Um Natósagnfræði og nýlendusókn í austur !

 

 

 

Íslendingar hafa löngum verið miklir sagnamenn. Í sveitum landsins hér áður fyrr voru víða til bændur sem voru að margra hyggju meiri og betri sagnfræðingar en sumir þeir fræðingar á þessu sviði sem hampa þar flestum gráðum nú til dags. Þeir vildu nefnilega bara hafa það sem sannara reyndist !

 

Nú er öldin önnur og andinn annar. Það er líka farið að skera fræðigreinar niður í ýmsa yfir og undirflokka sem eiga að tákna ákveðin sérsvið og svo fá menn auðvitað sínar sérgráður upp á það. Það má aldrei vanta til að undirstrika gildi hvers og eins á þeirri menntadýrkandi hugaröld hégómans sem við lifum á !

 

Ein undirgrein sagnfræðinnar nú til dags eða öllu heldur yfirgrein er svokölluð Natósagnfræði. Þeir sem leggja sig eftir henni verða þannig auðvitað Natósagn-fræðingar. Þeirra hlutverk virðist vera að skoða söguna í því ljósi sem Nató gefur á viðfangsefnin !

 

Krafan um rétttrúnaðar-sjónarmið virðist þar vera töluvert meira höfð uppi við og gilda meira en einföld sannleiksleit gömlu bændanna í anda Ara hins fróða og annarra frumherja íslenskrar sagnaritunar !

 

Við ættum þannig að geta séð að svo-kallaðir undir og yfirflokkar sérsviða í sagnfræði geta verið varasamir fyrir þá sem vilja leita sannleikans. En líklega er þeim að fækka með hverju árinu sem það gera, þar sem engar kröfur eru gerðar til slíkrar ástundunar og jafnvel heldur amast við henni. Sannleiksleit á nefnilega aldrei neina samleið með imperíalískum sjónarmiðum í sögutengdum áróðri !

 

Sannleikurinn um Úkraínu-stríðið er til dæmis afar lítið til umræðu. Umræðan snýst öll um meinta grimmd og hrottaskap Rússa, yfirgang þeirra og ágang gagnvart réttmætu frelsi friðelskandi nágranna-þjóðar sem þar að auki er náin frændþjóð þeirra !

 

En af hverju eru Rússar svona vondir við Úkraínumenn og af hverju er aldrei fjallað beint um hina raunverulegu undirrót stríðsátakanna í hinni litríku fjölmiðla-umræðu Vesturlanda ? Er það kannski vegna þess að sannleikurinn er annar en látið er í veðri vaka ?

 

Fyrir rúmum 30 árum var sæmilega friðvænlegt í heiminum vegna þess að honum hafði að mestu verið skipt upp í áhrifa-svæði austurs og vesturs. Skilgreining þar að lútandi var í öllum meginatriðum virt af ráðandi öflum beggja vegna borðsins. En svo liðaðist sovéska ríkjasambandið í sundur og upplausn fylgdi í kjölfarið !

 

Allt í einu urðu kapítalistar einir um hituna í öllum málum, ekki síður í austri en vestri. Mikil gróðaveisla varð í kringum brunaútsölur á ríkiseignum í hinum fyrrverandi Sovétríkjum og alls kyns ræningjar óðu þar uppi og urðu moldríkir á svipstundu. Enginn var að hugsa um ríkis-hagsmuni Rússlands sem var þó líklega aðalerfingi þrotabúsins. Og þannig gekk  síðan ránskapurinn fyrir sig í nokkur ár !

 

Þegar frá leið þóttust vestrænir ráðamenn sjá að Rússland væri ekki svo ýkja burðugt þar sem Sovétríkin væru úr sögunni. Gamla sovéthræðslan fór því að renna af þeim. Þeir fóru síðan að velta fyrir sér nýjum möguleikum til aukinna áhrifa og valda í austri. Obama Bandaríkjaforseti sagði meira að segja, svo seint sem eftir hernám Krímskagans 2014, að Rússland væri bara miðlungsríki sem væri að reyna að spila sig meira en það væri !

 

Við þessar aðstæður þóttust Vesturveldin sjá ýmis sóknarfæri í breyttri stöðu og hugðust eins og Hitler forðum hefja sókn í austur og næla sér þar í aukin völd og nýlendur til frekara arðráns !

 

Þau hafa eignast bandamenn í úkraínskum ráðamönnum sem vilja ganga á mála hjá þeim. Þeir munu flestir hafa fengið sín laun fyrir þann stuðning en örlög úkraínsku þjóðarinnar virðast ekki á nokkurn hátt hafa verið innifalin í hinu viðskiptalega valdaframsali !

 

En í allri sinni margmilljarða dollara fjárfestingasókn í austur virðist skamm-sýnum ráðamönnunum í Brussel og Washington hafa með öllu yfirsést sú staðreynd, að það hlyti að koma að því að Rússar næðu vopnum sínum aftur og nú þegar hefur það komið í ljós og sannast með þeim hætti að allur heimurinn stendur á öndinni vegna ástandsins !

 

Framhald mála eftir aldamótin 2000 leiddi nefnilega til þess að Rússland var eftir 2010 aftur orðið gildisbært stórveldi undir eigin nafni og vildi sem önnur stórveldi umfram allt halda sinni áhrifa-stöðu alveg óbreyttri. Ásókn Vestur-veldanna til austurs og fjárhagsleg yfir-taka þeirra á ríkiskerfinu í Úkraínu hefur hleypt svo illu blóði í Rússa að þeir segjast nú til í allt. Hvað þýðir sú yfirlýsing þeirra ?

 

Hverjir eru í raun að ráðast á hvern ? Natósagnfræðin segir auðvitað að Rússar hafi ráðist á Úkraínu, sem er rétt svo langt sem það nær, en fjármálaleg innrás Vesturveldanna í landið til yfirtöku á auðlindum þess er samt orsökin !

 

Það var verið að breyta Úkraínu í leppríki Vesturveldanna með þegjandi samþykki úkraínskra ráðamanna, en ekki endilega með sama samþykki úkraínsku þjóðarinnar sem slíkrar. Þarna er því enn um að ræða átök austurs og vesturs um áhrifasvæði !

