Hagfræðin er látin stuðla að vistmorði !

 

 

 

Náttúran er eign okkar allra ! Hún þarf að

vera til svo við getum lifað í þessum

heimi og helst sem óspilltust. Það er sem

betur fer til fólk sem berst fyrir

náttúrunni og vill verja hana en það er

líka til fólk sem metur hana bara til

verðs og vill stöðugt ganga lengra og

lengra í að svipta hana þeim lífsblóma sem

hún skapar og viðheldur fyrir okkur öll

sem lifum á þessari jörð !

 

Meðal þeirra sem sjá ekki gildi

náttúrunnar og virða það einskis eru

reiknimeistarar auðvaldsins. Það er ekkert

náttúrulegt við hagfræðiformúlur og

efnahagslegar blekkingar sem þjóna

stöðugt sjónarmiðum hámarksgróða og

takmarkalausrar græðgi og vilja spilla

öllum náttúrunnar blóma af þeim sökum !

 

Þar er yfirleitt öllu hagrætt eftir vilja

hákarlamafíunnar sem stjórnar vestrænum

samfélögum og í því samhengi er hagfræðin

mikið notuð sem stýritæki til að kasta

ryki í augu almennings með lygarökum og

fölskum tölum sem iðulega eru hrein

andstæða þess sem rétt er. Hagfræðin er á

okkar tímum ákaflega vinsælt valfag meðal

háskólafólks, sem vill vera flott með

allar tölur á hreinu, þó ekki sé hægt að

treysta þar einu eða neinu !

 

,,Hagfræðin er ofmetnasta fræðigrein sem

til er“ sagði Göran Persson eitt sinn í

viðtali. ,,Í grunninn snýst þetta bara um

almenna skynsemi !“ Og almenn skynsemi er

til alls staðar meðal fólks sem lætur

skynsemina ráða í verkum sínum til sjávar

og sveita. Svo spyrja má, til hvers eru

hagfræðingar ?

 

Eru þeir til að mynda þjóðhagslega

hagkvæmir ? Fáar staðreyndir virðast mæla

með því. Menntun þeirra virðist aðallega

snúast um að hagræða tölum fyrir kerfið og

valdsstéttina og í þeim töluleik er

sannleikurinn sjaldnast mælanleg stærð.

Þegar hagfræðinni er beitt til að réttlæta

náttúrulegt niðurbrot um allan heim er

niðurstaðan því alltaf tap fyrir

heilbrigt, mannlegt samfélag !

 

Við þörfnumst náttúrunnar og þess sem hún

gefur okkur. En við þörfnumst ekki

hagfræðinga sem yfirleitt virðast vera

nýttir menntunarlega séð af

fjármagnseigendum sem gerendur, í þeim

ljóta leik að taka af okkur réttindi okkar

til heilbrigðs umhverfis og betra lífs,

með talnalygum tvöfaldra kredduvísinda !

 

Þegar einstaklingar fá ofurvöld í hendur,

sama hvar er í heiminum, er ein kúnstin í

valdaspili þeirra að falsa tölur. Og

yfirleitt hafa allir slíkir nóg af

hagfræðingum í kringum sig, til að hagræða

og stilla upp jákvæðum tölupýramídum svo

fólk haldi að allt sé í lagi. Man fólk

eftir björgunarsamtökum hagfræðinga í

hruninu mikla hérna um árið ? Nei,

auðvitað ekki, því þau voru ekki til !

 

En það voru greiningardeildir banka og

fjármálastofnana til staðar með fullt af

fólki á háu kaupi, nokkurskonar

öryggis-kerfi gegn fjármálalegri veðurvá,

en það klikkaði hinsvegar allt. Öryggið

var ekki neitt og launakostnaðurinn allur

til einskis. Hagfræðingarnir horfðu í

sólskins-gleraugun sín og sáu engin

hættumerki á hinum fjármála-fræðilega

sjóndeildarhring. Þeir voru yfirtaks

sáttir með eigin kjör og velsæld á allar

hliðar og hvað gat þá verið að ?

 

Árið 1953, þann 5. mars, lést Jósef nokkur

Stalín, en hann var einn þeirra manna sem

ofurvöld hafði sem munu hafa bitnað á

mörgum. Ófáir hagfræðingar dönsuðu eftir

fyrirmælum hans hinum megin járntjaldsins

svonefnda um hans daga og hagræddu tölum

fyrir hann. Ég tók eftir því að þann 5.

mars síðastliðinn lést Jóhannes Nordal

háaldraður, hagfræðingur sem talinn var

hafa haft býsna lengi ofurvöld í

efnahags-málum okkar Íslendinga, sem þó

hafa aldrei verið í lagi svo heitið geti !

 

Ekki er ég að segja að þessir tveir menn

hafi verið líkir, en báðir höfðu þeir svo

mikil völd um sína daga að það hálfa hefði

verið nóg og báðir kvöddu þeir 5. mars.

Hagfræðingar eru sjálfsagt að deyja á

öllum dögum ársins eins og annað fólk, sem

trúlega myndi sannast í réttum tölum, ef

aðrir hagfræðingar kæmu ekki nálægt þeim.

En hagfræðilegar lausnir virðast afar

sjaldan hafa eitthvað með það að gera að

bæta líf okkar og velferðarstig !

 

Þjóðhagsleg afkoma okkar væri eflaust mun

betri án aðkomu hagfræðinga, því í

grunninn snúast málin fyrst og fremst um

almenna skynsemi sem fyrr segir. Og leiðir

hagfræðinga og almennrar skynsemi virðast

afar sjaldan liggja samhliða í þessari

veröld okkar, enda virðast fræðin alls

ekki miðuð við það að svo sé, enda farin

að ganga út á tóman blekkingaleik að mestu !

 

Hagfræðin vinnur yfirleitt alls staðar með

auðvalds og stóriðju-öflum gegn

náttúrulegum sjónarmiðum verndar og

viðgangs og þjónar þannig sjaldnast

almannaheill. Flotta fólkið sem gengur um

með töludálkagreiningar sínar í

leður-skjalatöskum yfirlætisins er því

alls ekkert flott þegar málin eru skoðuð

ofan í kjölinn, og það sem verra er,

þjóðfélagsleg gagnsemi þess, er eins og

flestir ættu að geta skilið, afar

umdeilanleg !