldið flokki sínum saman þegar fer að gefa á bátinn, því það mun gefa á bátinn og líklega fyrr en seinna ? Hversu samstillt mun þinglið Flokks fólksins verða ? Þar kunna að vera uppi ýmis sjónarmið sem eftir er að samræma, enda hefur lítill tími gefist til þess. Við slíkar aðstæður mun reyna verulega á hæfni formannsins til að halda flokknum saman og leysa þau margvíslegu vandamál sem hljóta að koma upp. Hafa má í huga, að Flokkur fólksins stækkaði nú ekki á þingi við Klausturbarsdýfuna !

 

Það er talað um valkyrjustjórn ? Ef þessar þrjár forustukonur ætla að hegða sér sem valkyrjur í þessu stjórnarsamstarfi, býð ég ekki í friðinn á komandi stjórnar-heimili. Hann verður þá varla mikill. Ætli það verði ekki meiri þörf á að sýna samstarfshæfni, gagnkvæman skilning og vilja til að láta hlutina ganga með vaxandi trausti milli aðila, en að viðhafa einhvern brussugang, yfirgang og frekju, með stöðugum tilraunum til að valta yfir annarra sjónarmið og ráðskast með allt ?

 

Það má reyndar segja, að við þessa stjórnarmyndunartilraun hafi þær forustu-konur sem hér er verið að fjalla um, fengið einstakt tækifæri til að sýna hæfni sína við slíkt verkefni. Það er því nokkuð í húfi fyrir þær, og mikilvægt mál fyrir pólitískan feril þeirra, að þær geti staðist það próf með trúverðugum hætti. Það munu þær líka allar vita, en reynslan mun leiða það í ljós hvernig til tekst. Það er nefnilega ekki nóg að langa til að standa sig – það þarf líka að hafa getu til að standa sig !

 

Líklegt er að þeir séu allmargir sem eru ekki nema hóflega bjartsýnir gagnvart þeim möguleika að þessir þrír flokkar nái saman með skynsamlegu og skipulögðu samstarfi. Það þarf nefnilega að semja um fleira en ráðherrastólana. Það er heldur ekki nóg, að fólk vilji komast í þá aðstöðu að hafa völd !

 

Það þarf umfram flest annað að fylgja þeim framgangi eftir, með ábyrgð, festu og hæfni, og það af ákveðni í þágu íslensku þjóðarinnar sem mun fyrst og fremst gjalda þess, ef illa tekst til !

 

Flestum er ljóst að íhaldið hefur verið allt of langan, órofinn tíma í ríkisstjórn landsins, enda sér þess merkin á mörgu. Vg tryggði íhaldinu margra ára viðbótar valdavist með því að læsa eigin stefnu niður í innsiglaða skuldaskúffu. Þjóðin krafðist að lokum uppgjörs á þeirri skuld við kosningarnar 30. nóvember síðast-liðinn. Vg féll út af þingi, enda gat ekki öðruvísi farið. Stefna Katrínar Jakobs-dóttur hlaut að fá sinn dóm. Slíkan dóm flýja menn ekki, ekki einu sinni í baðstofuhitann á Bessastöðum !

 

Nú er að sjá hvort það tekst að halda íhaldinu utan stjórnar og koma á laggirnar stjórn sem verður gagnleg fyrir þjóðina og hagsmuni almennings í þessu landi. Sérhagsmunaöflin hafa nógu lengi setið að fullsælu á ríkisjötunni og fjármála-ráðuneytið verið í réttnefndum trölla-höndum á sama tíma. Veður eru jafnan válynd í pólitíkinni og gagnvart slíkum ávinningi, að koma hér á almennings-vænni og réttsýnni hagstjórn, er því miður ekki unnt að vera nema mjög hóflega bjartsýnn !

Hverfum ekki inn í hringiðu hégóma og græðgi !

 

 

Athyglisvert er, að við nánast alla umræðu á samfélagsmiðlum og hvar sem mál eru krufin og rædd, virðist yfirgnæfandi hluti þeirra sem blanda sér í málin, vera beinir hagsmunaaðilar. Það er því sjaldnast verið að ræða á hlutlausum forsendum og meta með þeim hætti kosti og galla hvers máls fyrir sig !