 

Vesturveldin hófu þannig ágang sem Rússar töldu sig þurfa að svara með fullri hörku og þeir hafa sýnt að þeim er alvara með það að líða ekki slíkt. Viðkvæmu valda-jafnvægi hafði þannig verið raskað og Rússar hafa sýnt að þeir munu alls ekki sætta sig við þær breytingar á fyrra valdahlutfalli sem er verið að framkvæma !

 

Natósagnfræði er ekki þeirra sterka fag nema þá í algerlega þveröfugum skilningi þess hugtaks. Þeir hafa sína andstæðu þar á móti og Rússasagnfræðin verður líklega seint vestræn fræðigrein !

 

Hvað verður er erfitt að spá um, en ljóst er að Efnahagssamband Evrópu og Bandaríkin telja sig verða að fá nýlendur sem fyrr til þess að lifa á arðráni þeirra. Arðrán hefur alla tíð verið undirstaða velmegunar Vesturlanda enda eru þau blóðsugu-arftakar Rómverjanna gömlu !

 

Rússar munu standa þar á móti með bandamönnum sínum, sem vita að röðin kemur síðar að þeim, ef Rússland heldur ekki velli. Möguleikar á stórstyrjöld eru alveg fyrir hendi þó úkraínska eldflaugin sem hafnaði á pólskri jörð nýlega hafi ekki náð að hleypa öllu í bál og brand !

 

Samt virðist Úkraínuforseti hafa gert allt sem hann gat til að fá fólk til að trúa þeirri staðhæfingu að Rússar hefðu skotið þessari eldflaug og fá þannig Nató inn í átökin sem hefði getað þýtt gjöreyðingarstyrjöld. Hvað gekk honum eiginlega til með svo hættulegum málflutningi fyrir örlög allrar heimsbyggð-arinnar ?

Pólverjar létu samt ekki lokkast og sýndu fram á að Rússar hefðu ekki átt þessa eldflaug, þannig að skýrri hugsun pólskra stjórnvalda á ögurstund er kannski það að þakka að ekki fór verr í það skiptið !

Stríðsæsingar hafa aldrei verið leið til neinna lausna í átakasögu þjóða, hvorki í gegnum Natósagnfræði eða aðra villuleiðandi sagnfræði !

 

Það er enginn hvati lengur !

 

 

 

Þegar íslenska þjóðin var að brjótast til bjargálna með stöðugu striti til sjávar og sveita, var það yfirleitt gert í þeirri frómu trú að einhverntíma myndu menn fá að njóta dugnaðar síns, þess afraksturs sem gengdarlaust strit fyrri ára gæfi af sér !

 

Og þannig varð það um skeið, þó arðrán væri jafnan mikið. Á efri árum gátu margir leyft sér eitthvað meira en áður var hægt. En nú er svo komið, að full ástæða er til að spyrja í hvað fer þjóðarauður Íslendinga ? Hversvegna er verið að spila allri velferð hérlendis út og suður vegna alls kyns ófriðarmála úti í heimi ?

 

Íslensk stjórnvöld virðast hafa tekið að sér að vera ,,samviska heimsins“ og því hlutverki fylgir hreint ekki lítill kostnaður. Þeim mikla kostnaði getum við Íslendingar aldrei staðið undir. Samt virðist sem verið sé að skapa hér einhverja séríslenska flóttamannaparadís fyrir allan heiminn og þar er sýnilega þjóðarhagsmunum Íslendinga að miklu leyti úthýst, líklega fyrir meiri og brýnni þarfir - að mati stjórnvalda !

 

Prímadonnustjórnin heldur illa á málum fyrir þjóðina og vonandi lýkur ömurlegu ráðsmennsku-hlutverki hennar sem fyrst. Forsætisráðherra getur þá helgað sig glæpasagnaritun það sem eftir er, enda verður hennar trúlega helst minnst síðar fyrir afrek hennar á því sviði, því varla verður um önnur að ræða eftir það sem á undan er gengið !

 

Nú er eiginlega ekkert lengur sem hvetur Íslendinga til að leggja hart að sér og byggja upp þjóðarbúið eins og áður var. Allir vita að arður af slíku, peningar uppsafnaðs þjóðarauðs, fara frá okkur en ekki til okkar. Þeir skila sér alls ekki til þeirra sem afla þeirra. Ríkisstjórn Íslands sér til þess alfarið frá A til Ö !

 

Allt er nefnilega svelt hér til þess að hægt sé að taka á móti sem flestum flóttamönnum. Síðasta dæmið er nöturleg staða Sjúkratrygginga Íslands þar sem forstjórinn sagði upp og treysti sér ekki lengur til að standa sína ábyrgðarvakt við síaukið fjársvelti. Það segir nú sitt þegar forstjórar á vegum ríkisins, haldast ekki lengur við í embættum sínum vegna vangetu til skyldugrar þjónustu !

 

Nú fara Íslendingar líklega að læra þá siði af flóttamönnum og hælisleitendum, að gera bara kröfur til annarra en sjálfs sín. Það er enginn hvati til annars. Það er eiginlega mesta furða hvað landsmenn hafa verið lengi að átta sig á því hvað það er miklu auðveldara að vera á annarra framfæri !

 

Nú virðast hinsvegar æ fleiri vera að grípa það að það sé tóm vitleysa að stunda vinnu, enda sé enginn leikur að fá mannsæmandi laun fyrir puðið. Miklu betra  sé því að láta aðra skaffa sér framfærsluna og vera ekki að slíta sér út fyrir ekkert. Svo Íslendingar fara trúlega að taka eins og aðrir undir mannréttindasönginn mikla og viðlagi hans : ,,Ég á rétt á þessu og ég á rétt á hinu“ !

 

En hvaðan eiga framfærslupeningarnir að koma, ef allir hætta að vinna ? Og hversvegna á fólk að vinna þegar öllu er stolið af því jafnóðum eins og gert er og lífeyrissjóðafé almennings er notað af yfirvöldum á allan hugsanlegan máta landsfólkinu til bölvunar ?

 

Ég held að við séum vitsmunalega farin að glefsa heldur mikið í eigið skott. Það er svo margt farið að verða að tómu rugli hérlendis.Inneignarlaus mikilmennskan fer að hefna sín meira en lítið senn hvað líður.Staurblind ófarnaðarstefna fjármála-heimskunnar eykst með hverju árinu og stefnir í öllu að því auma feigðarmarki að við verðum littlasta land í heimi !

