Siðleysi samstöðuleysisins !

Undanfarið hefur manni virtst svo komið að allar fréttastofur landsins ásamt ríkisútvarpi og öllu stjórnmálakerfinu sé fjandsamlegt þeim rétti fólks að fá að berjast fyrir launum sínum !

 

Allir hagsmunaaðilar sem finnast og eru mótsnúnir kröfugerð hinna lægst launuðu, eru kallaðir til í áróðursherferð í fjölmiðlum gegn Eflingu. Talsmaður ferðaþjónustunnar fær þar tíma, eigendur lúxushótela í höfuðborginni, fá þar tíma, erkiengillinn hjá SA fær þar tíma, en Sólveig Anna rétt fær að segja nokkur orð !

 

Það hefur sjaldan gerst á Íslandi að talsmenn kapítalsins séu látnir tala eins og þeir séu viðurkenndir fulltrúar verkalýðsins og viti gleggst hvað fólki kemur best. En nú er sem sérhver hugsun sé múlbundin af hálfu fjármagnsafla og allir virðast sammála um það að þeir sem lökustu kjörin hafa skuli vera í þeirri stöðu áfram og alla tíð. Heilbrigð félagskennd virðist nánast horfin í kapítalið !

 

Ekkert orð hefur heyrst til stuðnings frá ASÍ eða öðrum aðilum í verkalýðshreyfingunni. Sýnilega er búið að kljúfa hreyfinguna í mjög aðgreinda hópa varðandi launakjör og ýmis sérréttindi virðast komin í spilið sem vísa allri stéttarkennd norður og niður !

 

Sterklega má gruna, að forustumenn sumir hverjir séu langt frá því að starfa að málum af fullum heilindum. Svikræðisöflin hafa í mörgu komið upp um sig og ættu að skammast sín en kunna það sjálfsagt ekki. Efling stendur ein !

 

Hverskonar ástand er eiginlega að skapast á launamarkaði hér ?