 

Flestir virðast fyrst og fremst og öllu heldur vera að meta sína krónulegu hagsmuni og sannleikur málsins í hverju tilviki kann að vera víðsfjarri. Umræðan virðist þannig öll falla undir það að verið sé að fiska eftir peningalegum ávinningi. Hverskonar umræða er það ?

 

Er ekki hægt að ræða neitt mál á grundvelli þess hvað kann að vera samfélagslega gott og hvað slæmt ? Þurfa alltaf einhverjir græðgismálafingur að letra sitt á vegginn til að drýgja sitt sérgæskufulla og mjög svo  einstaklings-bundna gróðahyggju pund ?

 

Getum við ekki lengur komið að málum á félagslegum forsendum, er allt orðið svo mengað af frjálshyggju, markaðsórum og græðgisfullum kapítalisma ? Á engin heilbrigð framtíð að bíða barnanna okkar, verður hlutskipti þeirra óhreinleikinn einn ? Það er ekki bjart framundan og býsna fyrirferðarmikil og óhrein fjármagnsöfl virðast staðráðin í því að gera framtíðarmyndina sífellt svartari !

 

Mér finnst samfélagsumræðan ekki lengur vera á neinum hugarfrjálsum nótum. Það virðist vera búið að einkavæða hana í þágu græðgisaflanna í verslun og viðskiptum. Menn virðast bara tala út frá veskinu sínu. Er öllu íslensku samfélagsfrelsi kannski orðinn markaður bás með þessum hætti ?

 

Er kapítalisminn kannski búinn að hengja allt hugarfrelsi og umþenkingar út frá því, á öllum sviðum þjóðlífsins ? Það mætti sannarlega ætla það, eftir þeim ummerkjum að dæma, sem við augum blasa. Hugsun manna virðist stöðugt vera að verða þrengri, enda fer jafnan svo þegar buddunnar lífæð slær í brjóstinu og allt lífið á að felast í því sem algeru forgangsatriði !

 

Það er til fólk á Íslandi sem segist hafa breytt sínum lífsstíl og gangist nú fyrir hæglæti. Það talar fyrir því að fólk rói sig niður, geri sér grein fyrir hver séu hin raunverulegu verðmæti lífsins, og leiti eftir þeim í kyrrlátri viðleitni. Líklega mættu margir taka sér slíka afstöðu til eftirbreytni. Það er ekki mikið skynsemismál að æða svo á eftir krónum, að menn missi af lífinu í því kapphlaupi !

 

Lífið er dýrmætt og því þarf að lifa með hliðsjón af því kjarnaatriði. Sjá fegurðina í því einfalda, njóta náttúrulegra gæða með hófstilltu hugarfari og auðga andann með heilbrigðum hætti. Þegar slík lífsafstaða er fengin, fer fólk fljótlega að fá skyn á Skapara sínum og hverfur þá frá eigingjörnum fyrri viðhorfum og öðlast nýja og betri sýn !

 

Hraði nútímans hefur fært flestar manneskjur burt frá Guði og því Eilífa lífi sem hann býr einn yfir. Við þurfum öll á því að halda, umfram allt, að nálgast Guð og gjafir hans meðan náðartíminn til þess er gefinn, en hann er sýnilega ekki mikill eftir !

 

Það hlýtur hver heilvita maður að sjá, að maðurinn í hroka sínum er enganveginn fær um að fara með þau vopn sem hann ræður núna yfir. Það styttist því í að þau verði notuð og þá hlýtur hver maður þau örlög sem hann hefur kallað yfir sig því þá er náðartíminn á enda !

Um sjálfsmorðssinnaða framvindu heimsmála !

 

Það er þekkt staðreynd úr sögu mannkynsins að styrjaldir fara oft úr böndunum, skipulagið bregst og skyndilega finna stríðsaðilar sig í stöðu sem þeim hugnast alls ekki og bjuggust aldrei við að koma myndi upp. En þá er svo komið að engin leið er til baka og of seint að sjá að sér. Menn standa bara frammi fyrir því að þurfa að bera ábyrgð á gjörðum sínum, sem þeir þó sjaldnast gera. Þeir fallast heldur á eigið sverð, taka inn ólyfjan eða skjóta sig !