Eru nógir peningar til ?

 

 

 

 

Enn hefur ekki fæðst sá auðkýfingur eða milljarðamæringur sem að eigin mati á nóga peninga. Enn hefur það ríki ekki sýnt sig í veröldinni sem á nóga peninga. Enn er ekki til það sveitarfélag á heimsvísu sem á nóga peninga og svo má lengi telja !

 

Eru nógir peningar til ? Ekkert virðist benda til þess. Mikið vill meira segir máltækið og græðgi þekkir engin takmörk. Vill Warren Buffett ekki bæta við auðlegð sína eða Bill Gates, já, eða Þorsteinn Már ? Er ekki líf þessara þriggja manna dæmi um það að lengi megi og þurfi að drýgja sjóðinn ? Og hvað með leiðtogana í Qatar, hvernig fara þeir með sitt pund eða sambærilegir furstar út um allan heim ?

 

Eru nógir peningar til ? Ef svo er, hversvegna er þá ástand þjóðmála hér eins og það er ? Allt er þar blekkingum bundið og í fölsku fari. Við Íslendingar höldum áfram að spila okkur stóra gagnvart umheiminum, guma af velferðinni hér og samt eru innviðir samfélags okkar að molna niður af fjárskorti og vöntun á skipulags-legri fyrirhyggju, einkum vegna hroka og glóruleysis ráðamanna ?

 

Eru nógir peningar til ? Það virðast reyndar vera til krónur í flóttamanna-strauminn sem flæðir inn í landið, en sannarlega ekki til að hlynna að heildar-hagsmunum íslensku þjóðarinnar. Það virðist sem sagt hægt að veita fjármunum óspart í mál sem eru í raun og veru ekki okkar mál. Við höfum nefnilega nógu að sinna þar fyrir utan og þurfum að sýna fyrirhyggju og skynsemi !

 

Eru nógir peningar til ? Svarið er auðvitað nei, en samt er ausið fé í margt til þess að halda andlitinu gagnvart útlendingum og undirstrika að við séum eiginlega enn sem fyrr stórasta land í heimi. Samt fylgja engin sannindi þeirri gyllingu sem sífellt er þó verið að flagga með óheyrilegum hroka af hálfu leiðra ráðamanna lítillar þjóðar. Kötustjórnin er orðin kvalræði fyrir 90% þjóðarinnar !

 

Eru nógir peningar til ? Eitthvað mikið vantar í þá staðhæfingu þó heilavönkuð stjórnvöld monti sig af ríkidæmi okkar og velmegun og ýti þannig stöðugt undir meiri straum flóttamanna og hælisleitenda, að koma hingað vegna þess að hér sé nóg til af öllu handa öllum. Rauði krossinn, sem virðist áhrifamesta pólitíska ráðuneytið í landinu, fer með himinskautum í fréttum sjónvarps og útvarps, í lýsingum af öllu því sem þarf að gera fyrir þá sem hingað sækja nú og eftirleiðis !

 

Eru nógir peningar til ? Er ekki löngu kominn tími til að spyrja : Hvað með okkar fólk sem er látið sitja eftir, öryrkja og fatlað fólk, geðsjúka, fólk með alvarleg veikindi, börn og gamalt fólk ? Alls staðar er vöntun á þjónustu og skyldugum aðbúnaði, dvalarheimili og skólar víða að grotna niður af myglu og skorti á eðlilegu eftirliti og frambærilegu viðhaldi húsa og mannvirkja. Rekstrarmál ríkis og borgar og fjölmargra sveitarfélaga í landinu í verulega slæmu fari og fátækt sívaxandi !

 

Eru nógir peningar til ? Af hverju gengur þá svo illa að gera samninga á vinnu-markaði fyrir launþega landsins, um hækkun launa til að halda í við síhækkandi framfærslukostnað ? Allt húsnæði er orðið miklu dýrara en nokkur sanngirni mælir með og matarkostnaður eykst stöðugt meðan þeim fækkar frá ári til árs sem ráða við hann. Á sama tíma belgir íslenska hræsnismála-ríkisstjórnin sig út og hefur áhyggjur af málum í Úkraínu og Íran !

 

Eru nógir peningar til ? Það geta aldrei verið nógir peningar til þegar farið er með þá eins og gert er á Íslandi. Auðlindir þjóðarinnar eru sem fyrr lagðar í spilltar og skítugar tröllahendur, almannahagur fyrirlitinn og sniðgenginn af stjórnvöldum og farið illa með allt sem ætti umfram allt að fara vel með !

 

Það eru sannarlega fleiri en furstarnir í Qatar sem vilja leika sig stóra á heimsvísu á kostnað allra heilbrigðra og góðra gilda !

Fjallað um alþjóðlegt brotajárn !

 

Eitt af því sem undirstrikar hvað átakanlegast afturför gömlu nýlenduríkjanna og valdabakslag þeirra í pólitík heimsins er staða Stóra-Bretlands eins og hún ætti að blasa við hverjum manni í dag í öllum ömurleika sínum og fallvaltleika !

 

Bretar hafa bókstaflega talað tapað öllu frá sinni fyrrum stórveldisstöðu nema hrokanum. Þó þeir tali ennþá niður til annarra þjóða af gömlum vana tekur enginn mark á þeim lengur. Aðeins þjóðir sem hafa enga sjálfsvirðingu bera virðingu fyrir Bretum í dag og þurfum við ekki að fara langt til að sjá það !

 

Bretar geta nú ákaflega fátt af því sem þeir gerðu í gamla daga, en það var nú flest gert vegna oftrúar þeirra á eigin mátt. Og vegna þess að aðrir höfðu sömu oftrú á getu þeirra, gekk þeim betur en flestum öðrum að arðræna aðrar þjóðir og taka á sig hina svokölluðu white man´s burden !  

 

En nú blasir aumingjaskapur Breta við hverjum manni og þeir  virðast ekki einu sinni geta komið sér upp sómasamlegum leiðtogum. Það þarf nánast að sparka þeim strax eftir embættistöku vegna vöntunar á hæfileikum. Nú hafa þeir reyndar sótt sér leiðtoga til Indlands og mikið má ætla að Nehru gamli hefði getað glaðst yfir því ef hann hefði verið ofan moldar í dag !  

 

En auðvitað væri umræddur leiðtogi ekki í Downingstræti 10 ef Bretar væru það sem þeir töldu sig eitt sinn vera og fengu aðra til að trúa að þeir væru. En Bretar eru nú fallnir niður fyrir það að teljast meðalbógar að heimsvaldagildi og þessvegna hanga þeir aftan í Ameríkönum eins og þeir hafa gert síðasta mannsaldurinn !

 

2014 eða þar um bil sagði Obama Bandaríkjaforseti að Rússar væru bara meðalbógar sem væru að reyna að gera sig digra. Þetta var náttúrulega sagt í upphöfnum bandarískum hroka, en lýsingin á hinsvegar á allan hátt langbest við Breta og þeirra stöðu !

 

Bretar voru taldir meðal sigurvegaranna í heimsstyrjöldinni síðari en sannleikurinn er hinsvegar sá að þá stóðu þeir allslausir eftir og héldu naumlega nærbrókunum. Árið 1945 var örlagaár í sögu þeirra í tvennum skilningi. Þeir unnu sinn síðasta stórsigur, en að vísu mest fyrir atbeina annarra og glötuðu endanlega fyrrum stórveldis-stöðu sinni. Bandaríkja-menn tóku yfir öll völd og Bretar urðu bara að láta sér það lynda og hlýða yfirvaldinu !

 

1956 kom hin nýja skipan berlega í ljós þegar Bretar ásamt Frökkum ætluðu að sýna fyrri stæla með yfirgangi í Súez-deilunni. Bandaríkjamenn sögðu þeim bara að hypja sig heim, ef þeir hlýddu ekki yrðu öll lán þeirra í Bandaríkjunum gjaldfelld með það sama. Og Bretar hlýddu og Frakkar hlýddu. Snáfuðu heim með hersveitir sínar eins og barðir hundar !

 

Bretar eru samt ekki sama þjóðin og þeir voru 1945. Þeir eru orðnir fjölþjóðahræringur samveldisins og verða seint einhuga héðan af. Orð Einars skálds Benediktssonar í kvæðinu Tínarsmiðjur ,,Þegar býður þjóðarsómi þá á Bretland eina sál“ eiga því enganveginn við lengur. Sic Transit Gloria Mundi !

Það var líklega aldrei nein sérstök ástæða fyrir aðrar þjóðir að bera virðingu fyrir Bretum og enn síður og síst af öllu á það við í dag !

 

Skotum skal haldið til hlýðni !

 

Skotar sem guggnuðu á því að greiða atkvæði með eigin sjálfstæði 2014 vilja nú fá annað tækifæri til að kasta af sér húsbóndahelsinu. En nei,nei, Hæstiréttur Bretlands hefur komist að þeirri niðurstöðu að það sé ólöglegt og ekki í boði. Af hverju skyldi það nú vera ?

 

Af hverju er frelsi fólks til að ráða eigin örlögum á Vesturlöndum ekki til umræðu ? Jú, það má ekki veikja vestræn ríki. Það þarf að styrkja þau. Skotar og Walesbúar verða að búa við ætlað forræði Englendinga áfram sem hingað til, Kataloníumenn verða að búa við alla miðstýringuna frá Madrid og svo framvegis !

 

Nató vill engan klofning í þeim ríkjum sem tilheyra bandalaginu. Það má bara skapa klofning í öðrum ríkjum og þar þarf fólk hikstalaust að fá að búa við óskipulagt frelsi. Þá er betra fyrir nýlenduvald Nató að ráðskast með það. En í Vestur Evrópu ræður hinsvegar þetta sérstaka Natófrelsi, sem bannar sjálfstæði þjóða innan ríkjasambanda þar, af meintum öryggis-ástæðum !

 

Þegar afskaplega trúverðugur Hæstiréttur í London dæmir óbreyttu ástandi á Bretlands-eyjum í vil er það sagður lögmætur gjörningur, og vilji menn samt frelsi verður það ólögmætt frelsi. Yfirstjórn Nató ræður því hvað er lögmætt sjálfstæði, lögmætt frelsi, lögmætt lýðræði og lögmætt stríð !

 

Það þýðir ekki að deila við dómarann og menn verða að viðurkenna lög og reglur hins rétta valds. Einkum og ekki síst ef þeir búa í löndum sem eru ekki í Nató. Frelsi sem skekkir og veikir undirstöður valdakerfisins í Brussel, bæði hjá hinu Heilaga rómverska Efnahagssambandi og Nató, er auðvitað ólögmætt !

 

Og Skotar og Walesbúar munu vafalaust hætta því að vera með einhvern sjálf-stæðismála-derring eftir úrskurð Hæsta-réttar því þeir skilja þetta svo sem alveg og beygja sig alveg áreiðanlega fyrir því !

 

En kannski er skýringin bara sú á ergelsi þeirra, að þeir vilja helst vera nær kjötkötlunum í Brussel en Lundúnavaldið leyfir þeim að vera eins og sakir standa. Svo að í raun og veru eru Skotar ekki að gera neina uppreisn gegn hinum vestrænu máttarvöldum. Hættan er því minni !

 

En Divide et Impera, að deila og drottna, eru í raun einkunnarorð Evrópu-sambandsins og ættuð beint frá Róm. Og Nató kann vel að meta þau einkunnarorð þegar réttur og lögmætur aðili notar þau. Það segir sig nefnilega sjálft að slíkt hugtak á ekki að vera fyrir aðra, því valdið á aldrei og má aldrei fara úr réttum heimahúsum !

 

Eins og Neró talaði fyrir valdið í gömlu Róm talar Nató nú fyrir valdið í nýju Róm. Öll ríki eiga að klofna og verða lítil og viðráðanleg utan heimavallar hernaðar-bandalags Nató. En ríki innan þeirra vébanda mega ekki slitna í sundur fyrir hugsunarlausar og alveg ólögmætar frelsis-kröfur. Vestrið þarf að vera sameinað og sterkt samkvæmt bestu Brussel-stöðlum eða þannig !