 

En það eru mjög oft fulltrúar smáríkjanna sem eru iðnastir við að hella olíu á ófriðarelda. Þeir eru oft fullir af hatri gagnvart einhverri stórþjóð sem er kannski granni þeirra og sökuð um kúgun og yfirgang. Þeir reyna því að kynda undir úlfúð og óvild sem mest þeir megna. Þó hernaðarleg geta slíkra smápostula sé ekki mikil, eru áhrif slíkra rógbera og hatursdreifenda oft drýgri en ætla mætti. Þeir spúa sí og æ heift og illsku milli stríðandi aðila !

 

Þó að í flestum tilfellum séu viðkomandi aðilar fulltrúar fyrir þjóðir sem eiga allt sitt undir friði og góðum milliríkja-samskiptum, hegða þeir sér sjaldnast mikið í þeim anda. Til þess er hatur þeirra allt of djúpt og glórulaust. Fólk af slíku tagi er oft að finna sem lökustu fulltrúa lítilla þjóða og þeir skaða oft eigin þjóðir frekar en hitt !

 

En slíkir haturspostular halda víst oftast í sjálfsblekkingum sínum að engir þjóni þjóðum sínum betur en þeir. Það er því mikil nauðsyn fyrir stórar þjóðir að vara sig á slíkum óþokkum sem æsa yfirleitt mjög til blóðsúthellinga á annarra kostnað. Slíkir menn eru sagðir til í Eistlandi, Lettlandi og Litháen, þeir eru sagðir til í Georgíu og Moldovu, og miklu víðar. Þeir eru jafnvel sagðir til á Íslandi, þó ótrúlegt kunni að þykja !

 

Þó bandaríska herveldið hafi gengið á skítugum skónum um alla jarðarkringluna í áttatíu ár, staðið fyrir hryllilegum ótöldum styrjöldum, og valdið mikilli bölvun víða, hafa þau ekki alls staðar borið sigur úr býtum. Víetnamska hetju-þjóðin sigraði þau eftir tveggja áratuga ofboðslega þolraun og nýlega spörkuðu Talibanar herveldinu mikla út úr Afghanistan með skömm. Það þótti alveg með ólíkindum og sýndi hvað skakkt var þar unnið að málum !

 

Örfáum dögum áður en það gerðist, hafði Biden Bandaríkjaforseti lýst því yfir í sjónvarpsávarpi að afghanski herinn væri fullfær um að kljást við Talibana. Búið væri að fullbúa herinn að vopnum og vígbúnaði eins og best yrði á kosið af hálfu Vesturveldanna. Biden var varla búinn að sleppa orðinu, þegar hinn mikli afghanski her var kominn í fullkomna upplausn og hættur að vera til. Þar að auki var allur fyrsta flokks víg-búnaðurinn, allar hinar nýtísku morð-græjur, allt komið með skilum í hendurnar á Talibönum. Vopnabúr þeirra margfaldaðist að stærð á svipstundu !

 

Nú er sagt að Talibanar eigi auðvelt með að útvega ýmsum hryðjuverkahópum vopn og vígbúnað af þessum miklu birgðum sem Biden var svo örlátur að skenkja þeim með afghanska herinn sem afar jákvæðan millilið. Pentagon útreikningarnir ganga sýnilega ekki alltaf upp eins og þetta dæmi sýnir og sannar !

 

Biden gamli er iðinn við að ausa haturs-olíu á ófriðareldana enda valdatími hans senn á enda. Hann er líka búinn að gefa veiðimanninum syni sínum upp allar sakir þvert á fyrri orð sín og fer líklega af forsetastóli með það sem sitt síðasta afrek og hafi hann skömm fyrir það !

 

Hann verður vafalítið talinn einn af lökustu forsetum Bandaríkjanna frá upphafi og hafa þeir þó margir, ekki síst í seinni tíð, verið í meira lagi lélegir menn í manndómslegu viðmiði. Hafi forsetarnir verið úrvalseintök bandarísku þjóðarinnar, hvernig í ósköpunum eru þá hin eintökin ?