 

Skotar fá því ekki sjálfstæði, því það er ólögmætur gjörningur hvað sem Nicola Sturgeon og hennar hyski rífst og skammast. Vald yfir Skotum á hvergi betur heima en í London, nánar tiltekið í hinum háa Hæstarétti hinna frjálsu og sameinuðu Bretlandseyja !

 

Á Íslandi er kerfið svipað enda erum við í Nató. Seðlabankinn vill engar launa-hækkanir, fjármálaráðherra vill engar launahækkanir og kannski á Hæstiréttur bara eftir að úrskurða að launahækkanir alþýðu manna séu ólögmætar. Er þá ekki allt í réttu Natófari og enginn að rugga bátum eða spilla alræði hins rétta valds ?

Trumpinn ætlar fram aftur !

 

 

Sumir eru þannig gerðir að þeir vita hvorki sinn vitjunartíma né hvenær hann er liðinn. Þeir vita þannig ekki hvenær tækifærið eina er í þeirra höndum eða hvenær þeir hafa glutrað því niður. Einn slíkra manna er hinn sjálfumglaði og mikilláti Donald Trump !

 

Trump fékk sitt tækifæri, en fór illa með það. Hann treysti á að hann hlyti endurkjör og þessvegna hefur hann ekki enn getað sætt sig við ósigurinn. Enn tuðar hann um að svik hafi verið í tafli og grefur þannig undan öllum stofnunum lýðræðis í eigin landi !

 

En veðrabrigði verða skjótt og pólitískir vindar blása úr ýmsum áttum og nú gera þeir varla annað en að feykja Trump út af aðalsviðinu. Nýir menn og yngri eru að koma fram til leiks fyrir Republikana-flokkinn. Þeir telja Trump vera farinn að skaða flokkinn og hann eigi að kunna sér hóf og víkja til hlés. En Donald Trump hefur aldrei kunnað sér hóf og lærir það varla héðan af !

 

Hann er að verða nokkurskonar vandræðabarn flokksins. Menn þar á bæ virðast þegar vera farnir að hugsa með sér í ergelsi : ,,Hvað á að gera við manninn ? Hann er alls staðar farinn að verða okkur til vandræða.“ Og víst virðast það orð að sönnu eins og sakir standa !

 

Þeir sem ætla sér að styðja Donald Trump í komandi forkosningum og þá áfram sem forsetaframbjóðanda, hljóta að hafa einhverjar afbrigðilegar skoðanir á lýðræðislegum lausnum eins og hann virðist sjálfur óneitanlega hafa. Árásin á þinghúsið segir sitt um hvaða öfl voru þar að verki og hvaðan hvatningin kom !

 

Bandaríkin eru búin að lifa sitt fegursta og það hafa þau gert með ýmsum hætti á kostnað umheimsins. Fá ríki hafa á seinni öldum sýnt annan eins hroka gagnvart öðrum ríkjum og Bandaríkin !

 

Það þarf eiginlega að fara aftur til háveldistíma Rómaveldis til að finna  raunverulegan samanburð í þeim efnum. En slík hrokatímabil geta aldrei orðið langvinn. Rómaveldi varð eigin upplausn að bráð og það munu Bandaríkin líka verða í fyllingu tímans, enda merki þess farin að sjást nú þegar !

 

Heimurinn er auðvitað langt frá því að vera eins og æskilegt væri, en forsjónin forði þjóðum jarðar samt frá því að Donald Trump fari aftur í Hvíta húsið. Hann á ekkert erindi þangað. Það væri einna líkast því að við Íslendingar sendum einhvern útrásarvíking með dökka fortíð að Bessastöðum og þó í alla staði verra !

 

Það yrðu hræðileg mistök hjá Republikönum ef þeir veldu Trump sem frambjóðanda sinn við næstu kosningar. Um það yrði hægt að fara með hið fornkveðna stef: ,,Ólafur afturgenginn, er Ólafur verri en fyrr“ !

 

Valdatími Trumps er og á að vera fortíð, en Bandaríkin og veröldin öll þurfa að læra af mistökum þeirrar fortíðar svo þau verði ekki endurtekin öllum mannheimi til tjóns og skelfingar !

 

 

 

 

Ekkert ólöglegt stríð í álfunni einu !

 

 

 

Það er athyglisvert hvað fólk hérlendis sem og annarsstaðar í Evrópu virðist alltaf hrökkva illa við þegar einhver stríðsátök verða í álfunni einu ! Það er hinsvegar allt annað viðhorf til stríðs á öðrum stöðum í heiminum – bara að það sé ekki í Evrópu !

 

Hvernig stendur á því að fólk virðist líta svo á að það sé nánast allt í lagi að verið sé að drepa fólk í stríði, bara ef það sé ekki í álfunni einu - Evrópu ? Og ef til stríðsátaka kemur samt sem áður í Evrópu, þá þykir það alveg voðalegt ef einhver er drepinn !

 

Í álfunni einu eiga menn líklega að vera orðnir svo þroskaðir og menningarsjóaðir að þeir eigi jafnvel að geta háð stríð með svo mannlegum hætti og svo snyrtilega - að enginn verði drepinn !

 

Ef einhverja þarf að tukta til í Evrópu í þágu friðarins, eins og til dæmis á Balkanskaganum hér um árið, þá á bara að láta Nató sjá um það. Enginn er sagður færari til að halda uppi lögum og reglu !

 

Og sé þá óhjákvæmilegt að drepa einhverja svo friður haldist, á Nató auðvitað að sjá um það. Það hefur ,,license to kill“ ef út í það er farið. Sá sem drepinn er af Nató hlýtur að hafa átt það skilið !

 

Nató er okkar James Bond ! Þegar vondu mennirnir fara að derra sig eins og þeir hafa eðli og art til, á hikstalaust að kalla 007 út í þarfir friðarins, James okkar Bond eða ígildi hans frá góðugæja-stöðinni Nató. Hann reddar öllu með ,,license to kill !“

 

Mikið er Jens Stoltenberg annars reffilegur maður. Maður á eiginlega erfitt með að trúa því að hann sé Norsari. Manni finnst alltaf að hann hljóti að vera Bandaríkjamaður. Röksemdafærslan hjá manninum er til dæmis afskaplega amerísk og þó alveg ótrúlega sérstök og slær nýjan tón !

 

Og nú vitum við það ef við höfum ekki vitað það áður. Ef Úkraínumenn gera eitthvað af sér, skjóta eldflaug annað en hún ætti að fara, fremja einhvern smá stríðsglæp eða fara í einhverju rangt í málin, þá er ekki við þá að sakast. Það er allt Rússum að kenna af því þeir réðust á landið !

 

Úkraínumenn eru í þeirri stöðu að þeir geta ekkert af sér brotið. Þeir eru í neyðarvörn og þeim leyfist því allt. Þeir hafa 100% syndakvittun frá Nató upp á það og betra öryggisvottorð er áreiðanlega ekki til í þessari voluðu veröld okkar !

 

Það er líka ljóst að ef Rússar hefja stríð þá er um að ræða ólöglegt stríð. Aðeins Nató hefur þá stöðu að geta hafið löglegt stríð. Það eiga allir sæmilega greindir menn að vita og viðurkenna !

 

Ef Rússar telja að þeir þurfi að hefja stríð einhverra hluta vegna, verða þeir því að sækja um leyfi til þess til lögmæts réttarhafa slíkra leyfa, að vestrænum skilningi, sem er að sjálfsögðu Nató !

 

Stundum hefur verið talað um stríðs-æsingamenn, en það gildir ekki þegar um Úkraínu-stríðið er að ræða. Volodimir Zelensky er því alls ekki stríðs-æsingamaður, hann er landvarnarmaður !

 

Þó hann virðist ekki sjá annað en kjarnorkustyrjöld til að bjarga Úkraínu, breytir það engu, því hann er löglegur landvarnarmaður af fyrstu gráðu. Það er alfarið Rússum að kenna, ef hann er í máli sínu að biðja um kjarnorkustríð !

 

Við íbúar Vestur-Evrópu vitum alveg að allur ófarnaður innan álfunnar einu er Rússum að kenna. Við erum alin upp við það viðhorf og það hlýtur eiginlega að vera rétt og getur ekki verið annað en rétt, enda hefur það alltaf verið rétt !

 

Ríkisstjórn Íslands samþykkir það viðhorf, alþingi samþykkir það, sjálfstæðis-flokkurinn og öll útibúin hans samþykkja það, samfylkingin samþykkir það, og það sem gildir öllu mest og umfram allt er að Nató samþykkir það !

 

Við Íslendingar höfum náttúrulega aldrei verið sjálfbjarga. Við höfum alla tíð verið eins og óskilabörn á hjarni eymdar og volæðis. Þetta hafa menn alltaf vitað í Valhöll, hjá Heimdalli og öðrum íslenskum mannfrelsis-stofnunum sem aðhyllast hægri umferð í öllu !

 

Fyrst björguðu Norðmenn okkur með konungsvaldinu sínu, svo hjálpuðu Danir okkur undir annað konungsvald, svo komu Bretar til liðs á bak við tjöldin og síðan Bandaríkjamenn á sama hátt í kjölfarið !

 

Það er mikill náungakærleikur vafinn inn í alla þá sögu eins og góðir og réttsýnir íslenskir sagnfræðingar hafa margsinnis undirstrikað og bent á í hinum sígildu ritum sínum !

 

Og síðast en ekki síst, voru svo hin miklu friðar og björgunarsamtök vestrænnar samvinnu stofnuð undir nafninu Nató og það hefur áreiðanlega að öllu leyti orðið okkur óskilabörnunum á ysta hjara til frekara lífs !

 

Sennilega hefur Natóbandalagið bara verið stofnað vegna okkar Íslendinga – eða allavega fyrst og fremst. Aðrir sem eru þar í skjóli eru því eiginlega í skjóli okkar Íslendinga en við hinsvegar í skjóli Nató. Já, þannig hlýtur það eiginlega að vera !

 

Ó, hvað það er nú gott að eiga einhvern að sem hugsar um mann, já og hugsar fyrir mann. Hvar værum við Íslendingar eiginlega staddir ef við gætum ekki allar stundir hvílt öruggir og óttalausir í hlýjum kærleiksfaðmi Nató ? Þá væri staðan sannarlega ekki geðsleg því þá væru bölvaðir Rússarnir komnir um allt !

 

Það er því engin spurning að lendi menn í klandri í álfunni einu, er það Rússum að kenna. Þeir eru minkarnir í hænsnakofunum okkar. Þeir eyðileggja friðinn sem þar á að vera og spilla öllu. Þeir eru alhliða eggjaþjófar í öllum hænsnakofum álfunnar einu !

 

Rússar sitja austast í álfunni á ótæmandi orkubirgðum, sem við - hinir saklausu íbúar Vestur-Evrópu - hefðum auðvitað átt að fá áfram á sömu útsölukjörunum. Þeir geta aldrei verið almennilegir !

 

Það er aldrei neitt réttlæti til þar sem Rússar eru annarsvegar. Þeir eru vondir menn, eins og allir góðir menn segja, enda kunna þeir ekki að meta neitt gott, hvorki Nató né annað !

 

Þannig er nú það ! Og nú þegar fótbolta-veislan mikla er að byrja, bíða hin góðu Vesturlönd og fleiri í ofvæni eftir skemmtuninni langþráðu. Skítt með þessa sex til sjö þúsund verkamenn sem hafa látið lífið vegna illrar meðferðar, kúgunar og misréttis við þrælahalds - undirbúning veisluhaldanna !

 

Er það mannfall ekki bara ásættanlegur fórnarkostnaður fyrir þá miklu skemmtun sem í vændum er ? Það er heldur ekki eins og þetta hafi verið Evrópumenn !

 

 

 

Látum ekki eyðileggja það sem áunnist hefur !

 

Íslenskt samfélag er víst, samkvæmt sumum stöðlum, alltaf að taka framförum þó að manni veitist iðulega erfitt að greina í hverju þær framfarir liggja. Mannlegu þættirnir í samfélaginu virðast sannarlega ekki vera að styrkjast og með hliðsjón af stöðu þeirra og ýmsu öðru, sýnumst við frekar stefna í vísan ófarnað !

 

Varla opnar maður fyrir fréttir án þess að heyra um illa aðbúð gamla fólksins okkar þar sem það er látið bíða hins óumflýjanlega. Það virðist víða þurfa á dvalarheimilum að líða fyrir slæm rekstrarskilyrði, búa við mygluvandræði og jafnvel vélrænt viðmót starfsfólks. Og maður spyr sjálfan sig, er þetta virkilega svona ?

 

Það virðist með öðrum orðum sannarlega engin sunnuhlíðar sæla að verða gamall í hjartaköldum íslenskum kapítalisma og bullandi frjálshyggju þar sem auðgildi yfirganga allt !

 

Og svo heyrum við ófáar hryllingssögurnar úr heilbrigðiskerfinu. Bæði af gömlu fólki og ungum börnum, sögur um rangar greiningar, tillitsleysi og þjösnahátt af hálfu lækna gagnvart sjúklingum og allskyns ógeðfelldar uppákomur sem ættu ekki að tíðkast eða líðast innan slíks kerfis og vera þar þá algjörar undantekningar sem strax væri tekið á !

 

Við virðumst þannig koma að ýmsu leyti illa fram við fólkið okkar sem er að eyða ævikvöldinu sínu í okkar skjóli. Og það er þeim mun sárara að heyra þetta, að þetta er að bitna á því fólki og þeirri kynslóð sem lagt hefur gull velferðar í okkar hendur með ævilöngu erfiði sínu. Enginn á meiri rétt til að njóta friðsældar og öryggis á ævikvöldi sínu en einmitt þetta fólk !

 

En það virðast ekki vera til peningar í kerfinu þegar líf og heilsa þessa fólks er annarsvegar. Hinsvegar eru sýnilega til nógir peningar í kringum allskyns flótta-mannamál og sjálftekna ábyrgðarmennsku Íslendinga gagnvart útlendri pólitík og styrjaldarbrölti erlendis. Þurfum við ekki að skýra það betur fyrir skyni okkar hverjir eigi í raun og sannleika að standa okkur næst ?

 

Og á alþingi, þeirri stofnun sem ég get ekki lengur samvisku minnar vegna, skrifað með stórum upphafsstaf eða borið virðingu fyrir, virðist nóg um fólk sem veltir sér endalaust upp úr vandamálum annarra þjóða og ferli alls skyns útlendra landhlaupara, í stað þess að huga að okkar fólki og okkar málum !

 

Þar virðist ekki nokkur leiða hug að því hvernig okkar eigin fólki líður eða hvað þarf að gera svo velferð þess sé tryggð, ekki síst á síðustu lífs-metrunum. Ég er farinn að skammast mín sem Íslendingur fyrir þjóðþing okkar og mér finnst það enganveginn sársaukalaust að þurfa að segja það en verð þó að gera það !

 

Það getur vafalaust verið erfitt og þreytandi að glíma við samfélagsleg vandamál af ýmsu tagi, en kjósum við ekki fólk til þeirra verka ? Er það ekki frumskylda ráðamanna okkar að vaka yfir hag þjóðarinnar og leysa vandamálin sem skapast ? Af hverju verða þau afgangsmál ?

 

Við vitum reyndar flest, að helstu meinvörpin sem hafa orðið til eru af mannavöldum og orsakast ekki síst af hræðilegri misskiptingu lífsgæða í landinu og auknu kærleiksleysi í samskiptum manna. En einmitt við þeim skilningi virðist amast helst og mest og fyrst og fremst af valdaelítunni í landinu !

 

Þar sem allt er miðað til verðs er auðvitað ekki við miklum viðbrögðum að búast. Jafnvel ekki þegar við virðumst vera að missa svo margt sem mikið var haft fyrir að öðlast á sínum tíma. En er þá ekki leyfilegt að spyrja þess í fullri alvöru, hvort enginn ráðamaður sé til í landinu sem er að fást við lausnir bjargræðismála þjóðarinnar af lífi og sál ? Erum við kannski bara með falskt forustulið ?

 

Það er sjálfsagt ólíkt skemmtilegra, að sumra áliti, að skrifa glæpasögur, en reyna að bæta þjóðfélagsmeinin. En þurfum við ekki öll að hafa hugsun á því að hindra, að það verði ískaldur veruleiki að samhjálp og náungakærleikur hverfi úr íslensku samfélagi ? Þurfum við ekki öll að koma í veg fyrir það - að lífsafkomusaga íslensku þjóðarinnar nú á dögum verði að lokum eins og ein allsherjar glæpasaga ?

 

Við virðumst stefna óðfluga að því að samfélag okkar verði kjörsvið og leikvöllur hroka og yfirgangs, þar sem fáir geti níðst á mörgum, þar sem rándýrin fái umfram allt að leika sér. Það segir sig sjálft að slíkt samfélag getur aldrei verið æskilegt fyrir börn og gamalmenni, enda verða þau þar fyrstu fórnarlömbin og virðast þegar orðin það !

 

Gerum okkur ljósar þær hættur sem felast í mannfjandsamlegum samsteypum auðs og valda og stöndum vörð um almannahag. Látum ekki gamla fólkið okkar deyja með brostin hjörtu og verjum unga lífið svo það geti átt þess kost að eiga heilbrigða ævi í hlýju samfélagi !

 

 

 

Vangaveltur um lygar og lýðskrum !

 

Af hverju skyldu Vesturveldin í öllum sínum áróðurstækjum alltaf tala um stríðið í Úkraínu sem stríð Mr. Putins ? Var Viet-nam stríðið þá stríð Mr. Eisenhowers, stríð Mr. Kennedys, stríð Mr. Johnsons og stríð Mr. Nixons ? Var innrásin á Grenada stríð Mr. Reagans, stríðið í Írak stríð Mr. Bush´s, stríðið í Afghanistan kannski stríð Mr. Obama o.s.frv.o.s.frv. ?

 

Nei, nei, þegar Bandaríkin og vesturveldin eiga í hlut þá er aldrei viðhöfð þessi persónulega tilvísun, en af hverju ekki ? Nú er ég ekki geðlæknir og get ekki skilgreint ætlaða toppmenn til neinnar hlítar eða geðveiki þeirra hvers um sig. En mér er þó spurn, af hverju skyldi þessi túlkun vera almennt viðhöfð í fjölmiðlum Vesturlanda, eins og eftir fastri línu ?

 

Um leið og umræddur Mr. Putin opnar kjaftinn eru kallaðir til ,,algerlega hlutlausir aðilar” eða hitt þó heldur, til að leggja út af orðum hans. Þeirra á meðal Volodymir Zelensky, meintur forseti Úkraínu, Olaf Scholtz járnkanslari Evrópusambandsins, sem nú er orðið þýskt, Jón Ólafsson heimspekidoktor frá bandarískum háskóla og með gráðu í sovétfræðum frá sama innspýtingar-apparati og Friðrik nokkur Jónsson sem mér skilst helst að sé sérlegur innanbúðar-maður hjá Nató og margreyndur sérfræðingur í ómennsku Rússa !

 

Og fólk virðist telja og trúa að þarna sé á ferð eðlileg túlkun og meðferð upplýsinga. Að andstæðingarnir túlki allt það sem í gangi er á sína vísu ? Hverjir myndu vilja vera dæmdir alfarið út frá því sem helstu andstæðingar þeirra segðu um þá ? Þessi tegund fjölmiðlaumræðu er öllum til skammar sem hana stunda og magnar bara ófriðarhorfurnar. Framsetning hennar er full af lygum og villandi lýsingum, dómgreindarlaus og dæmir sig sjálf !

 

Ég hef kynnst mönnum sem eru eðlisgreindir að náttúrufari, en lepja samt upp fréttir af erlendum ágreiningsmálum úr íslenska ríkisútvarpinu eins og þær séu sendar út frá Höfuðstöðvum hins Æðsta Sannleika. Það virðist ekki hvarfla að þeim að slíkur fréttaflutningur frá hinum vestrænu fréttastofum sé áróðurstengdur á allan mögulegan máta og því algerlega óframbærilegur !

 

Ég gef lítið fyrir hina bandarísk-skóluðu heimspeki Jóns Ólafssonar, sem er að minni hyggju vafasöm í meira lagi og einhliða sem slík og upplýsingar frá Nató um framferði Rússa geta aldrei orðið trúverðugar í mínum augum. Öll hernaðarbandalög nærast á stríði og illum hlutum eins og allt sem er af blóðsugukyni. Tindátaleikurinn ætlar lengi að fylgja mannkyninu, öllum friði til bölvunar, og í þeim blekkinga-málum er enginn öðrum skárri !

 

Ég tel að hver maður ætti að reyna að halda í sína dómgreind eftir því sem hægt er, en það gerir enginn maður í fjölmiðlastjórnandi návist Nató. Það hefur forsætisráðherra núverandi hægri stjórnar Íslands til dæmis afgerandi auglýst og sýnt með framgöngu sinni síðustu árin, í valdaspilltum vangadansi sínum við íhaldið í landinu !

 

 

Nokkur orð um formannskjör !

 

 

Ekki var hægt með nokkru móti að finna það á framboði Guðlaugs Þórs Þórðarsonar, þegar það fór af stað, að því væri ýtt úr vör á einhverjum breyttum stefnuforsendum. Það skein eiginlega út úr öllu að lítið annað en persónuleg framasókn var undirrót framboðsins !

 

Staðan var þannig að Bjarni virtist bara ætla að sitja og sitja og það var orðið illþolandi fyrir framagosa eins og Guðlaug Þór, sem var trúlega líka farinn að finna að tíminn var að renna frá honum með tækifærið til að taka við. Fleiri arftakar gætu farið að koma fram hvað úr hverju. Það varð að hrökkva eða stökkva !

 

Bjarni Ben hefur lengi verið formaður Sérhagsmunabandalagsins sem kallar sig reyndar sjálfstæðisflokk og það á fullkomlega röngum forsendum. Bjarni er auðvitað maður sérhagsmuna, en margir telja þó að hann sé fulltrúi ákveðinna þrengri sérhagsmuna innan þeirrar sérhagsmunaklíku sem flokkurinn er og hefur alltaf verið !

 

Þeir sem eru utan þeirra sérhagsmuna og hafa aðra sérhagsmuni að verja, voru því manna líklegastir til að vilja velta Bjarna og styðja Guðlaug Þór og hafa sjálfsagt gert það. Fjölmiðlar gerðu mikið úr þessum slag þeirra fjandvinanna, en varla var nú um öllu meira að ræða en storm í bláu vatnsglasi !

 

En nú er þessari hátt upp höfnu formanns-kosningu lokið og auðvitað var hinn mikli landsfundur ekki tilbúinn að stíga svo afgerandi skref að velta Bjarna úr sessi. Guðlaugur Þór stendur fótbrotinn eftir slaginn, en var það reyndar fyrir hann líka. Hvernig hann kemur svo til með að standa í lappirnar hér eftir á hinsvegar eftir að koma í ljós !

 

Þótt hann hafi fengið umtalsvert fylgi við kosninguna er erfitt að meta framtíð hans í forustusveit flokksins hér eftir, því Bjarni og arftakar hans munu tæplega hossa honum hátt. En að vissu leyti má segja að úrslitin sýni að það er vaxandi þreyta í flokknum á hinni nokkuð svo löngu valdatíð Bjarna Benediktssonar og augljós vilji til breytinga !

 

Bjarni hefur áttað sig á þessu og tekið fram að hann sé með breytingum sem stefni til bóta, hvað sem það annars kann að þýða í hans munni. Líklegt er að einhver undiralda verði í þessu sérhagsmuna-batteríi á næstunni, því þó allir séu þar fylgjandi sérhagsmunum, eru klíkurnar margar og mismunandi og sumar inni í hlýju kjötkatlanna en aðrar hálfpartinn úti í kuldanum !

 

Það er sagt að í ónefndu ríki handan þessa heims sé hver höndin uppi á móti annarri og allir sitji þar á svikráðum við alla. Þar er aðeins foringinn sagður nokkurn-veginn öruggur um sitt og það er kannski hreint ekki svo ólíkt því sem þekkist í sérhagsmunabandalaginu !

 

Og þó að hjörtu manna séu sögð stækka þar í vellíðan valdadrauma, er ekki þar með sagt að einhver varanleg hamingja geti verið þar á ferðinni. Til þess er grundvöllur mála allt of nærri því skipulagi sem sagt er að viðgangist í áður nefndu ríki og auðvitað óralangt frá öllu því sem í mannlegu samfélagi gæti flokkast undir réttlát skil !